Argus News - ହାତରୁ ବାପା ଛଡ଼ାଇଲେ ମୋବାଇଲ; ଜୀବନ ହାରିଲେ ୩ ଭଉଣୀ

ଉତ୍ତରପ୍ରଦେଶ ଗାଜିଆବାଦରେ ଏକ ଅଭାବନୀୟ ଘଟଣା ଘଟିଯାଇଛି । ୯ ତାଲା ବାଲକୋନୀରୁ ଡେଇଁ ଆତ୍ମହତ୍ୟା କରିଛନ୍ତି ୧୨, ୧୪ ଓ ୧୬ ବର୍ଷର ତିନି ଭଉଣୀ । ତେବେ ତିନି ଭଉଣୀ ଜୀବନ ହାରିବାର କାରଣ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ତିନି ଭଉଣୀଙ୍କଠାରୁ ବାପା ମୋବାଇଲ ଛଡ଼ାଇବା ପରେ ଏପରି ଚରମ ନିଷ୍ପତ୍ତି ନେଇଛନ୍ତି ୩ ଝିଅ । ଏହି ଘଟଣା ପରେ କଣ ମୋବାଇଲ ଛଡ଼ାଇ ପିଲାଙ୍କୁ ଆକଟ କରିବା ପାପ ବୋଲି ପ୍ରଶ୍ନ କରିଛନ୍ତି ହତଭାଗା ବାପା ।

ଜୀବନ ହାରିଥିବା ୩ ଭଉଣୀ ହେଉଛନ୍ତି ନିଶିକା (୧୬), ପ୍ରାଚୀ (୧୪) ଏବଂ ପାଖି (୧୨) । ସେମାନେ ମୃତ୍ୟୁବରଣ କରିବା ପୂର୍ବରୁ ସୁଇସାଇଡ୍ ନୋଟ୍ ମଧ୍ୟ ଛାଡ଼ି ଯାଇଛନ୍ତି । ସେପଟେ ପୋଲିସ ତଦନ୍ତ ବେଳେ ତିନି ଭଉଣୀଙ୍କ ପିତା ଚେତନ କୁମାରଙ୍କ ବୈବାହିକ ଜୀବନ ସମ୍ପର୍କରେ ଜାଣିବାକୁ ପାଇଛି । ଚେତନଙ୍କ ଦୁଇଟି ପତ୍ନୀ ଥିବାବେଳେ ସେମାନଙ୍କଠାରୁ ତାଙ୍କୁ ୪ଟି ଝିଅ ଓ ଗୋଟିଏ ପୁଅ ଅଛି । ପୁରା ପରିବାର ଏକାଠି ଗୋଟିଏ ଛାତ ତଳେ ରହୁଥିଲେ ।

• ସ୍କୁଲ ଯାଉନଥିଲେ ୩ ଭଉଣୀ

ପୋଲିସର କହିବାନୁସାରେ, ତିନି ଭଉଣୀ କିଛି ଦିନ ଧରି ସ୍କୁଲ ଯାଉନଥିଲେ ଓ ଅଧିକାଂଶ ସମୟ ଘରେ ରହୁଥିଲେ । କୋଭିଡ ମହାମାରୀ ପରେ ସେମାନେ ପ୍ରାୟତଃ ଘରେ ରହୁଥିଲେ । ବାହାର ଦୁନିଆଠୁ ଦୂରେଇ ରହୁଥିଲେ । ତିନି ଭଉଣୀ ମିଶି କୋରିଆନ ଡ୍ରାମା ଦେଖୁଥିଲେ ଏବଂ ପରସ୍ପରକୁ ଟେଲିଭିଜିନ ଶୋ'ର ନାଁରେ ଡାକୁଥିଲେ ।

• କୋରିଆନ ଆକ୍ଟରଙ୍କ ପ୍ରେମରେ ପଡ଼ିଥିଲେ ୩ ଭଉଣୀ

ସୁଇସାଇଡ୍ ନୋଟରେ ତିନି ଭଉଣୀ ଲେଖିଛନ୍ତି ଯେ ସେମାନେ କୋରିଆନ ଡ୍ରାମା ଓ କେ-ପପ୍ ଗ୍ରୁପକୁ ପରିବାରଠାରୁ ବି ଅଧିକ ଭଲ ପାଉଥିଲେ । ସେମାନେ ତାଙ୍କ ଜୀବନ ବୋଲି କହୁଥିଲେ । ସେମାନେ ନିଜ ପରିବାରକୁ ସେତିକି ଶ୍ରଦ୍ଧା ଓ ଭଲପାଇବା ଦେଇପାରିବେ ନାହିଁ ବୋଲି ଲେଖିଥିଲେ । ଏକ ଡାଏରୀରେ ଦେଖିବାକୁ ମିଳିଛି ଯେ ତିନି ଭଉଣୀ ଲେଖିଛନ୍ତି, ତାଙ୍କ ପିତା ଚେତନ କୁମାର ସେମାନଙ୍କୁ କୋରିଆନ, ଚାଇନିଜ, ଜାପାନିଜ, ଥାଇ, ଆମେରିକାନ ଓ ବ୍ରିଟିଶ ମ୍ୟୁଜିକ୍ ଶୋ', କାର୍ଟୁନ ଶୋ' ଦେଖିବାକୁ ଦେଉନଥିଲେ । ଏପରିକି ସେମାନେ ସିନଚାନ୍ ଓ ଡୋରେମନ୍ ବି ଦେଖିପାରୁନଥିଲେ ।

• କଣ କହୁଛନ୍ତି ଚେତନ କୁମାର ?

ଅନ୍ୟପଟେ ମୃତ ତିନି ଭଉଣୀଙ୍କ ପିତା ଚେତନ କୁମାର କହିଛନ୍ତି ଯେ ସେମାନେ କୋରିଆନ ସଂସ୍କୃତିକୁ ବେଶ ପସନ୍ଦ କରୁଥିଲେ । ସେମାନେ ଅଧିକାଂଶ ସମୟ କୋରିଆନ ମ୍ୟୁଜିର୍‍ କୋରିଆନ ଫିଲ୍ମ, ଡ୍ରାମା, ୱେବ ସିରିଜ, କାର୍ଟୁନ ଆଦି ଦେଖୁଥିଲେ । ଏପରିକି ସେମାନେ ଭାରତ ଛାଡ଼ି କୋରିଆ ଯିବାକୁ ଚାହୁଁଥିଲେ । ସେମାନେ କୋରିଆନ ସଂସ୍କୃତିକୁ ଆପଣାଇବାକୁ ଚାହୁଁଥିଲେ । ଯେତେବେଳେ ପରିବାର ଏଥିପ୍ରତି ଅନୁମତି ଦେଇନଥିଲା, ସେତେବେଳେ ସେମାନଙ୍କର ବ୍ୟବହାରରେ ପରିବର୍ତ୍ତନ ଆସିଥିଲା । ଏହାପରେ ସେମାନେ ପରିବାର ସହ ଏତେ କଥା ହେଉନଥିଲେ କି ସମୟ ଅତିବାହିତ କରୁନଥିଲେ । ତିନି ଭଉଣୀ ବହୁ ସମୟ ଧରି କୋରିଆନ ଶୋ' ଦେଖିବା ଯୋଗୁଁ ସେମାନଙ୍କ ଆଖି ଫୁଲିବାକୁ ଲାଗିଥିଲା । ଝିଅମାନଙ୍କ ସ୍ଵାସ୍ଥ୍ୟକୁ ଦୃଷ୍ଟିରେ ରଖି ଚେତନ ସେମାନଙ୍କଠାରୁ ମୋବାଇଲ ଛଡ଼ାଇ ନେଇଥିଲେ । ଏହାପରେ ସେମାନେ ଏପରି ଚରମ ନିଷ୍ପତ୍ତି ନେଇଛନ୍ତି । ପୋଲିସ ଅଧିକ ତଦନ୍ତ ଜାରି ରଖିଥିବା କହିଛି ।

ଏଥିସହ ପଢନ୍ତୁ: ରିଲ୍ କରୁଥିଲେ; ଭୁଲରେ ଚାଲିଗଲା ମହିଳାଙ୍କ ଜୀବନ