Air India Flight Air Turbulence / ପୁଣି ଡ୍ରଗ୍ ପରୀକ୍ଷାରେ ବିଫଳ ହେଲେ ଏୟାର ଇଣ୍ଡିଆ ପାଇଲଟ୍; କାର୍ଯ୍ୟରୁ ପଡ଼ିଲେ ବାଦ୍

Phuket Delhi Air India Flight:  ଫୁକେଟ୍-ଦିଲ୍ଲୀ ବିମାନରେ ଘଟିଥିବା ଘଟଣା ପରେ, ଏୟାର ଇଣ୍ଡିଆ ପକ୍ଷରୁ ଡ୍ରଗ୍ ପରୀକ୍ଷା ପାଇଁ ଦିଆଯାଇଥିଲା ନିର୍ଦ୍ଦେଶ। ଆଉ ଏହା ପରେ ୨ ଜଣ ଏୟାର ଇଣ୍ଡିଆ ପାଇଲଟ୍ ପ୍ରାରମ୍ଭିକ ଡ୍ରଗ୍ ପରୀକ୍ଷାରେ ବିଫଳ ହୋଇଥିଲେ। ସୂତ୍ରରୁ ମିଳିଥିବା ଖବର ଅନୁଯାୟୀ, ଚୂଡ଼ାନ୍ତ ଡ୍ରଗ୍ ପରୀକ୍ଷା ଫଳାଫଳକୁ ଅପେକ୍ଷା କରାଯାଇଛି। ଏହି ସମୟ ମଧ୍ୟରେ, ଉଭୟ ପାଇଲଟ୍‌ଙ୍କୁ ସେମାନଙ୍କ ଡ୍ୟୁଟିରୁ ହଟାଇ ଦିଆଯାଇଛି।

ଏୟାରଲାଇନ୍ସ ଏହାର ସମସ୍ତ ପାଇଲଟ୍‌ଙ୍କୁ ଏକ ନୂତନ ମାନକ କାର୍ଯ୍ୟ ପ୍ରଣାଳୀ (SOP) ଅନୁଯାୟୀ ଡ୍ରଗ୍ ପରୀକ୍ଷା କରିବାକୁ ନିର୍ଦ୍ଦେଶ ଦେଇଥିଲା। ଏପର୍ଯ୍ୟନ୍ତ ପ୍ରାୟ ୩ ଶହରୁ ଅଧିକ ପାଇଲଟ୍ ଏହି ପରୀକ୍ଷା ଦେଇସାରିଛନ୍ତି। ସୂତ୍ର ଅନୁସାରେ ଚୂଡ଼ାନ୍ତ ଡ୍ରଗ୍ ପରୀକ୍ଷା ଫଳାଫଳ ଆସିବା ପାଇଁ ସାଧାରଣତଃ ୨୪ ରୁ ୪୮ ଘଣ୍ଟା ସମୟ ଲାଗିଥାଏ। ଏହା କୁହାଯାଉଛି ଯେ ବିମାନରେ ଥିବା ଜଣେ କ୍ୟାବିନ୍‌ କ୍ରୁ ସଦସ୍ୟ ଅଭିଯୋଗ କରିଛନ୍ତି ଯେ ପାଇଲଟ୍ ପୂର୍ବରୁ ଗଞ୍ଜେଇ ପାନ କରିଥିଲେ।

ଏହା ସହ ପଢନ୍ତୁ: ଆସିଲା ଦ୍ୱିତୀୟ ଡୋପ୍ ଟେଷ୍ଟ ରିପୋର୍ଟ; ଗଞ୍ଜେଇ ନିଶାରେ ବିମାନ ଉଡ଼ାଉଥିଲେ ପାଇଲଟ୍

ଫୁକେଟ୍-ଦିଲ୍ଲୀ ଏୟାର ଇଣ୍ଡିଆ ବିମାନରେ ହୋଇଥିଲା Air Turbulence
ଗତ ଅଗଷ୍ଟ ୪ ତାରିଖରେ, ଏୟାର ଇଣ୍ଡିଆ ଦ୍ୱାରା ପରିଚାଳିତ ଏକ ଏୟାରବସ୍ A320 ବିମାନ, ଉଡ଼ାଣ ସଂଖ୍ୟା AI2379 ଯାହା ଫୁକେଟ୍-ଦିଲ୍ଲୀ ମଧ୍ୟରେ ଚଳାଚଳ କରୁଥିଲା, ତାହା ମଝି ଆକାଶ ଅଶାନ୍ତ ହୋଇ ହଠାତ୍ ୩୦୦ ଫୁଟ ତଳକୁ ଖସି ଆସିଥିଲା। ଏହି ଘଟଣାରେ ପ୍ରାୟ ୨୪ ଜଣ ଯାତ୍ରୀ ଆହତ ହୋଇଥିଲେ। ଏହି ବିମାନରେ ୧୩୭ ଜଣ ଯାତ୍ରୀ ଏବଂ ୮ ଜଣ ବିମାନ କର୍ମଚାରୀଙ୍କ ସମେତ ମୋଟ ୧୪୫ ଜଣ ଯାତ୍ରା କରୁଥିଲେ। ଏହି ଘଟଣା ପରେ, ବିମାନର ପାଇଲଟ୍-ଇନ୍-କମାଣ୍ଡ ନିଶାଦ୍ରବ୍ୟ ସେବନ କରିଥିବା ନେଇ ହୋଇଥିବା ଟେଷ୍ଟ ରିପୋର୍ଟ ପଜିଟିଭ୍ ଆସିଥିଲା। ବିମାନ ଉଡ଼ାଇବା ସମୟରେ ସେହି ପାଇଲଟ୍ ନିଶାସକ୍ତ ଅବସ୍ଥାରେ ରହିଥିବାର ଜଣାପଡ଼ିଥିଲା। ଯାହା ବିମାନ ଉଡ଼ାଣ କାର୍ଯ୍ୟଦକ୍ଷତାରେ ଏକ ଗୁରୁତର ତ୍ରୁଟି ରହିଥିଲା।

କ'ଣ ରହିଛି DGCA ନିୟମ?
ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (Directorate General of Civil Aviation) ନିୟମ ଅନୁଯାୟୀ, ଯଦି ଜଣେ ପାଇଲଟ୍ କିମ୍ବା ବିମାନ କର୍ମଚାରୀ ନିଶାଦ୍ରବ୍ୟ ସେବନ କରିଥିବା ନେଇ, ତାଙ୍କର କରାଯାଇଥିବା ଟେଷ୍ଟ ରିପୋର୍ଟ ଯଦି ପଜିଟିଭ୍ ଆସେ, ତାହେଲେ ତାଙ୍କୁ ନିଶା ନିବାରଣ କେନ୍ଦ୍ରକୁ ପଠାଯାଏ। ଯଦି ସେହି ବ୍ୟକ୍ତିଙ୍କ ଦ୍ୱିତୀୟ ଥରର ରିପୋର୍ଟ ପଜିଟିଭ୍ ଆସେ, ତାହେଲେ ତାଙ୍କର ଲାଇସେନ୍ସ ୩ ବର୍ଷ ପାଇଁ ନିଲମ୍ବନ କରାଯାଏ। ସେହିପରି, ଯଦି ଏହି ନିୟମ ତୃତୀୟ ଥର ପାଇଁ ଉଲ୍ଲଂଘନ କରାଯାଏ, ତାହେଲେ ସମ୍ପୃକ୍ତ ବ୍ୟକ୍ତିଙ୍କ ଲାଇସେନ୍ସ ବାତିଲ କରାଯାଏ।