Clean Air After Diwali / ଦୀପାବଳି ପରେ ବି ଏହି ସହରର AQI ମାତ୍ର ୫୬; ନୀଳ ଆକାଶର ଫଟୋ ଭାଇରାଲ୍

ନୂଆଦିଲ୍ଲୀ: ଦୀପାବଳି ପରେ ଦେଶର ଅନେକ ବଡ଼ ସହର ବାୟୁ ପ୍ରଦୂଷଣରେ ଅଣନିଃଶ୍ୱାସୀ ହୋଇପଡ଼ିଥିବା ବେଳେ ଉତ୍ତର-ପୂର୍ବ ଭାରତର ଏକ ସହର ଏବେ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ମିଜୋରାମର ରାଜଧାନୀ ଆଇଜଲ୍‌ରେ ଦୀପାବଳି ପରେ ମଧ୍ୟ ବାୟୁ ଗୁଣବତ୍ତା ସୂଚକାଙ୍କ (AQI) ମାତ୍ର ୫୬ ରେକର୍ଡ ହୋଇଛି । ଏହି ସହରର ନୀଳ ଆକାଶ ଓ ସ୍ୱଚ୍ଛ ପରିବେଶର ଏକ ଫଟୋ ଏବେ ସୋସିଆଲ ମିଡିଆରେ ଭାଇରାଲ୍ ହେଉଛି ।

• ଫଟୋ ସେୟାର କରି ଚର୍ଚ୍ଚାରେ କାନାଡୀୟ ନାଗରିକ

ଭାରତରେ ଦୀର୍ଘ ୧୦ ବର୍ଷରୁ ଅଧିକ ସମୟ ଧରି ରହୁଥିବା କାନାଡାର ନାଗରିକ କ୍ୟାଲେବ୍ ଫ୍ରିଜେନ୍ (Caleb Friesen) ସୋସିଆଲ ମିଡିଆ ପ୍ଲାଟଫର୍ମ Xରେ ଆଇଜଲ୍‌ର ଏକ ଫଟୋ ସେୟାର କରିଛନ୍ତି । ଫଟୋରେ ସେ ନୀଳ ଆକାଶ ଓ ଧଳା ବାଦଲ ତଳେ ଥମ୍ସ-ଅପ୍ ଦେଉଥିବା ନଜର ଆସିଛନ୍ତି । ଏହି ପୋଷ୍ଟରେ ସେ ଆଇଜଲ୍‌ର ସରଳ ଜୀବନଶୈଳୀ ଏବଂ ପରିବେଶ ପ୍ରତି ସ୍ଥାନୀୟ ଲୋକଙ୍କ ସଚେତନତାକୁ ପ୍ରଶଂସା କରିଛନ୍ତି ।

Post-Diwali AQI in Aizawl, Mizoram is 56 right now. Didn't hear a single cracker or firework last night. My wife, two kids and two dogs slept peacefully. Our lungs are happy. https://t.co/CObbyFEVxY

— Caleb (@caleb_friesen) November 9, 2026

• ଦୀପାବଳି ରାତିରେ ଶୁଣିବାକୁ ମିଳିନଥିଲା ବାଣ ଶବ୍ଦ

କ୍ୟାଲେବ୍‌ଙ୍କ କହିବା ଅନୁଯାୟୀ, ଦୀପାବଳି ରାତିରେ ଆଇଜଲ୍‌ରେ ଗୋଟିଏ ବି ବାଣ ଫୁଟିବାର ଶବ୍ଦ ଶୁଣିବାକୁ ମିଳିନଥିଲା । ଏହାକୁ ନେଇ ସେ ଖୁସି ପ୍ରକାଶ କରିଛନ୍ତି । ସେ କହିଛନ୍ତି, ତାଙ୍କ ପତ୍ନୀ, ଦୁଇ ଛୋଟ ପିଲା ଏବଂ ଦୁଇଟି ପୋଷା କୁକୁର ରାତିସାରା କୌଣସି ଶବ୍ଦ ପ୍ରଦୂଷଣ ବିନା ଶାନ୍ତିରେ ଶୋଇପାରିଥିଲେ । ସ୍ୱଚ୍ଛ ପବନ ଯୋଗୁଁ ତାଙ୍କ ଫୁସଫୁସ ମଧ୍ୟ ଆରାମ ପାଇଥିବା ସେ ମଜାଳିଆ ଢଙ୍ଗରେ ଉଲ୍ଲେଖ କରିଛନ୍ତି ।

• ଦିଲ୍ଲୀର AQI ୧୩୩୧, ଆଇଜଲ୍‌ରେ ମାତ୍ର ୫୬

ଦୀପାବଳି ପରେ ଦେଶର ଅନେକ ମହାନଗରରେ ବାୟୁ ପ୍ରଦୂଷଣ ଚିନ୍ତାଜନକ ସ୍ତରରେ ପହଞ୍ଚିଛି । ରିପୋର୍ଟ ଅନୁଯାୟୀ, ଦିଲ୍ଲୀରେ ଦୀପାବଳି ରାତିରେ AQI ୧୩୩୧ ଛୁଇଁଥିବା ବେଳେ ପରଦିନ ସକାଳେ ମଧ୍ୟ ବାୟୁର ମାନ ଅତ୍ୟନ୍ତ ଖରାପ ରହିଥିଲା । ଯଦି ଆମେ ଭୁବନେଶ୍ଵର କଥା କହିବା, ତେବେ ନଭେମ୍ବର ୧ ତାରିଖରେ ଭୁବନେଶ୍ୱରର ହାରାହାରି AQI ୬୭ ଥିବାବେଳେ ନଭେମ୍ବର ୮ ତାରିଖ ଦୀପାବଳି ଦିନରେ ଏହା ବୃଦ୍ଧି ପାଇ ୫୧୦ରେ ପହଞ୍ଚିଛି । ଅନ୍ୟପଟେ, ଆଇଜଲ୍‌ରେ AQI ମାତ୍ର ୫୬ ରହିବା ସହ ସେଠାକାର ଶାନ୍ତ ପରିବେଶ ଏବେ ଚର୍ଚ୍ଚାର ବିଷୟ ପାଲଟିଛି । ପରିବେଶ ସୁରକ୍ଷା ଓ ଶାନ୍ତି ପ୍ରତି ସ୍ଥାନୀୟ ଲୋକଙ୍କ ସଚେତନତା ଏହି ଚର୍ଚ୍ଚାର ମୁଖ୍ୟ କାରଣ ହୋଇଛି ।

ପଢନ୍ତୁ ଏହି ଖବର: ବିଷାକ୍ତ ଦିଲ୍ଲୀ ବାୟୁ, ୨୦ ଗୁଣା ବଢ଼ିଲା ଏୟାର ପ୍ୟୁରିଫାୟର ଚାହିଦା

• ପୂର୍ବରୁ ବେଙ୍ଗାଲୁରୁର ଫୁଟପାଥ୍‌କୁ ନେଇ କରିଥିଲେ ପ୍ରଶ୍ନ

କ୍ୟାଲେବ୍ ଫ୍ରିଜେନ୍ ଏହା ପୂର୍ବରୁ ମଧ୍ୟ ଭାରତର ସହରାଞ୍ଚଳ ଭିତ୍ତିଭୂମିକୁ ନେଇ ସୋସିଆଲ ମିଡିଆରେ ନିଜ ମତ ରଖି ଚର୍ଚ୍ଚାକୁ ଆସିଥିଲେ । ସେ ବେଙ୍ଗାଲୁରୁର ଇନ୍ଦିରାନଗର ଅଞ୍ଚଳର ଖରାପ ଫୁଟପାଥ୍‌କୁ ନେଇ ଏକ ଭିଡିଓ ସେୟାର କରିଥିଲେ । ଛୋଟ ପିଲାଙ୍କ ସହ ରାସ୍ତାରେ ଚାଲିବା କେତେ ବିପଜ୍ଜନକ ହୋଇପାରେ, ସେ ଏହି ଭିଡିଓରେ ଦର୍ଶାଇଥିଲେ । ଏବେ ଆଇଜଲ୍‌ର ଦୀପାବଳି ପରବର୍ତ୍ତୀ ସ୍ୱଚ୍ଛ ପରିବେଶକୁ ନେଇ ତାଙ୍କ ପୋଷ୍ଟ ଭାଇରାଲ୍ ହେଉଛି । ପ୍ରଦୂଷଣ ସହ ଲଢ଼ୁଥିବା ଦେଶର ଅନ୍ୟ ସହରଗୁଡ଼ିକ ପାଇଁ ଆଇଜଲ୍‌ର ଏହି ଚିତ୍ର ଏକ ବଡ଼ ବାର୍ତ୍ତା ଦେଉଛି ।