Ajit Doval Operation Sindoor / ଅପରେସନ୍ ସିନ୍ଦୂର ଉପରେ ଡୋଭାଲଙ୍କ ବଡ଼ ଖୁଲାସା ! 'ଭାରତର ସହନଶୀଳତାକୁ ଦୁର୍ବଳତା ଭାବନ୍ତୁ ନାହିଁ'

“ଭାରତ ସହନଶୀଳ, କିନ୍ତୁ ଦୁର୍ବଳ ନୁହେଁ । ଆବଶ୍ୟକ ପଡ଼ିଲେ ଭାରତ ନିଜ ଘରେ ନୁହେଁ, ଶତ୍ରୁର ଘରେ ପଶି କଡ଼ା ପ୍ରହାର କରିପାରେ ।” ଜାତୀୟ ସୁରକ୍ଷା ଉପଦେଷ୍ଟା (NSA) ଅଜିତ ଡୋଭାଲଙ୍କ ଏହି ବୟାନ ଏବେ ବେଶ୍‌ ଚର୍ଚ୍ଚାରେ ରହିଛି । ଅପରେସନ୍ ସିନ୍ଦୂରକୁ ନେଇ ଡୋଭାଲଙ୍କ ପ୍ରଥମ ଇଣ୍ଟରଭ୍ୟୁ ବୋଲି କୁହାଯାଉଥିବା ଏହି ସାକ୍ଷାତକାରରେ ସେ ୮୮ ଘଣ୍ଟା ଧରି ଚାଲିଥିବା ସାମରିକ ଅଭିଯାନ ପଛର ରଣନୀତି ଓ ନିଷ୍ପତ୍ତି ପ୍ରକ୍ରିୟା ଉପରେ ନିଜ ମତ ରଖିଛନ୍ତି ।

"ଡିକ୍ଲାସିଫାଇଡ୍: ଅପରେସନ ସିନ୍ଦୂର" ଏକ ଦୁଇ ଭାଗ ବିଶିଷ୍ଟ ଡକ୍ୟୁମେଣ୍ଟାରୀ ସିରିଜ୍‌ । ଏହା ଶନିବାର ରାତି ୯ ଟାରେ ଡିସ୍କଭରୀ ଚ୍ୟାନେଲ ଏବଂ ଏହାର ଷ୍ଟ୍ରିମିଂ ଆପ୍‌ ଡିସ୍କଭରୀ+ ରେ ପ୍ରସାରିତ ହେବ । ଏହା ଅପରେସନ ସିନ୍ଦୂର ସମ୍ବନ୍ଧୀୟ ଘଟଣା ଏବଂ ଭାରତର ଶୀର୍ଷ ସାମରିକ ଏବଂ ସୁରକ୍ଷା ନେତୃତ୍ୱ ଦ୍ୱାରା ନିଆଯାଇଥିବା ନିଷ୍ପତ୍ତିର ପ୍ରତ୍ୟକ୍ଷ ବିବରଣୀ ଉପସ୍ଥାପନ କରିବ । ଏହି ସିରିଜ୍‌ରେ ଡୋଭାଲ ମଧ୍ୟ ଅପରେସନ୍ ପଛର ରଣନୀତି, ଦୃଢ଼ ସଂକଳ୍ପ ଓ ନିଷ୍ପତ୍ତି ନେବାର ପ୍ରକ୍ରିୟା ଉପରେ ନିଜ ପକ୍ଷ ରଖିବେ ।
ଡୋଭାଲ ଭାରତର ସୁରକ୍ଷା ନୀତି ଓ ସାମରିକ କ୍ଷମତାକୁ ନେଇ ମଧ୍ୟ ଏକ ସ୍ପଷ୍ଟ ସନ୍ଦେଶ ଦେଇଛନ୍ତି । ତାଙ୍କ କହିବା ଅନୁସାରେ, ଭାରତର ଉଦାରତା କିମ୍ବା ସହନଶୀଳତାକୁ ଦୁର୍ବଳତା ଭାବିବା ଏକ ବଡ଼ ଭୁଲ । ଆବଶ୍ୟକ ପଡ଼ିଲେ ପରିଣାମକୁ ଖାତିର ନକରି ଭାରତ କଡ଼ା ପଦକ୍ଷେପ ନେଇପାରିବ ।

ଅଧିକ ପଢ଼ନ୍ତୁ: ଭାରତ ଆସିବେ ଇରାନ ରାଷ୍ଟ୍ରପତି, BRICS ସମ୍ମିଳନୀରେ ମୋଦିଙ୍କ ସହ ହେବ ବଡ଼ ଆଲୋଚନା

ଗତ ବର୍ଷ ୭ ମେ'ରେ ଅପରେସନ୍ ସିନ୍ଦୂର ଆରମ୍ଭ ହୋଇଥିଲା । ଏହା ୨୨ ଏପ୍ରିଲରେ ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣର ଜବାବରେ କରାଯାଇଥିଲା । ଭାରତୀୟ ସଶସ୍ତ୍ର ବାହିନୀ ପାକିସ୍ତାନ ଏବଂ ପାକିସ୍ତାନ ଅଧିକୃତ କାଶ୍ମୀରରେ ଥିବା ଅନେକ ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରିଥିଲେ ।

ଏହା ପରେ ପାକିସ୍ତାନ ପକ୍ଷରୁ ମଧ୍ୟ ଭାରତ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା । ଭାରତ ଏହାର ଜବାବରେ ପ୍ରତିଆକ୍ରମଣ କରିଥିଲା । ଉଭୟ ପରମାଣୁ ଶକ୍ତି ସମ୍ପନ୍ନ ଦେଶ ମଧ୍ୟରେ ଏହି ସାମରିକ ଲଢ଼େଇ ପ୍ରାୟ ୮୮ ଘଣ୍ଟା ଧରି ଚାଲିଥିଲା । ଶେଷରେ ୧୦ ମେ' ସନ୍ଧ୍ୟାରେ ଭାରତ ଓ ପାକିସ୍ତାନ ମଧ୍ୟରେ ସହମତି ପରେ ସାମରିକ କାର୍ଯ୍ୟାନୁଷ୍ଠାନ ଶେଷ ହୋଇଥିଲା ।

ଏବେ ‘Declassified: Operation Sindoor’ ମାଧ୍ୟମରେ ସେହି ଅଭିଯାନର ଅନେକ ଘଟଣା, ରଣନୀତି ଓ ନିଷ୍ପତ୍ତି ପ୍ରକ୍ରିୟା ସାମ୍ନାକୁ ଆସିବାକୁ ଯାଉଛି ।