Muslim Marriage Rules 2026 / ଆସାମରେ ବଦଳିଲା ମୁସଲିମ ବିବାହ ପଞ୍ଜୀକରଣ ନିୟମ, ଛାଡ଼ପତ୍ରର ମଧ୍ୟ ହେବ ରେଜିଷ୍ଟ୍ରେସନ୍

ଆସାମରେ ମୁସଲିମ ବିବାହ ଓ ଛାଡ଼ପତ୍ରର ସରକାରୀ ପଞ୍ଜୀକରଣ ଏଣିକି ଅନିବାର୍ଯ୍ୟ ହେବ । ସେପ୍ଟେମ୍ବର ୨୪ରେ ଆସାମ କ୍ୟାବିନେଟ୍ ‘ଆସାମ ମୁସଲିମ୍ ମ୍ୟାରେଜ୍ ରେଜିଷ୍ଟ୍ରେସନ୍ (କମ୍ପଲସରି) ରୁଲ୍ସ, ୨୦୨୬’କୁ ମଞ୍ଜୁରି ଦେଇଛି । ଏହି ନିୟମ ଅନୁସାରେ ମୁସଲିମ୍ ବିବାହ ଓ ଛାଡ଼ପତ୍ରର ପଞ୍ଜୀକରଣ ସରକାରୀ ବ୍ୟବସ୍ଥା ମାଧ୍ୟମରେ କରାଯିବ ।

ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା କହିଛନ୍ତି ଯେ, ନୂଆ ନିୟମ ଅନୁଯାୟୀ ମୁସଲିମ ବିବାହର ପଞ୍ଜୀକରଣ ଏଣିକି କାଜିମାନେ କରିବେ ନାହିଁ। ସରକାରଙ୍କ ଦ୍ୱାରା ନିଯୁକ୍ତ ମ୍ୟାରେଜ୍ ରେଜିଷ୍ଟ୍ରାରଙ୍କ ମାଧ୍ୟମରେ କମନ୍ ରେଜିଷ୍ଟ୍ରେସନ୍ ଅଫିସ୍‌ରେ ବିବାହ ପଞ୍ଜୀକରଣ କରାଯାଇପାରିବ । ସରକାରୀ ସୂତ୍ର ଅନୁଯାୟୀ, ଯଦି ପଞ୍ଜୀକରଣ ପାଇଁ ଆବେଦନ ସଂଖ୍ୟା ବଢ଼ିଯାଏ, ତେବେ ପଞ୍ଚାୟତ ସ୍ତରରେ ମଧ୍ୟ ଏହି ସୁବିଧା ଉପଲବ୍ଧ କରାଯାଇପାରେ ।

୨୦୨୪ର ଆଇନ ପରେ ନୂଆ ନିୟମ

ଆସାମ ବିଧାନସଭା ୨୦୨୪ ଅଗଷ୍ଟରେ ‘ଆସାମ କମ୍ପଲସରି ରେଜିଷ୍ଟ୍ରେସନ୍ ଅଫ୍ ମୁସଲିମ୍ ମ୍ୟାରେଜ୍ ଆଣ୍ଡ ଡିଭୋର୍ସ ବିଲ୍, ୨୦୨୪’ ପାରିତ କରିଥିଲା। ଏହି ଆଇନ ୧୯୩୫ର ‘ଆସାମ ମୁସଲିମ୍ ମ୍ୟାରେଜେସ୍ ଆଣ୍ଡ ଡିଭୋର୍ସ ରେଜିଷ୍ଟ୍ରେସନ୍ ଆକ୍ଟ’କୁ ବଦଳାଇଥିଲା । ପୁରୁଣା ବ୍ୟବସ୍ଥାରେ କାଜିମାନେ ମୁସଲିମ ବିବାହ ଓ ଛାଡ଼ପତ୍ର ପଞ୍ଜୀକରଣ କରିପାରୁଥିଲେ ଏବଂ ପଞ୍ଜୀକରଣ ଅନିବାର୍ଯ୍ୟ ନଥିଲା। ଏହା ସହିତ, ଅଭିଭାବକ କିମ୍ବା ଗାର୍ଜିଆନ୍ ଆବେଦନ କଲେ ନାବାଳକଙ୍କ ବିବାହର ମଧ୍ୟ ପଞ୍ଜୀକରଣ ହୋଇପାରୁଥିଲା ।  ନୂଆ ଆଇନରେ ନାବାଳକଙ୍କ ବିବାହ ପଞ୍ଜୀକରଣକୁ ଅନୁମତି ଦିଆଯାଇନାହିଁ। ଏହାର ଏକ ଉଦ୍ଦେଶ୍ୟ ହେଉଛି ବାଲ୍ୟବିବାହକୁ ରୋକିବା ଏବଂ ଏ ସମ୍ପର୍କିତ ଆଇନଗତ ସୁରକ୍ଷାକୁ ମଜବୁତ କରିବା ।

୩୦ ଦିନ ମଧ୍ୟରେ ବିବାହ ପଞ୍ଜୀକରଣ

ନୂଆ ବ୍ୟବସ୍ଥା ଅନୁଯାୟୀ, ବିବାହ ସମ୍ପନ୍ନ ହେବାର ୩୦ ଦିନ ମଧ୍ୟରେ ଏହାର ପଞ୍ଜୀକରଣ କରିବା ଆବଶ୍ୟକ। ମୁସଲିମ ପର୍ସନାଲ୍ ଲ’ ଅନୁଯାୟୀ ବିବାହ କରୁଥିବା ଦମ୍ପତିମାନେ ମଧ୍ୟ ସରକାରୀ ପଞ୍ଜୀକରଣ ବ୍ୟବସ୍ଥାର ବ୍ୟବହାର କରିପାରିବେ। ସେହିପରି, ଛାଡ଼ପତ୍ର ହେବା ପରେ ଏକ ମାସ ମଧ୍ୟରେ ଏହାର ମଧ୍ୟ ପଞ୍ଜୀକରଣ କରିବାକୁ ପଡ଼ିବ ।

ଜାଲି ସାର୍ଟିଫିକେଟ୍ ଦେଲେ ଦଣ୍ଡ

ବିବାହ କିମ୍ବା ଛାଡ଼ପତ୍ର ପଞ୍ଜୀକରଣ ସମୟରେ ନକଲି କିମ୍ବା ଜାଲି ସାର୍ଟିଫିକେଟ୍ ଦାଖଲ କଲେ ଦଣ୍ଡର ବ୍ୟବସ୍ଥା ରହିଛି। ଦୋଷୀ ସାବ୍ୟସ୍ତ ହେଲେ ୨ ବର୍ଷ ପର୍ଯ୍ୟନ୍ତ ଜେଲ୍, ୧୦ ହଜାର ଟଙ୍କା ପର୍ଯ୍ୟନ୍ତ ଜରିମାନା କିମ୍ବା ଉଭୟ ଦଣ୍ଡ ହୋଇପାରେ। ଏହା ସହିତ, ‘ଭାରତୀୟ ନ୍ୟାୟ ସଂହିତା, ୨୦୨୩’ ଅନୁଯାୟୀ ଠକେଇ ସମ୍ପର୍କିତ ଆଇନଗତ କାର୍ଯ୍ୟାନୁଷ୍ଠାନ ମଧ୍ୟ ହୋଇପାରେ ।

ଆଇନର ଉଲ୍ଲଂଘନ କରି ବିବାହ ପଞ୍ଜୀକରଣ କରୁଥିବା ବ୍ୟକ୍ତିଙ୍କ ପାଇଁ ମଧ୍ୟ ଦଣ୍ଡର ବ୍ୟବସ୍ଥା ରହିଛି। ଏପରି ମାମଲାରେ ୧ ବର୍ଷ ପର୍ଯ୍ୟନ୍ତ ଜେଲ୍ କିମ୍ବା ୫୦ ହଜାର ଟଙ୍କା ପର୍ଯ୍ୟନ୍ତ ଜରିମାନା, କିମ୍ବା ଉଭୟ ହୋଇପାରେ।