Ram Mandir donation management: ଅଯୋଧ୍ୟ ସ୍ଥିତ ରାମ ମନ୍ଦିରରେ କଥିତ ଦାନ ଚୋରି ମାମଲା ଏବେ ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଛି। ଏହି ମାମଲାର ଯାଞ୍ଚ ସ୍ୱତନ୍ତ୍ର ତଦନ୍ତ ଦଳ (SIT) ପକ୍ଷରୁ କରାଯାଉଛି। ରାମ ମନ୍ଦିର ଟ୍ରଷ୍ଟ ଅଡିଟ୍ ବିଭାଗ ଠାରୁ ଆରମ୍ଭ କରି ଷ୍ଟେଟ ବ୍ୟାଙ୍କ ଶାଖା କର୍ମଚାରୀଙ୍କ ପର୍ଯ୍ୟନ୍ତ ସମସ୍ତଙ୍କୁ ଜେରା କରୁଛି ଏସଆଇଟି। ଏହି ମାମଲାରେ SIT ୧୧ ଜଣଙ୍କୁ ଜେରା କରୁଛି। ଯେଉଁମାନଙ୍କ ମଧ୍ୟରୁ ଅନେକଙ୍କ ପାଖରେ ଯଥେଷ୍ଟ ସମ୍ପତ୍ତି ରହିଥିବାର ଜଣାପଡିଛି। ଏହା ବ୍ୟତୀତ ମନ୍ଦିରକୁ ବିଭିନ୍ନ ଉତ୍ସରୁ ଆସୁଥିବା ଦାନର ମଧ୍ୟ ତଦନ୍ତ କରାଯାଉଛି।

ବିଭିନ୍ନ ସୂତ୍ରରୁ ରାମ ମନ୍ଦିରକୁ ମିଳିଥାଏ ଦାନ?
ଅଯୋଧ୍ୟା ରାମ ମନ୍ଦିରକୁ ବିଭିନ୍ନ ଉତ୍ସରୁ ମିଳିଥାଏ ଦାନ। ପ୍ରବେଶ ଦ୍ୱାର, ଭଗବାନଙ୍କ ସମ୍ମୁଖ ଏବଂ ମନ୍ଦିରର ପ୍ରସ୍ଥାନ ଦ୍ୱାରରେ ୪ ଡର୍ଜନରୁ ଅଧିକ ଦାନ ବାକ୍ସ ରଖାଯାଇଛି। ମନ୍ଦିରକୁ ଆସୁଥିବା ଲୋକେ ସେମାନଙ୍କ ସୁବିଧା ଅନୁସାରେ ଦାନ କରିଥାନ୍ତି। ଦାନ ବାକ୍ସ ମାଧ୍ୟମରେ ଦାନ କରୁନଥିବା କିଛି ଲୋକ ରାମ ମନ୍ଦିର ଟ୍ରଷ୍ଟ କାର୍ଯ୍ୟାଳୟରେ ଦାନ କରିଥାନ୍ତି ଏବଂ ସେମାନେ ଏହାର ଏକ ରସିଦ ନେଇଥାନ୍ତି। ଅନ୍ୟମାନେ ଦାନ ବାକ୍ସ ମାଧ୍ୟମରେ ବେନାମୀ ଦାନ ପ୍ରଦାନ କରିଥାନ୍ତି। ବେନାମୀ ଦାନ ମାଧ୍ୟମରେ ପ୍ରାପ୍ତ ଟଙ୍କା, ପ୍ରାୟତଃ ସୁନା ଏବଂ ରୂପା ଆକାରରେ ଆସିଥାଏ। ଏହାକୁ ସମସ୍ତ ଦାନ ବାକ୍ସରୁ ସଂଗ୍ରହ କରାଯାଇ ଗୋଟିଏ ସ୍ଥାନରେ ଏକାଠି କରାଯାଏ। ଦାନରେ ମିଳିଥିବା ଟଙ୍କାକୁ ଏକ ବଡ଼ ହଲ୍ ମଧ୍ୟରେ ରଖି ଗଣନା କରାଯାଏ।

ଏହା ସହ ପଢନ୍ତୁ: ଅଯୋଧ୍ୟା ରାମ ମନ୍ଦିରକୁ ମିଳେ କେତେ ଦାନ? ଟ୍ରଷ୍ଟ ସଚିବ କହିଲେ ପରିମାଣ

ଗଣାଯାଇ ସାରିଛି ୫ ହଜାର କୋଟିରୁ ଅଧିକ ଦାନ ରାଶି
ରାମ ମନ୍ଦିରକୁ ମିଳୁଥିବା ଦାନ ଦର୍ଶନ ପାଇଁ ଆସୁଥିବା ଭକ୍ତଙ୍କ ସଂଖ୍ୟା ଉପରେ ନିର୍ଭର କରିଥାଏ। କେତେବେଳେ ଦାନ ପରିମାଣ ଅନେକ ଲକ୍ଷ ଟଙ୍କା ପର୍ଯ୍ୟନ୍ତ ପହଞ୍ଚିପାରେ। ବେଳେ ବେଳେ ଏହାର ପରିମାଣ ୨-୩ ଲକ୍ଷ ଟଙ୍କା ମଧ୍ୟରେ ସୀମିତ ରହିପାରେ। ଭାରତୀୟ ଷ୍ଟେଟ୍ ବ୍ୟାଙ୍କ (ଏସବିଆଇ) ଦ୍ୱାରା ନିଯୁକ୍ତ ଏକ ସଂସ୍ଥା ଏବଂ ଟ୍ରଷ୍ଟ ସହ ଜଡ଼ିତ କିଛି ବିଶ୍ୱସ୍ତ କର୍ମଚାରୀଙ୍କ ତତ୍ତ୍ୱାବଧାନରେ ଦାନ ଟଙ୍କା ଗଣନା କରାଯାଏ। ଏହା ପରେ ପ୍ରତିଦିନ ସ୍ଥାନୀୟ ଏସବିଆଇ ଶାଖାରେ ଦାନ ଟଙ୍କା ପରିମାଣକୁ ଜମା କରାଯାଇଥାଏ। ଏହି କାର୍ଯ୍ୟରେ ପ୍ରାୟ ଦୁଇ ଡର୍ଜନ ଲୋକ ନିୟୋଜିତ ହୋଇଥାନ୍ତି। ଟ୍ରଷ୍ଟ ସମୟ ସମୟରେ ଏହାର ଦାନ ଟଙ୍କା ପରିମାଣର ହିସାବ କିତାବ କରିଥାଏ। ରାମ ମନ୍ଦିରକୁ ଏପର୍ଯ୍ୟନ୍ତ ୫ ହଜାର କୋଟି ଟଙ୍କାର ଦାନ ଗ୍ରହଣ କରିସାରିଛି ଟ୍ରଷ୍ଟ। ପୂର୍ବରୁ ଏକ ସାମ୍ବାଦିକ ସମ୍ମିଳନୀରେ, ରାମ ମନ୍ଦିର ଟ୍ରଷ୍ଟ ସାଧାରଣ ସମ୍ପାଦକ ଚମ୍ପତ ରାୟ କହିଥିଲେ ଯେ ମନ୍ଦିର ନିର୍ମାଣରେ ପ୍ରାୟ ୧୦୦୦ କୋଟି ଟଙ୍କା ଖର୍ଚ୍ଚ ହୋଇଛି ଏବଂ ଅବଶିଷ୍ଟ ପାଣ୍ଠି ବ୍ୟାଙ୍କ ଖାତାରେ ଜମା କରାଯାଇଛି।

ମନ୍ଦିରକୁ ମିଳୁଥିବା ଦାନର କିଏ ରଖନ୍ତି ହିସାବ?
ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ, ରାମ ମନ୍ଦିରକୁ ମିଳୁଥିବ ଦାନର ହିସାବ ରଖିଥାନ୍ତି। ଏହା ଭାରତ ସରକାରଙ୍କ ଦ୍ୱାରା ପ୍ରତିଷ୍ଠିତ ଏକ ସ୍ୱାଧିନ ଟ୍ରଷ୍ଟ। ଏହା ମନ୍ଦିରର ଦାନ, ବିସ୍ତୃତ ଖର୍ଚ୍ଚ ଏବଂ ଆର୍ଥିକ ପରିଚାଳନା ପାଇଁ ଉତ୍ତରଦାୟୀ ରହିଥାଏ। ଚମ୍ପତ ରାୟ ହେଉଛନ୍ତି ଟ୍ରଷ୍ଟ ସାଧାରଣ ସମ୍ପାଦକ। ଏହାର ଏକ ଆକାଉଣ୍ଟ ବିଭାଗ ମଧ୍ୟ ରହିଛି। ଯାହା ଆୟ ଏବଂ ଖର୍ଚ୍ଚର ସମ୍ପୂର୍ଣ୍ଣ ହିସାବ ରଖିଥାଏ। ସମସ୍ତ ଦାନ ଟ୍ରଷ୍ଟ ଦ୍ୱାରା ଅନୁମୋଦିତ ବ୍ୟାଙ୍କ ଖାତାରେ ଜମା ହୋଇଥାଏ।