Taxi Driver Affair / କାରରେ ବସି ସବୁ ଶୁଣୁଥିଲେ ସ୍ଵାମୀ; ଟ୍ୟାକ୍ସି ଡ୍ରାଇଭରଙ୍କ ପ୍ରେମରେ ପଡିଲେ ବ୍ୟାଙ୍କ ମ୍ୟାନେଜରଙ୍କ ସ୍ତ୍ରୀ

ରାଜସ୍ଥାନର ଅଲବରର ଏହି କାହାଣୀ କୌଣସି ଫିଲ୍ମ ସ୍କ୍ରିପ୍ଟଠାରୁ କମ ନୁହେଁ । ସବୁଦିନ ଟ୍ୟାକ୍ସିରେ କିଛି ସମୟର ଯାତ୍ରା, ଡ୍ରାଇଭରଙ୍କ ସହ କଥାବାର୍ତ୍ତା, ପୁଣି ପ୍ରେମ । ଏବେ ଶେଷରେ ଡ୍ରାଇଭର ଓ ମହିଳା ଗିରଫ ହୋଇଛନ୍ତି । ଗିରଫ ମହିଳା ଜଣକ ହେଉଛନ୍ତି ଅର୍ଚ୍ଚନା ଅରୋରା, ଯିଏକି ବ୍ୟାଙ୍କ ମ୍ୟାନେଜର କର୍ଣ୍ଣବ ଖତ୍ରୀଙ୍କ ପତ୍ନୀ । କର୍ଣ୍ଣବ ଜୟପୁରରେ ଚାକିରି କରିଥିଲେ ଓ ଏଥିଲାଗି ଅର୍ଚ୍ଚନାଙ୍କ ଜୟପୁରକୁ ଯିବା ଆସିବା ଲାଗି ରହୁଥିଲା । ହେଲେ ଶେଷରେ ଟ୍ୟାକ୍ସି ଡ୍ରାଇଭରଙ୍କ ପ୍ରେମରେ ପଡ଼ିଲେ ଅର୍ଚ୍ଚନା ।

• କେମିତି ପ୍ରେମରେ ପଡ଼ିଲେ ଅର୍ଚ୍ଚନା ?

ଅର୍ଚ୍ଚନା ଜୟପୁର ଯିବା ସମୟରେ ଥରେ ତାଙ୍କର ଭେଟ ଟ୍ୟାକ୍ସି ଡ୍ରାଇଭର ଋଷଭ ଶର୍ମାଙ୍କ ସହ ହୋଇଥିଲା । ପ୍ରଥମରୁ ଜୟପୁର କେତେ ବାଟ, କେତେ ସମୟ ଲାଗିବ ଭଳି କଥାବାର୍ତ୍ତା ହେଉଥିଲା । ହେଲେ ଧିରେ ଧିରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା । ଏହାପରେ ଉଭୟ ପରସ୍ପରକୁ ଫୋନ ନମ୍ବର ଦେଇଥିଲେ । ଦୁହେଁ ପ୍ରତିଦିନ କଥା ହେବାକୁ ଲାଗିଥିଲେ । ମାତ୍ର ଏ ସମ୍ପର୍କରେ ସ୍ଵାମୀ କର୍ଣ୍ଣବ ଅଜ୍ଞ ଥିଲେ ।

• କାରରେ ବସି ସବୁ ଶୁଣିଥିଲେ କର୍ଣ୍ଣବ

ଦିନେ କର୍ଣ୍ଣବ ଜୟପୁରରୁ ଅଲବର ଫେରୁଥିଲେ । କିନ୍ତୁ ସଂଯୋଗବଶତଃ କର୍ଣ୍ଣବ ଋଷଭଙ୍କ ଗାଡ଼ିରେ ଫେରୁଥିଲେ । କର୍ଣ୍ଣବ ପଛ ସିଟରେ ବସିଥିଲେ ଓ କିଛି ସମୟ ପରେ ଶୋଇପଡ଼ିଥିଲେ । ଋଷଭଙ୍କୁ ଲାଗିଥିଲା ଯେ କର୍ଣ୍ଣବ ପୁରା ଗଭୀର ନିଦରେ ଅଛନ୍ତି ଓ ସେ ତୁରନ୍ତ ଅର୍ଚ୍ଚନାଙ୍କୁ କଲ୍ କରିଥିଲା । ଏହି ସମୟରେ ଋଷଭ ଅର୍ଚ୍ଚନାଙ୍କୁ କହିଥିଲେ ଯେ ତାଙ୍କ ସ୍ଵାମୀ ଗାଡ଼ିରେ ଅଛନ୍ତି ଓ ସେ ଯଦି କହିବେ ଏବେ କର୍ଣ୍ଣବଙ୍କୁ ରାସ୍ତାରୁ ହଟେଇଦେବେ । ଏତିକିରେ କର୍ଣ୍ଣବ ନିଦରୁ ଉଠି ଯାଇଥିଲେ ଓ ପୁରା ବାର୍ତ୍ତାଳାପକୁ ନିଜ ମୋବାଇଲରେ ରେକର୍ଡ କରିଥିଲେ ।

ପଢନ୍ତୁ ଏହି ଖବର: ସମସ୍ତଙ୍କୁ ଚମକାଇଦେଲେ ୮୯ ବର୍ଷୀୟ ବୃଦ୍ଧା; ୨୭ ମହଲାରୁ ତଳକୁ ଓହ୍ଲାଇଲେ

ଘରେ ପହଞ୍ଚିବା ପରେ କର୍ଣ୍ଣବ ଅର୍ଚ୍ଚନାଙ୍କୁ ଏ ସମ୍ପର୍କରେ ପଚାରିଥିଲେ । ଏହାପରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଅର୍ଚ୍ଚନା ଛାଡ଼ପତ୍ର ଦେବା କଥା କହିବା ସହ କର୍ଣ୍ଣବଙ୍କୁ ୫୦ ଲକ୍ଷ ଟଙ୍କା ଦାବି କରିଥିଲେ । କର୍ଣ୍ଣବ ଏହାକୁ ଅଗ୍ରାହ କରିଥିଲେ । ଉଭୟଙ୍କ ସମ୍ପର୍କରେ ତିକ୍ତତା ଆସିବା ପରେ ଦିନେ ଅର୍ଚ୍ଚନା ଘର ଛାଡ଼ି ଚାଲିଯିବା ସହ ସାଥୀରେ କିଛି ନଗଦ ଟଙ୍କା ଓ ସୁନା ଗହଣା ନେଇ ଫେରାର ହୋଇଥିଲେ ।

ଗତ ମାର୍ଚ୍ଚ ମାସରେ କର୍ଣ୍ଣବ ଏ ନେଇ ପୋଲିସ ଷ୍ଟେସନରେ ଅଭିଯୋଗ କରିଥିଲେ । ଏହାପରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ପ୍ରାୟ ୧ ମାସ ପରେ ଅର୍ଚ୍ଚନା ଓ ଋଷଭ ଦୁହେଁ ଅଲବର ଏସପିଙ୍କ ଅଫିସରେ ପହଞ୍ଚିଥିଲେ ଓ ଏହାପରେ ପୋଲିସ ସେମାନଙ୍କୁ ଗିରଫ କରିଥିଲା । ଏବେ ଉଭୟ ଜେଲରେ ଥିବାବେଳେ ପୋଲିସ ପଚରା ଉଚରା ଜାରି ରଖିଛି । ଘଟଣାକୁ ବିଭିନ୍ନ ଦିଗରୁ ତଦନ୍ତ କରାଯାଉଥିବା ପୋଲିସ କହିଛି ।