Viral Story / ସମସ୍ତଙ୍କୁ ଚମକାଇଦେଲେ ୮୯ ବର୍ଷୀୟ ବୃଦ୍ଧା; ୨୭ ମହଲାରୁ ତଳକୁ ଓହ୍ଲାଇଲେ

ଆପାର୍ଟମେଣ୍ଟରେ ତାଲା ପଡ଼ିବା ପରେ ୨୭ ମହଲା କୋଠା ତଳକୁ ଓହ୍ଲାଇଲେ ୮୯ ବର୍ଷୀୟ ମହିଳା । ବୃଦ୍ଧା ଜଣଙ୍କୁ କୌଣସି ଶାରୀରିକ ଆଘାତ ଲାଗିନାହିଁ । ଚୀନ ରାଜଧାନୀ ବେଜିଂରେ ଏହି ଘଟଣା ଘଟିଥିବାବେଳେ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ବୃଦ୍ଧା ଜଣକ ଭୁଲବଶତଃ ନିଜ ଆପାର୍ଟମେଣ୍ଟ ଭିତରେ ନିଜକୁ ବନ୍ଦ କରି ଦେବା ପରେ ଏପରି ସାହାସ କରିଥିବା ଜଣାପଡ଼ିଛି ।

• କଣ ପୂରା ଘଟଣା ?

ଘଟଣାଟି ଏପ୍ରିଲ ୧ ତାରିଖ ଅପରାହ୍ନରେ ଘଟିଥିଲା, ଯେତେବେଳେ ଏହି ବୃଦ୍ଧା ଜଣକ ଏକ ଆବାସିକ କୋଠାର ୨୬ତମ ମହଲା ବାହାରେ ଫସି ରହିଥିବାର ଦେଖିବାକୁ ମିଳିଥିଲା । ତଳେ ଥିବା ଜଣେ ସଫେଇ କର୍ମଚାରୀ ଏବଂ ଜଣେ ସୁରକ୍ଷା କର୍ମୀ ସାମାନ୍ୟ ଶବ୍ଦ ଶୁଣି ଉପରକୁ ଚାହିଁ ଦେଖିଲେ ଯେ ସେ କୋଠାର ବାହାର ଭାଗରେ ଥିବା ଏୟାର କଣ୍ଡିସନର ରେଲିଂକୁ ଧରି ରହିଛନ୍ତି । ଏହାପରେ ସେମାନେ ତୁରନ୍ତ ପୋଲିସକୁ ଖବର ଦେଇଥିଲେ ଏବଂ ମହିଳାଙ୍କୁ ସେଠାରେ ରହି ସାହାଯ୍ୟ ପାଇଁ ଅପେକ୍ଷା କରିବାକୁ ଅନୁରୋଧ କରିଥିଲେ ।

• ୨୭ ମହଲାରୁ ଓହ୍ଲାଇଲେ ବୃଦ୍ଧା

ବୃଦ୍ଧା ଜଣକୁ ଏପରି ବିପଦପୂର୍ଣ୍ଣ ଭାବରେ ତଳକୁ ଓହ୍ଲାଇବାକୁ ବାରଣ କରାଯାଇଥିଲେ ସୁଦ୍ଧା ଅଗ୍ନିଶମ କର୍ମଚାରୀମାନେ ଉପରେ ପହଞ୍ଚିବା ପୂର୍ବରୁ ସେ ତଳକୁ ଓହ୍ଲାଇ ଚାଲିଥିଲେ । ଏହାପରେ କ୍ଳାନ୍ତ ହୋଇ ସେ ଶେଷରେ ୨୧ତମ ମହଲାରେ ଅଟକିଥିଲେ । ସଂକୀର୍ଣ୍ଣ ରେଲିଂରେ ଚଢ଼ିବା ବିପଦପୂର୍ଣ୍ଣ ଥିବାରୁ ଅଗ୍ନିଶମ କର୍ମଚାରୀମାନେ ତାଙ୍କୁ କୋଠା ଭିତରୁ ଉଦ୍ଧାର କରିବାକୁ ନିଷ୍ପତ୍ତି ନେଇଥିଲେ । ସେମାନେ ବୃଦ୍ଧାଙ୍କୁ ଏକ ରଶି ସାହାଯ୍ୟରେ ସୁରକ୍ଷିତ ଭାବେ ଉଦ୍ଧାର କରିଥିବା ଜଣାପଡ଼ିଛି।

• ନିଜକୁ ରୁମରେ ବନ୍ଦ କରିଦେଇଥିଲେ ବୃଦ୍ଧା

ତଦନ୍ତରୁ ଜଣାପଡ଼ିଛି ଯେ ବୃଦ୍ଧା ଜଣକ ୨୭ତମ ମହଲାରେ ଏକା ରହୁଥିଲେ । ସେ ଭୁଲବଶତଃ ତାଙ୍କ ଶୟନ କକ୍ଷରେ ଫସି ଯାଇଥିଲେ ଏବଂ ତାଙ୍କ ମୋବାଇଲ୍ ଫୋନ୍ ବାହାରେ ଛାଡି ଦେଇଥିଲେ । ଭୟଭୀତ ହୋଇ ସେ ଏୟାର କଣ୍ଡିସନର ରେଲିଂ ବ୍ୟବହାର କରି ତଳକୁ ଓହ୍ଲାଇବା ପାଇଁ ବିପଦପୂର୍ଣ୍ଣ ନିଷ୍ପତ୍ତି ନେଇଥିଲେ । ତେବେ ଅଗ୍ନିଶମ କର୍ମଚାରୀମାନେ ୨୧ ନମ୍ବର ମହଲାର ଏକ ଫ୍ଲାଟର ଝରକା ମଧ୍ୟରେ ଏକ ଷ୍ଟ୍ରେଚର ବ୍ୟବହାର କରି ମହିଳାଙ୍କୁ ସତର୍କତାର ସହ ଭିତରକୁ ଆଣିଥିଲେ ।

ପଢନ୍ତୁ ଏହି ଖବର: ଭାରତରେ ଅସମ୍ଭବ, କିନ୍ତୁ ଏଠାରେ ସତ ! ବିନା ଟ୍ରାଫିକ୍ ଲାଇଟରେ ଚାଲେ ଦେଶ

ବୃଦ୍ଧାଙ୍କୁ କୌଣସି ଶାରୀରିକ ଆଘାତ ପାଇ ନଥିଲେ ସୁଦ୍ଧା ଅତ୍ୟନ୍ତ କ୍ଳାନ୍ତ ଏବଂ ଭୟଭୀତ ହୋଇପଡ଼ିଥିଲେ । ଘଟଣା ସମ୍ପର୍କରେ ଜାଣିବା ପରେ ଘଟଣାସ୍ଥଳରେ ବୃଦ୍ଧାଙ୍କ ପରିବାର ଲୋକେ ପହଞ୍ଚିଥିଲେ । ସେମାନେ ଅଗ୍ନିଶମ କର୍ମଚାରୀଙ୍କ ସମୟୋଚିତ ସହାୟତା ଏବଂ ସୁରକ୍ଷିତ ଉଦ୍ଧାର ପାଇଁ ତାଙ୍କୁ କୃତଜ୍ଞତା ପ୍ରକାଶ କରିଛନ୍ତି । ତେବେ ପରିଣତ ବୟସରେ ଏପରି ବିପଦପୂର୍ଣ୍ଣ ଭାବେ ୨୭ ମହଲାରୁ ଓହ୍ଲାଇବା ଘଟଣା ଚୀନରେ ବେଶ ଚର୍ଚ୍ଚାର ବିଷୟ ପାଲଟିଛି ।