ବେଙ୍ଗାଲୁରୁ ଅବଲାହଲ୍ଲୀ ଅଞ୍ଚଳର ଏକ ସେଲୁନ ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ସେଲୁନ ମାଲିକଙ୍କୁ ଜଣେ ବ୍ୟକ୍ତି ପକେଇ ଉଠେଇ ମାଡ଼ ମାରୁଥିବା ଦେଖିବାକୁ ମିଳିଛି । ସେଲୁନ ମାଲିକ ଜଣେ ମହିଳାଙ୍କୁ ଚାକିରିରୁ ବିଦା ହେବା ପରେ ତାଙ୍କ ସ୍ଵାମୀ ସେଲୁନକୁ ଆସି ମାଲିକଙ୍କୁ ମାଡ଼ ମାରିଛନ୍ତି । ଏହି ଗଣ୍ଡଗୋଳର ପୂରା ଦୃଶ୍ୟ ସିସିଟିଭିରେ କଏଦ ହୋଇଥିବାବେଳେ ସୋସିଆଲ ମିଡିଆରେ ଭିଡିଓ ଖୁବ ଭାଇରାଲ ହେଉଛି ।

• କଣ ପୂରା ଘଟଣା ?

ଏହି ଘଟଣାଟି ଅବଲାହଲ୍ଲୀ ଅଞ୍ଚଳରେ ଘଟିଛି । ଏଠାରେ ପୂର୍ବରୁ କାମ କରୁଥିବା ଜଣେ ମହିଳା କର୍ମଚାରୀଙ୍କ ସ୍ଵାମୀ ହଠାତ୍ ସେଲୁନରେ ପଶି ହଙ୍ଗାମା କରିଥିଲେ ଓ ସେଲୁନ ମାଲିକଙ୍କୁ ମାଡ଼ ମାରିଥିଲେ । ଏଫଆଇଆର ଅନୁସାରେ ଏହି ଘଟଣା ସନ୍ଧ୍ୟା ୫.୪୦ଟାରେ ବୁଦିଗେରେ କ୍ରସ୍ ନିକଟ 'ସ୍କିନ୍ ଶାଇନ୍ ୟୁନିସେକ୍ସ ସେଲୋନ'ରେ ଘଟିଛି । ଅଭିଯୁକ୍ତ ଜଣକ ହେଉଛନ୍ତି ସେଲୁନରେ କାମ କରୁଥିବା ପୂର୍ବ କର୍ମଚାରୀ ସୁଷମାଙ୍କ ସ୍ଵାମୀ । ଅଭିଯୋଗ ଅନୁସାରେ ସେ ତାର ୪-୫ଜଣ ସହଯୋଗୀଙ୍କ ସହ ସେଲୁନରେ ପହଞ୍ଚିଥିଲା ଓ ମାଲିକ ମୋହନ କୁମାରଙ୍କୁ ମାଡ଼ ମାରିଥିଲା । ଏହାସହିତ ଖୁବ ଜୋରରେ ଗାଳିଗୁଲଜ କରିବା ସହ ସେଲୁନ ମାଲିକଙ୍କୁ ଜୀବନରୁ ମାରିଦେବାକୁ ଧମକ ଚମକ ଦେଇଥିଲା । ଯେତେବେଳେ ସେଲୁନ ମାଲିକ ମୋହନ କୁମାରଙ୍କ ପତ୍ନୀ ଶ୍ରୀଜା ମଝିରେ ପଶି ତାଙ୍କ ସ୍ଵାମୀଙ୍କୁ ରକ୍ଷା କରିବା ସହ ବୁଝାସୁଝା କରିବାକୁ ଉଦ୍ୟମ କରିଥିଲେ, ସେତେବେଳେ ଅଭିଯୁକ୍ତ ଜଣକ ତାଙ୍କୁ ମଧ୍ୟ ମାଡ଼ ମାରିବାକୁ ପଛାଇ ନଥିଲା ।

• କାହିଁକି ଆରମ୍ଭ ହେଲା ଝଗଡ଼ା ?

ସୁଷମାଙ୍କ ପକ୍ଷରୁ ଅଭିଯୋଗ ହୋଇଛି ଯେ, ସୁଷମା ଉକ୍ତ ସେଲୁନରେ ବ୍ୟୁଟିସିଆନ ଭାବରେ କାମ କରୁଥିଲେ । ସେଲୁନ ମାଲିକ ମୋହନ କୁମାର ତାଙ୍କୁ ପ୍ରପୋଜ୍ କରିଥିଲେ । ଯେତେବେଳେ ସେ ତାଙ୍କ ପ୍ରେମ ପ୍ରସ୍ତାବ ଗ୍ରହଣ କରିନଥିଲେ, ସେତେବେଳେ ସେ ସୁଷମାଙ୍କୁ ଚାକିରିରୁ ବାହାର କରିଦେଇଥିଲେ । ଏହାପରେ ସୁଷମାଙ୍କ ସ୍ଵାମୀ ସେଲୁନରେ ପଶି ଗଣ୍ଡଗୋଳ କରିଥିବା ଜଣାପଡ଼ିଛି ।

ପଢନ୍ତୁ ଏହି ଖବର: ତେଲେଙ୍ଗାନାରେ ଟ୍ରିପଲ୍ ମର୍ଡର; ସ୍ଵିମିଂ ପୁଲରେ ବୁଡାଇ ଗର୍ଭବତୀ ସ୍ତ୍ରୀ, ଦୁଇ ଝିଅଙ୍କୁ ହତ୍ୟା

ଗଣ୍ଡଗୋଳର ପୂରା ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଛି । ପୋଲିସ ଏହି ସିସିଟିଭି ଫୁଟେଜକୁ ଜବତ କରି ତଦନ୍ତ ଆରମ୍ଭ କରିଛି । ଅବଲାହଲ୍ଲୀ ପୋଲିସ ଷ୍ଟେସନରେ ଅଭିଯୁକ୍ତ (ସୁଷମାଙ୍କ ସ୍ଵାମୀ) ବିରୋଧରେ ମାମଲା ରୁଜୁ ହୋଇଥିବାବେଳେ ବର୍ତ୍ତମାନ ଅଭିଯୁକ୍ତ ଓ ତାର ସହଯୋଗୀ ଫେରାର ଅଛନ୍ତି । ପୋଲିସ ସେମାନଙ୍କୁ ଖୋଜିବା ଲାଗି ଚାରିଆଡେ ପଇଁତରା ମାରୁଛି । ତେବେ ବାସ୍ତବରେ କେଉଁ ଘଟଣା ଯୋଗୁଁ ଗଣ୍ଡଗୋଳ ହୋଇଛି ସେ ନେଇ ପୋଲିସ ତଦନ୍ତ କରୁଛି ।