Argus News - ତେଲେଙ୍ଗାନାରେ ଟ୍ରିପଲ୍ ମର୍ଡର; ସ୍ଵିମିଂ ପୁଲରେ ବୁଡାଇ ଗର୍ଭବତୀ ସ୍ତ୍ରୀ, ଦୁଇ ଝିଅଙ୍କୁ ହତ୍ୟା

ତେଲେଙ୍ଗାନାରେ ଗର୍ଭବତୀ ପତ୍ନୀ ଓ ଦୁଇ ଝିଅଙ୍କ ହତ୍ୟା ଘଟଣାରେ ଏବେ ନୂଆ ଖୁଲାସା ହୋଇଛି । ତିନି ଜଣଙ୍କ ମୃତ୍ୟୁକୁ ଏକ ଦୁର୍ଘଟଣା ବୋଲି କହୁଥିବା ସ୍ଵାମୀର ଅସଲି ଚେହେରା ପଦାକୁ ଆସିଛି । ପୋଲିସ ତଦନ୍ତରୁ ଜଣାପଡ଼ିଛି ଯେ ସ୍ଵାମୀ ହିଁ ନିଜ ସ୍ତ୍ରୀ ଓ ଝିଅଙ୍କୁ ହତ୍ୟା କରିଛି । ଏହାର କାରଣ ଜାଣିଲେ ସଭିଙ୍କ ହୋସ୍ ଉଡ଼ିଛି । ପୁତ୍ର ସନ୍ତାନ ନଥିବାରୁ ନାରାଜ ଥିବା ସ୍ଵାମୀ ନିଜ ଗର୍ଭବତୀ ସ୍ତ୍ରୀ ଓ ଦୁଇ ଝିଅଙ୍କୁ ସ୍ଵିମିଂ ପୁଲରେ ଫିଙ୍ଗି ହତ୍ୟା କରିଛି ।

• କେମିତି ଜାଣିଲା ପୋଲିସ ?

ତେଲେଙ୍ଗାନା ପୋଲିସ ଏହି ହତ୍ୟାକାଣ୍ଡର ଯାଞ୍ଚ ସମୟରେ ସ୍ଵାମୀଙ୍କୁ ଖୋଳିତୋଡ଼ି ପଚରାଉଚରା କରୁଥିଲା । ଏହି ସମୟରେ ଜଣାପଡ଼ିଥିଲା ସ୍ଵାମୀ ଅଜହରୁଦ୍ଦିନ ହିଁ ହତ୍ୟାକାରୀ । ସେ ପୂର୍ବ ଯୋଜନା ମୁତାବକ ନିଜ ପରିବାରକୁ ନିଜ ହାତରେ ବିନାଶ କରିଛି । ହତ୍ୟାକାଣ୍ଡ ଦିନ ଅଜହରୁଦ୍ଦିନ ନିଜ ପରିବାରକୁ ପୁନ୍ନୌଲ ଗାଁ ନିକଟ ସ୍ଵିମିଂ ପୁଲ୍ ନିକଟକୁ ନେଇଥିଲା । ପ୍ରାରମ୍ଭରୁ ପୋଲିସକୁ ଚକମା ଦେବା ଲାଗି ଏହାକୁ ଏକ ଦୁର୍ଘଟଣା ବୋଲି କହିଥିଲା ଅଭିଯୁକ୍ତ ଏବଂ ତାର ପରିବାର ଭୁଲବଶତଃ ବୁଡ଼ିଯାଇଥିବା କହିଥିଲା ।

ପଢନ୍ତୁ ଏହି ଖବର: ଲକ୍ଷ୍ନୌରେ ବିସ୍ଫୋରଣ ପାଇଁ କରିଥିଲେ ଷଡ଼ଯନ୍ତ୍ର; ୪ ଆତଙ୍କୀଙ୍କୁ ଧରିଲା ATS

ଯେତେବେଳେ ପୋଲିସ ଯାଞ୍ଚ କରିଥିଲା ସେତେବେଳେ ଜାଣିବାକୁ ପାଇଥିଲା ଯେ ହତ୍ୟାକାଣ୍ଡର ଠିକ୍ ପୂର୍ବରୁ ପାଖରେ ଥିବା ସିସିଟିଭିକୁ ଅଚଳ କରିଦିଆଯାଇଥିଲା । ପଚରାଉଚରା ସମୟରେ ଅଜହରୁଦ୍ଦିନ ବୟାନରେ ବି ଅସନ୍ତୋଷ ସ୍ପଷ୍ଟ ବାରି ହେଉଥିଲା, ଯାହା ଫଳରେ ପୋଲିସର ସନ୍ଦେହ ସଠିକ୍ ବାହାରିଥିଲା । ପୋଲିସ ହତ୍ୟା ମାମଲା ରୁଜୁ କରି ଫେରାର ଥିବା ଅଜହରୁଦ୍ଦିନକୁ ଗିରଫ କରିବା ପାଇଁ ଏକ ସ୍ଵତନ୍ତ୍ର ଟିମ୍ ଗଠନ କରିଛି ।

• ଏଥିପାଇଁ ରଚିଥିଲା ଷଡ଼ଯନ୍ତ୍ର

ଅଜହରୁଦ୍ଦିନ ଓ ଫରହତ ପ୍ରେମ ବିବାହ କରିଥିଲେ । ଉଭୟଙ୍କର ଦୁଇଟି ଝିଅ ଉମେରା (୮) ଏବଂ ଆୟଶା (୬) ଥିଲେ । ଫରହତ ତୃତୀୟ ଥର ପାଇଁ ଗର୍ଭବତୀ ହୋଇଥିଲେ । ଯେତେବେଳେ ଅଜହରୁଦ୍ଦିନ ଜାଣିବାକୁ ପାଇଥିଲା ଯେ ଏଥର ବି କନ୍ୟା ସନ୍ତାନ ଜନ୍ମ ନେବ, ସେତେବେଳେ ସେ ପତ୍ନୀଙ୍କୁ ଗର୍ଭପାତ କରିବାକୁ ବାଧ୍ୟ କରିଥିଲେ । ଯେତେବେଳେ ଫରହତ ଗର୍ଭପାତ କରିବେନି ବୋଲି ମନା କରିଥିଲେ, ସେତେବେଳେ ଅଭିଯୁକ୍ତ ଏହି ଷଡ଼ଯନ୍ତ୍ର କରିଥିଲା ।

ବର୍ତ୍ତମାନ ମହିଳା ପୁରୁଷଙ୍କଠାରୁ କୌଣସି ଗୁଣରେ କମ ନୁହେଁ । ଦେଶର ବିଭିନ୍ନ କ୍ଷେତ୍ରରେ ମହିଳା ନିଜର ଦକ୍ଷତାକୁ ପ୍ରମାଣିତ କରିଛନ୍ତି । ଏପରିକି ଆମ ଦେଶର ରାଷ୍ଟ୍ରପତି ମଧ୍ୟ ମହିଳା ହୋଇସାରିଛନ୍ତି । ଏହାପରେ ମଧ୍ୟ ଭାରତୀୟଙ୍କ ମନରେ ଏପରି ମନୋଭାବକୁ ସାରା ଅଞ୍ଚଳରେ ନିନ୍ଦା କରାଯାଇଛି । ଅଭିଯୁକ୍ତକୁ କଠୋର ସଜ୍ଜା ଦେବାକୁ ସାଧାରଣରେ ଦାବି ହୋଇଛି ।