Bengaluru Murder / ପ୍ରଥମେ ପତ୍ନୀ..ପରେ ଟାର୍ଗେଟ୍‌ରେ ଶାଶୂଘର, ଜ୍ଵାଇଁର କ୍ରୋଧରେ ଛାରଖାର ପରିବାର

ବେଙ୍ଗାଲୁରୁ: ସମ୍ପର୍କରେ ଥିଲା ତିକ୍ତତା... ମନରେ ଥିଲା ପ୍ରତିଶୋଧର ନିଆଁ... ଆଉ ସେହି ନିଆଁରେ ଜଳିଗଲା ୭ଟି ନିରୀହ ଜୀବନ । ସ୍ତ୍ରୀଙ୍କ ସହ ପାରିବାରିକ କଳହରୁ ବେଙ୍ଗାଲୁରୁରେ ଜଘନ୍ୟ କାଣ୍ଡ ଘଟାଇଛି ଜଣେ କ୍ୟାବ୍ ଡ୍ରାଇଭର । ନିଜ ପତ୍ନୀଙ୍କ ସମେତ ଶାଶୂଘରର ୬ ଜଣଙ୍କୁ ହତ୍ୟା କରିବା ପରେ ପ୍ରମାଣ ନଷ୍ଟ କରିବାକୁ ରଚିଥିଲା ଭୟଙ୍କର ଷଡ଼ଯନ୍ତ୍ର । ହେଲେ ଗୋଟିଏ ନିଖୋଜ ଅଭିଯୋଗ ଖୋଲିଦେଲା ଏହି ୭ ହତ୍ୟାର ରହସ୍ୟ ।

• ଶିଳପୁଆରେ ରକ୍ତରଞ୍ଜିତ ହେଲା ସମ୍ପର୍କ

ବେଙ୍ଗାଲୁରୁର ଏହି ଘର ଥିଲା କ୍ୟାବ୍ ଡ୍ରାଇଭର ଇନ୍ଦୁଶେଖର ଏବଂ ପତ୍ନୀ ସୁନିତାଙ୍କ ହସଖୁସି ସଂସାରର ଠିକଣା । ହେଲେ ଏଇଠି ହିଁ ଲେଖାହେଲା ମୃତ୍ୟୁର କାହାଣୀ । ବିବାହକୁ ୨୦ ବର୍ଷ ବିତିଥିଲେ ବି ସ୍ୱାମୀ-ସ୍ତ୍ରୀଙ୍କ ମଧ୍ୟରେ ନଥିଲା ଶାନ୍ତି । ପୋଲିସର ସୂଚନା ଅନୁସାରେ, ପତ୍ନୀଙ୍କ ପରିବାରର ହସ୍ତକ୍ଷେପକୁ ନେଇ ଇନ୍ଦୁଶେଖର ଅସନ୍ତୁଷ୍ଟ ଥିଲା । ଆଉ ଏହି ଅସନ୍ତୋଷ ଧୀରେ ଧୀରେ ନେଇଥିଲା ଭୟଙ୍କର କାଳ ରୂପ । ପ୍ରଥମେ ନିଜ ପତ୍ନୀ ସୁନିତା ଏବଂ ପରେ ଶାଶୂଘରର ଅନ୍ୟ ୬ ସଦସ୍ୟ ( ଶାଶୂ, ୨ଜଣ ଶାଳୀ, ୨ଜଣ ଶାଳକ ଓ ଜଣେ ପୁତୁରା)ଙ୍କୁ ଘରକୁ ଡାକି ଶିଳପୁଆରେ ଆକ୍ରମଣ କରି ହତ୍ୟା କରିଥିଲା । ଏପରିକି ଜଣେ ୭ ବର୍ଷର ନାବାଳକ ମଧ୍ୟ ଏହି ବର୍ବରତାରୁ ରକ୍ଷା ପାଇନଥିଲା ।

• ହତ୍ୟା ଘଟଣା ଲୁଚାଇବାକୁ ଉଦ୍ୟମ

ହତ୍ୟା ପରେ ଆରମ୍ଭ ହୋଇଥିଲା ଅପରାଧର ଦ୍ୱିତୀୟ ଅଧ୍ୟାୟ । ଯେଉଁ ଘରେ ରକ୍ତର ଛିଟା ପଡ଼ିଥିଲା, ସେହି ଦାଗକୁ ଲିଭାଇବା ପାଇଁ କେମିକାଲ୍‌ରେ ଘରକୁ ସଫା କରିଥିଲା ଇନ୍ଦୁଶେଖର । ସେପଟେ ଘରର ଚାରିକାନ୍ଥ ଭିତରେ ହତ୍ୟା ପରେ ମୃତଦେହ ଗାଏବ୍ କରିବାକୁ ନୂଆ ଯୋଜନା କରିଥିଲା । ନିଜ କାର୍‌ରେ ମୃତଦେହଗୁଡ଼ିକୁ ବୋହି ନେଇ ବେଙ୍ଗାଲୁରୁରୁ ନନ୍ଦି ହିଲ୍ସ, ଚିକ୍‌ବଲ୍ଲାପୁରର ବିଭିନ୍ନ ସ୍ଥାନରେ ମୃତଦେହଗୁଡ଼ିକୁ ଫିଙ୍ଗିଦେଇଥିଲା ।

ପଢନ୍ତୁ ଏହି ଖବର: ଶାଶୂ-ଜ୍ୱାଇଁ ପ୍ରେମ କାହାଣୀ... ସ୍ୱାମୀଙ୍କୁ ଛାଡ଼ି ସୁନା ଗହଣା ନେଇ ଜ୍ୱାଇଁଙ୍କ ସହ ପଳାଇଗଲେ ଶାଶୂ !

• ଏମିତି ଧରାପଡ଼ିଲା ହତ୍ୟାକାରୀ ଜ୍ଵାଇଁ

ଭାବିଥିଲା ପାହାଡ଼ ଢାଙ୍କିଦେବ ଏ ପୂରା ଅପରାଧର ଚିହ୍ନ, କିନ୍ତୁ ଗୋଟିଏ ନିଖୋଜ ରିପୋର୍ଟ ଖୋଲିଦେଲା ପୂରା ମର୍ଡର ମିଷ୍ଟ୍ରି । ଇନ୍ଦୁଶେଖରଙ୍କ ଜଣେ ଶାଳକର ସ୍ତ୍ରୀଙ୍କ ମା' ଶ୍ରୀରାମପୁର ଥାନାରେ ନିଖୋଜ ରିପୋର୍ଟ ଦାଖଲ କରିଥିଲେ । ଆଉ କଲ୍ ରେକର୍ଡ ଓ ଅନ୍ୟାନ୍ୟ ପ୍ରମାଣର ଲିଙ୍କ୍ ଯୋଡ଼ି ଶେଷରେ ତଦନ୍ତକାରୀ ଟିମ୍ ଇନ୍ଦୁଶେଖରଙ୍କ ନିକଟରେ ପହଞ୍ଚିଲା । ଯେଉଁ ସମ୍ପର୍କକୁ ନେଇ ଆରମ୍ଭ ହୋଇଥିଲା କଳହ, ସେହି ସମ୍ପର୍କର ରକ୍ତରେ ଶେଷ ହେଲା ଗୋଟିଏ ପରିବାରର କାହାଣୀ । ଯେଉଁଠି ସମ୍ପର୍କର ମୂଲ୍ୟ ହେବା କଥା `ଜୀବନ', ସେଠି ଖୋଦ୍ ସମ୍ପର୍କ ହିଁ ପାଲଟିଗଲା ମୃତ୍ୟୁର କାରଣ ।