Odia Woman Murder in Bengaluru / ୧୫ ବର୍ଷ ହେଲା ବେଙ୍ଗାଲୁରୁରେ ଖାଲି ପଡ଼ିଥିଲା ପ୍ଲଟ୍; ଶାଢ଼ିର ଟ୍ୟାଗ୍ ଖୋଲିଲା ଓଡ଼ିଆ ମହିଳାଙ୍କୁ ହତ୍ୟାର ଗୁମର

ବେଙ୍ଗାଲୁରୁ: ଗଛଲତାରେ ଭର୍ତ୍ତି ପଡ଼ିଆ । ମଣିଷ ତ ଛାଡ଼ନ୍ତୁ ଭିତରକୁ ପଶୁ ବି ପଶିବେନି । ଆବର୍ଜନାରେ ଭର୍ତ୍ତି ୧୫ ବର୍ଷ ଧରି ସେମିତି ଖାଲି ପଡ଼ିଥିବା କର୍ଣ୍ଣାଟକ ବେଙ୍ଗାଲୁରୁର ଏକ ପ୍ଲଟ୍‌ରୁ ମିଳିଛି ଓଡ଼ିଆ ମହିଳାଙ୍କ ଗଳିତ ମୃତଦେହ । ଯେଉଁ ଘଟଣା ଏବେ କର୍ଣ୍ଣାଟକରୁ ନଇ ଓଡ଼ିଶା ପର୍ଯ୍ୟନ୍ତ ହଟଚମଟ ସୃଷ୍ଟି କରିଛି ।

ସୂଚନା ଅନୁସାରେ, ବେଙ୍ଗାଲୁରୁ ଥିଋମେନହଲ୍ଲି ଅଞ୍ଚଳର ଏକ ଖୋଲା ପଡ଼ିଆରୁ ମିଳିଛି ମହିଳାଙ୍କ ଗଳିତ ମୃତଦେହ । ଯାହା ପ୍ଲଟ୍ ମାଲିକଙ୍କ ଠାରୁ ନେଇ ପୋଲିସର ମୁଣ୍ଡ ବିନ୍ଧା ବଢ଼ାଇ ଦେଇଥିବା ବେଳେ ଶାଢ଼ିରେ ଲାଗିଥିବା ଟ୍ୟାଗ୍ ଓଡ଼ିଶା ଲିଙ୍କ୍ ଦେଇଛି ।

ଏଥିସହ ପଢ଼ନ୍ତୁ: ଅନୁସୂଚିତ ଜାତିର ବ୍ୟକ୍ତିଙ୍କ ଠାରୁ ଜମି କିଣିବାକୁ ଅନୁମତି ପାଇଁ ଲାଞ୍ଚ; ₹୪୦ ହଜାର ଟଙ୍କା ସହ JRAଙ୍କୁ ଧରିଲା ଭିଜିଲାନ୍ସ 

ଅଳିଆ ସଫା ବେଳେ ମିଳିଲା ମୃତଦେହ

ସ୍ଥାନୀୟ ବାସିନ୍ଦା ଗଣେଶଙ୍କ ଅନୁସାରେ, "ଉକ୍ତ ପ୍ଲଟ୍‌ଟି ବହୁତ ଦିନ ହେଲା ସଫେଇ କରାଯାଇ ନଥିବାରୁ ଗଛଲତାରେ ଭର୍ତ୍ତି ରହିଥିଲା । ପ୍ରଶାସନର ନିର୍ଦ୍ଦେଶ ପରେ ୫ରୁ ୬ ଜଣ ଶ୍ରମିକ ସଫେଇ ପାଇଁ ପହଞ୍ଚିଥିଲେ । ସଫା କରିବା ବେଳେ ଶ୍ରମିକ ଏକ ଖଟ ଦେଖିଥିଲେ ।"

ପ୍ରଥମେ ଲାଗିଥିଲା କେହି ଅବ୍ୟବହୃତ ଖଟଟି ଫିଙ୍ଗି ଦେଇଛି । କିନ୍ତୁ ଶ୍ରମିକ ଖଟଟିକୁ ହଟାଇବାକୁ ଯିବାରୁ ଗୋଡ଼ ଝୁଲୁଥିବା ଦେଖି ଥରିବାକୁ ଲାଗିଥିଲେ । ଶ୍ରମିକମାନେ ଡରି ଯାଇ ସ୍ଥାନୀୟ ଲୋକଙ୍କୁ ଡାକିଥିଲେ । ସୂଚନା ପାଇ ସମ୍ପିଗେହଲ୍ଲି ପୋଲିସ ସହ ସାଇଣ୍ଟିଫିକ୍ ଟିମ୍ ପହଞ୍ଚିଥିଲା । ଖଟ ଭିତରେ ମହିଳାଙ୍କ ଗଳିତ ମୃତଦେହ ପୋଲିସ ଉଦ୍ଧାର କରିଥିଲା ।

ମାସେ ହେଲା ପଡ଼ିଥିଲା ମୃତଦେହ

ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଥିଲା, ମୃତଦେହଟି ପ୍ରାୟ ମାସେରୁ ଅଧିକ ସମୟ ଧରି ସେଠାର ପଡ଼ି ରହିଛି । ପୋଲିସ ଯାଞ୍ଚ ବେଳେ ମୃତକଙ୍କ ନାଁ ଅନୁସୂୟା (୨୮) ଓଡ଼ିଶା ପୁରୀ ଜିଲ୍ଲାର ବାସିନ୍ଦା ବୋଲି ଜାଣିବାକୁ ପାଇଥିଲା । ଅନୁସୂୟାଙ୍କ ଶାଢ଼ିରେ ଲାଗିଥିବା ଟ୍ୟାଗ୍‌ରୁ ମୃତକଙ୍କ ପରିଚୟ ମିଳିଥିଲା । ଯାହାପରେ ପୋଲିସ ଅନୁସୂୟାଙ୍କ ପରିଚିତଙ୍କୁ ପଚରାଉଚରା ବେଳେ ଖୋଲିଥିଲା ରହସ୍ୟ ।

ପୋଲିସ ଅନୁସାରେ, ଅନୁସୂୟା ତାଙ୍କସ୍ଵାମୀ ସାଗର ଚନ୍ଦ୍ର ରାୱତଙ୍କ ସହ ବେଙ୍ଗାଲୁରୁରେ ରହୁଥିଲେ । ପ୍ରାୟ ବର୍ଷକ ତଳେ ଉଭୟ ପ୍ରେମ ବିବାହ କରିଥିଲେ । ଦୁହେଁ ଅଲଗା ଅଲଗା ହୋଟେଲରେ କାମ କରୁଥିବା ବେଳେ ସାଗର ଏକ ହୋଟେଲର କିଚେନ୍ ସୁପରଭାଇଜର ଥିଲା ।

ଟଙ୍କା ପଇସାକୁ ନେଇ କଳହରୁ ଚିପିଦେଲା ତଣ୍ଟି

ତଦନ୍ତ ବେଳେ ଜଣାପଡ଼ିଛି, ଟଙ୍କା ପଇସାକୁ ନେଇ ଦୁହିଁଙ୍କ ମଧ୍ୟରେ ବିବାଦ ଲାହି ରହିଥିଲା । ଅଗଷ୍ଟ ୧୧ ତାରିଖରେ ଟଙ୍କାକୁ ନେଇ ବିବାଦ ପରେ ସାଗର, ଅନୁସୂୟାର ତଣ୍ଟି ଚିପି ହତ୍ୟା କରିଥିବା ପୋଲିସ ସନ୍ଦେହ କରୁଛି । ହତ୍ୟା ପରେ ସାଗର ମୃତଦେହକୁ ୩ ଦିନ ଘରେ ରଖିଥିଲା । ପରେ ଶବକୁ ବେଡସିଟ୍‌ରେ ବାନ୍ଧି ଉକ୍ତ ଖାଲି ପ୍ଳଟ୍‌ରେ ଫିଙ୍ଗି ଦେଇଥିଲା ।

ଏଥିସହ ପଢ଼ନ୍ତୁ: ଠକ ବାବା ଗ୍ୟାଙ୍ଗର ପର୍ଦ୍ଦାଫାସ୍, ମହିଳାଙ୍କୁ ଭୟ ଦେଖାଇ ଲୁଟୁଥିଲେ ଟଙ୍କା ଓ ସୁନା 

ସ୍ଥାନୀୟ ବାସିନ୍ଦା ଗଣେଶଙ୍କ ଅନୁସାରେ, ମହିଳାଙ୍କ ମୃତଦେହ ବେଡ୍ ଭିତରୁ ମିଳିଛି । ମୃତଦେହକୁ ଦଉଡ଼ିରେ ବନ୍ଧା ଯାଇଥିବା ବେଳେ କିଛି ଅଂଶ କୁକୁର ଭିଡ଼ି ଖାଇ ଦେଇଥିଲେ । ପୋଲିସର ସନ୍ଦେହ ହେଉଛି, ମୃତଦେହ ପିଙ୍ଗିବା ପରେ ସାଗର କିଛିଦିନ ଉକ୍ତ ଅଞ୍ଚଳକୁ ଆସି ନଜର ରଖିଥିଲା ।

ପ୍ରଥମେ ଶବ ମିଳିବା ପରେ ପୋଲିସ ପାଇ ମୃତକଙ୍କ ପରିଚୟ ଖୋଜିବା ଆହ୍ଵାନପୂର୍ଣ୍ଣ ରହିଥିଲା । ଶାଢ଼ିର ଟ୍ୟାଗ୍ ପରିଚୟ ଖୋଜିବାରେ ସହାୟକ ହେବା ପରେ ଏବେ ପୋଲିସ ଅନୁସୂୟାଙ୍କ ସ୍ଵାମୀ ସାଗର ଚନ୍ଦ୍ର ରାୱତକୁ ଗିରଫ କରିଛି ।

ସ୍ଥାନୀୟ ଡିସିପି ଜି.କି ମିଥୁନଙ୍କ ଅନୁସାରେ, "ଉଭୟ ସାଗର ଓ ଅନୁସୂୟାଙ୍କ ଘର ପୁରୀ ଜିଲ୍ଲାର କାକଟପୁର ଅନ୍ତର୍ଗତ ଉଦୟପୁର ଗାଁରେ । ଦୁହେଁ ୨୦୨୫ ସେପ୍ଟେମ୍ବର ୯ରେ ପରିବାର ଇଚ୍ଛା ବିରୋଧରେ ଯାଇ ବିବାହ କରିବା ସହ ୬ ମାସ ହେଲା ବେଙ୍ଗାଲୁରୁରେ ରହୁଥିଲେ ।"