ବିହାର ପ୍ରଚାର ମଇଦାନରେ ଲଢେଇ ଜୋରଦାର । ନାଳନ୍ଦା, ମୁଜାଫରପୁର, ଛପ୍ରା, ଲକିସରାଇରେ ମହାମେଣ୍ଟ ବିରୋଧରେ ଗର୍ଜନ କରିଛନ୍ତି NDA ଷ୍ଟାର ପ୍ରଚାରକ । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ବିଜେପି ଅଧ୍ୟକ୍ଷ ଜେପି ନଡ୍ଡା NDA ପ୍ରାର୍ଥୀଙ୍କ ପାଇଁ କରିଛନ୍ତି ପ୍ରଚାର । ସେପଟେ ପ୍ରଚାର କରି ବିହାରବାସୀଙ୍କୁ ସମର୍ଥନ ଲୋଡ଼ିଛନ୍ତି ମହାମେଣ୍ଟ ଓ ଜନସୁରାଜ ପାର୍ଟି ନେତା ଓ ସମର୍ଥକ । ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ହାତରେ ସମୟ ସରି ଆସୁଥିବାବେଳେ ଜୋର ଧରିଛି ଆରୋପ-ପ୍ରତ୍ୟାରୋପ । ପ୍ରଧାନମନ୍ତ୍ରୀଙ୍କ ବିରୋଧରେ ରାହୁଲ ଗାନ୍ଧିଙ୍କ ଆପତ୍ତିଜନକ, ବ୍ୟକ୍ତିଗତ ଓ ଅପମାନଜନକ ମନ୍ତବ୍ୟ ପାଇଁ ରାଜ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପି ।

ଉଠୁଛି ପଡୁଛି ବିହାର ପ୍ରଚାର ମଇଦାନ । ପ୍ରଥମ ପର୍ଯ୍ୟାୟ ନିର୍ବାଚନକୁ ଆଉ ମାତ୍ର ଗୋଟିଏ ସପ୍ତାହ । ବିହାର ପ୍ରଚାର ମଇଦାନରେ ବିଜେପିର ହେଭିଓ୍ବେଟ୍ । ନାଳନ୍ଦା, ମୁଜାଫରପୁର, ଛପ୍ରା, ଲକିସରାଇରେ ଗର୍ଜନ କରିଛନ୍ତି NDA ଷ୍ଟାର ପ୍ରଚାରକ । ମହାମେଣ୍ଟକୁ ପିଏମ ମୋଦି, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, କରିଛନ୍ତି ଜୋରଦାର ଆଟାକ୍ । ବିହାର ଭୂଇଁରେ କତା, କ୍ରୁରତା, କଟୁତା, କୁଶାସନ ଓ ଦୁର୍ନୀତିର ଶାସନ ଚାଲିଥିଲା । ପୂର୍ବରୁ ଜଙ୍ଗଲରାଜର ଆତଙ୍କ ଖେଳାଇଥିବା ଯୁବରାଜଙ୍କୁ ରାଜ୍ୟବାସୀ କେବେ କ୍ଷମା ଦେବେନି ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦି । ନାଳନ୍ଦା ବିଶ୍ବବିଦ୍ୟାଳୟ ଓ ଛଟ୍ ପୂଜାକୁ ଆକ୍ଷେପ କରି ମହାମେଣ୍ଟ ନେତା ବିହାରବାସୀଙ୍କୁ ଆଘାତ ଦେଇଛନ୍ତି । ଏଥିସହ ଆରଜେଡି- କଂଗ୍ରେସ ମେଣ୍ଟକୁ ପାଣି- ତେଲର ମିଶ୍ରଣ ବୋଲି କଟାକ୍ଷ କରିଛନ୍ତି ମୋଦି ।

ଅଧିକ ପଢ଼ନ୍ତୁ: ପୋଲିସ ଗୁଳିରେ ଶିଶୁଙ୍କୁ ବନ୍ଧକ ରଖିଥିବା ରୋହିତ ଆର୍ଯ୍ୟାଙ୍କ ମୃତ୍ୟୁ

ନାଳନ୍ଦାରେ ନିର୍ବାଚନୀ ସଭାରୁ ବଡ଼ ଘୋଷଣା କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ବିହାରକୁ ଅନୁପ୍ରବେଶକାରୀ ମୁକ୍ତ କରିବାକୁ ନିଷ୍ପତ୍ତି ନିଆଯାଇଛି । ମାତ୍ର ତିନି ମାସ ପୂର୍ବରୁ 'ଘୁସପେଠିଆ ବଚାଓ ଯାତ୍ରା' କରି ରୋହିଙ୍ଗ୍ୟା ଓ ବାଂଲାଦେଶୀଙ୍କୁ ପ୍ରୋତ୍ସାହନ ଦେଉଥିବା କଂଗ୍ରେସ-ଆରଜେଡିକୁ ବିହାରବାସୀ ଚିହ୍ନି ସାରିଛନ୍ତି । ଅନୁପ୍ରବେଶକାରୀ ଯେଉଁଠୁ ଆସିଥିବେ ଡବଲ ଇଞ୍ଜିନ ସରକାର ତାଙ୍କୁ ପୁଣି ସେଠାକୁ ଫେରାଇ ଦେବେ ବୋଲି କହିଛନ୍ତି ଶାହ । ନୀତୀଶ କୁମାରଙ୍କ ଶାସନ ସମୟରେ ବିହାରର ହୃତ ଗୌରବ ଫେରୁଥିବା କହିଛନ୍ତି ଶାହ ।

ଜଙ୍ଗଲ ରାଜର ଅନ୍ଧାରୀ ଶାସନରେ ଅତିଷ୍ଟ ବିହାରବାସୀ ୨୦୦୫ ପରଠୁ ଦେଖୁଛନ୍ତି ଅଚ୍ଛେଦିନ । ପ୍ରଧାନମନ୍ତ୍ରୀ ମୋଦି ଓ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ କଠିନ ପରିଶ୍ରମ ଫଳରେ ଆମେ ଆଜି ପରିବର୍ତ୍ତିତ ବିହାର ଦେଖୁଛୁ ବୋଲି ନାଳନ୍ଦା ଜନସଭାରେ କହିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ।

ସେପଟେ ନିର୍ବାଚନ ସଭାରେ ପ୍ରଧାନମନ୍ତ୍ରୀଙ୍କ ବିରୋଧରେ ରାହୁଲ ଗାନ୍ଧିଙ୍କ ଆପତ୍ତିଜନକ, ବ୍ୟକ୍ତିଗତ ଓ ଅପମାନଜନକ ମନ୍ତବ୍ୟକୁ ନେଇ ରାଜ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପି । ଏନେଇ ରାହୁଲ ଗାନ୍ଧି ତୁରନ୍ତ ସର୍ବସାଧାରଣରେ କ୍ଷମା ମାଗିବାକୁ ଦାବି ହୋଇଛି । ଏଥିସହ କାରଣ ଦର୍ଶାଅ ନୋଟିସ ଜାରି କରି ନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ତାଙ୍କୁ ପ୍ରଚାରରେ ସାମିଲ ନ କରିବାକୁ ନିର୍ବାଚନ କମିଶନକୁ ଅନୁରୋଧ କରିଛି ବିଜେପି ।