ପାଟନା: ବିହାରର ମୋକାମାର ବାହୁବଳୀ ବିଧାୟକ ଅନନ୍ତ ସିଂହଙ୍କ ଝିଅ ଶିବାଙ୍ଗୀଙ୍କ ବାହାଘରକୁ ନେଇ ଏବେ ଚର୍ଚ୍ଚା ଜୋର ଧରିଛି । ଏହି ବାହାଘରରେ ହେବ ରାଜକୀୟ ଆୟୋଜନ । ବିଧାୟକ ନିଜ ଜ୍ଵାଇଁଙ୍କୁ ପ୍ରାୟ ୨ କୋଟି ଟଙ୍କାର ଲଗଜୁରୀ ଏସୟୁଭି ଲ୍ୟାଣ୍ଡ ରୋଭର ଡିଫେଣ୍ଡର ଉପହାର ଦେବାକୁ ଯାଉଥିବା ନେଇ ଚର୍ଚ୍ଚା ହେଉଥିବା ବେଳେ ବାହାଘରରେ ୪ ଲକ୍ଷ ଲୋକଙ୍କ ପାଇଁ ଭୋଜିର ବ୍ୟବସ୍ଥା କରାଯାଇଛି ।
- ଜ୍ଵାଇଁଙ୍କ ପାଇଁ ମହଙ୍ଗା ଗିଫ୍ଟ
ଅନନ୍ତ ସିଂହଙ୍କ ଜ୍ଵାଇଁଙ୍କ ନାଁ ଋଷିକେଶ କୁମାର । ସେ ପାଟନା ନିକଟସ୍ଥ ବିହଟାର ବାସିନ୍ଦା ଏବଂ ଆମେରିକାରେ ରହୁଥିବା କୁହାଯାଉଛି । ମିଡିଆ ରିପୋର୍ଟ ଅନୁସାରେ, ଅନନ୍ତ ସିଂହ ନିଜ ଜ୍ଵାଇଁଙ୍କୁ ଲ୍ୟାଣ୍ଡ ରୋଭର ଡିଫେଣ୍ଡର ଗାଡ଼ି ଉପହାର ଦେଇପାରନ୍ତି । ଏହି ଗାଡ଼ିର ମୂଲ୍ୟ ଭାରତରେ ପ୍ରାୟ ଦେଢ଼ କୋଟିରୁ ୨ କୋଟି ଟଙ୍କା ମଧ୍ୟରେ ବିକ୍ରି ହେଉଛି । କୁହାଯାଉଛି, ଗାଡ଼ିଟି ପାଟନାରେ ପହଞ୍ଚିସାରିଛି ଏବଂ ଅନନ୍ତ ସିଂହଙ୍କ ଘରେ ରଖାଯାଇଛି । ନଭେମ୍ବର ୨୫ରେ ନଦାୱାଁ ଗାଁରେ ହେବାକୁ ଥିବା ବିବାହରେ ଏହି ଲଗଜୁରୀ କାର୍ ମୁଖ୍ୟ ଆକର୍ଷଣ ପାଲଟିପାରେ ।
- ୧୦ ବିଘା ଜମିରେ ଲାଗିଲା ଟେଣ୍ଟ, ୧୫୦ରୁ ଅଧିକ ପ୍ରକାରର ଖାଦ୍ୟ
ଅନନ୍ତ ସିଂହଙ୍କ ଝିଅଙ୍କ ବାହାଘର ପାଇଁ ପ୍ରାୟ ୧୦ ବିଘା ଜମିରେ ଟେଣ୍ଟ ଓ ପଣ୍ଡାଲ୍ ନିର୍ମାଣ କରାଯାଉଛି । ଉତ୍ତରପ୍ରଦେଶର ମଉରୁ ଆସିଥିବା କାରିଗରମାନେ ଏହି ଭବ୍ୟ ଆୟୋଜନରେ ଲାଗିପଡ଼ିଛନ୍ତି । ବିବାହ ଭୋଜିରେ ୧୫୦ରୁ ଅଧିକ ପ୍ରକାରର ଖାଦ୍ୟ ପରଷାଯିବା ନେଇ ମଧ୍ୟ ଚର୍ଚ୍ଚା ହେଉଛି । ଏହାସହ ପ୍ରାୟ ୪ ଲକ୍ଷ ଲୋକଙ୍କ ପାଇଁ ଭୋଜନର ବ୍ୟବସ୍ଥା ହୋଇଥିବା କିଛି ମିଡିଆ ରିପୋର୍ଟରେ ଦାବି କରାଯାଇଛି।
- ବାହାଘରରେ ଯୋଗ ଦେଇପାରନ୍ତି ରାଜନେତା ଓ ସେଲିବ୍ରିଟି
ଏହି ବିବାହରେ ଦେଶର ଅନେକ ଜଣାଶୁଣା ରାଜନେତା ଓ ସେଲିବ୍ରିଟି ଯୋଗ ଦେଇପାରନ୍ତି । ଦୁବାଇରୁ ୬ ଜଣ ମଡେଲ୍ ଆସିବା ନେଇ ମଧ୍ୟ ଚର୍ଚ୍ଚା ରହିଛି । ଅନନ୍ତ ସିଂହ ନିଜେ କହିଛନ୍ତି ଯେ, ସେ ଲାଲୁ ପ୍ରସାଦ ଯାଦବ, ନୀତୀଶ କୁମାରଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ଝିଅର ବାହାଘର ପାଇଁ ନିମନ୍ତ୍ରଣ କରିବେ । ଏପରିକି ପାକିସ୍ତାନରୁ ମଧ୍ୟ ଅତିଥିମାନେ ଆସିବେ ବୋଲି ବିଧାୟକ ଦାବି କରିଥିବା ରିପୋର୍ଟରେ କୁହାଯାଇଛି।
ପଢନ୍ତୁ ଏହି ଖବର: ସିଲିଣ୍ଡର ଡେଲିଭରି କରିବା ବେଳେ ଅଘଟଣ; ଅଳ୍ପକେ ବର୍ତ୍ତିଲା ଜୀବନ- କାହିଁକି ଏତେ ମହଙ୍ଗା ଲ୍ୟାଣ୍ଡ ରୋଭର ଡିଫେଣ୍ଡର ?
ଲ୍ୟାଣ୍ଡ ରୋଭର ଡିଫେଣ୍ଡର ଦେଶର ସବୁଠାରୁ ଲଗଜୁରୀ ଏସୟୁଭି ମଧ୍ୟରୁ ଅନ୍ୟତମ । ଏହାର ଟପ୍ ଭାରିଏଣ୍ଟର ମୂଲ୍ୟ ପ୍ରାୟ ୩ କୋଟି ଟଙ୍କା ପର୍ଯ୍ୟନ୍ତ ଅଛି । ଏହି ଗାଡ଼ି ନିଜର ଦମଦାର ଅଫ୍-ରୋଡ୍ କ୍ଷମତା, ମଜଭୁତ ବଡି, ପ୍ରିମିୟମ୍ ଇଣ୍ଟେରିୟର ଓ ଅତ୍ୟାଧୁନିକ ଟେକ୍ନୋଲୋଜି ପାଇଁ ପରିଚିତ । ଏଥିରେ ଆଡଭାନ୍ସଡ୍ ଡ୍ରାଇଭିଂ ଆସିଷ୍ଟାନ୍ସ ସିଷ୍ଟମ୍, ବଡ଼ ଟଚ୍ ସ୍କ୍ରିନ୍ ଓ ଆଧୁନିକ ଇନଫୋଟେନମେଣ୍ଟ ସିଷ୍ଟମ୍ ଭଳି ଅନେକ ସୁବିଧା ରହିଛି ।
