ଏବେ ପ୍ରେମ ସପ୍ତାହ ଚାଲିଥିବାବେଳେ ପ୍ରେମ ପକ୍ଷୀମାନେ ସୋସିଆଲ ମିଡିଆରେ ନିଜର ବିଶେଷ ମୁହୂର୍ତ୍ତକୁ ସେୟାର କରନ୍ତି । ଭାଲେଣ୍ଟାଇନ ଡେ' ପର୍ଯ୍ୟନ୍ତ ପ୍ରତିଦିନ ପାଳନ ହେଉଥିବା ଦିବସଗୁଡ଼ିକୁ ସେମାନେ ନିଜ ବନ୍ଧୁଙ୍କ ସହିତ ବାଣ୍ଟନ୍ତି । ହେଲେ ଏଠି ଏକ ଦମ୍ପତି ପ୍ରେମ ସପ୍ତାହ ପାଳି ଅଡୁଆରେ ପଡ଼ିଛନ୍ତି । ଶେଷରେ ତାଙ୍କ ସୋସିଆଲ ମେଡିଆ ପୋଷ୍ଟ ଦେଖି ଘରେ ପଶିଛି ପୋଲିସ । ରୋଜ୍ ଡେ ପାଳନ କରି ଏହି ବିହାର ଦମ୍ପତି ଏକ ଭିଡିଓକୁ ସୋସିଆଲ ମିଡିଆରେ ପୋଷ୍ଟ କରିଥିଲେ, ଯାହାକି ତାଙ୍କୁ ମହଙ୍ଗା ପଡ଼ିଛି ।

ମହିଳା ଜଣକ ନାମ ହେଉଛି କାଞ୍ଚନ ଦେବୀ, ଯିଏକି ନିଜ ସ୍ଵାମୀଙ୍କ ସହ ରୋଜ୍ ଡେ ପାଳନ କରି ଏହାର ଭିଡିଓକୁ ନିଜ ଇନଷ୍ଟାଗ୍ରାମ ଓ ଫେସବୁକରେ ପୋଷ୍ଟ କରିଥିଲେ । ଉକ୍ତ ଭିଡିଓରେ ସେ ସ୍ଵାମୀଙ୍କୁ ଗୋଟିଏ ଗ୍ଲାସ ୱାଇନ୍ ସର୍ଭ କରିବା ପୂର୍ବରୁ ଗୋଲାପ ଫୁଲଟିଏ ଦେଇଥିଲେ । ଏହାସହିତ ସ୍ଵାମୀଙ୍କୁ ଏକ ମଦ ବୋତଲ ଧରାଇଥିଲେ । ଏହି ସମୟରେ ମହିଳାଙ୍କ ଏହି ଆଚରଣ ହୁଏତ ସ୍ଵାମୀଙ୍କୁ ବେଶ ପସନ୍ଦ ଆସିଥିଲା ଓ ସେ ହସିବାକୁ ଲାଗିଥିଲେ । ଯାହାର ଭିଡିଓ ସୋସିଆଲ ମିଡିଆରେ ଖୁବ ଭାଇରାଲ ହୋଇଥିଲା ।

ଖାଲି ସେତିକି ନୁହେଁ ମହିଳା ଜଣକ ହାତରେ ପିସ୍ତଲ ଧରି ପୋଜ୍ ଦେଇଥିବା ଅନ୍ୟ ଏକ ଫଟୋରେ ଦେଖିବାକୁ ମିଳିଛି । ଏହି ଫଟୋଟି ସେ ବ୍ୟୁଟି ପାର୍ଲରରେ ଉଠାଇଥିଲେ । ତାଙ୍କର ଏହି ପୋଷ୍ଟ ଉପରେ ହୁଏତ ବିହାର ପୋଲିସର ନଜର ପଡ଼ିନଥିଲା । ମାତ୍ର ରୋଜ୍ ଡେ' ଭିଡିଓ ଭାଇରାଲ ହେବା ପରେ ଏହି ପିସ୍ତଲ ଧରା ଫଟୋଟି ବି ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଏହାପରେ ଦମ୍ପତିଙ୍କ ବିରୋଧରେ ମାମଲା ରୁଜୁ କରିଛି ବିହାର ପୋଲିସ ।

ମୁଙ୍ଗେର ଏସପି ସାୟେଦ ଇମ୍ରାନ ମସୁଦ ସ୍ପଷ୍ଟ କରିଛନ୍ତି ଯେ ମହିଳା ଜଣକ ପିସ୍ତଲ କେଉଁଠି ଆଣିଲେ ସେ ନେଇ ପୋଲିସ ତଦନ୍ତ ଆରମ୍ଭ କରିଥିଲା । ଏପରିକି ପୋଲିସ ତାଙ୍କ ଘରେ ମଧ୍ୟ ପହଞ୍ଚିଥିଲା । ତଦନ୍ତରୁ ଜଣାପଡ଼ିଛି ଯେ ମହିଳା ଜଣକ ଧରିଥିବା ଉକ୍ତ ପିସ୍ତଲଟି ହେଉଛି ଏକ ଲାଇସେନ୍ସ ପ୍ରାପ୍ତ ଅସ୍ତ୍ର, ଯାହାକି ଦୀନଦୟାଲ ଛକର ଅଧିବାସୀ ବିଶାଲ କୁମାରଙ୍କ ନାଁରେ ପଞ୍ଜୀକୃତ । ଏହି ପିସ୍ତଲଟି ଲିଗାଲ୍ ହୋଇଥିଲେ ସୁଦ୍ଧା ଜଣେ ଅଣଅଧିକୃତ ବ୍ୟକ୍ତିବିଶେଷଙ୍କ ହାତରେ ରହିବା ଆଇନର ଉଲ୍ଲଙ୍ଘନ ।

• ଦମ୍ପତିଙ୍କ ବିରୋଧରେ ମାମଲା ରୁଜୁ

ପୋଲିସ ଉକ୍ତ ଭିଡିଓ ଆଧାରରେ ଦମ୍ପତି ଓ ପିସ୍ତଲର ଅସଲି ମାଲିକ ବିଶାଲ କୁମାରଙ୍କ ବିରୋଧରେ ଥାନାରେ ମାମଲା ରୁଜୁ କରିଛି । ଏସପି ମସୁଦ କହିଛନ୍ତି ଯେ ସୋସିଆଲ ମିଡିଆ ପରି ପ୍ଲାଟଫର୍ମରେ ଏପରି ପିସ୍ତଲକୁ ଦେଖାଇବା ଓ ରାଜ୍ୟରେ ବ୍ୟାନ୍ ହୋଇଥିବା ମଦକୁ ପ୍ରୋତ୍ସାହିତ କରିବା ସିଧାସଳଖ ଆଇନର ଉଲ୍ଲଙ୍ଗନ । ଅଧିକାରୀମାନେ ଏବେ ତଦନ୍ତ ଜାରି ରଖିଛନ୍ତି । ଆଗକୁ ଦମ୍ପତିଙ୍କୁ ଆଇନର ସାମ୍ନା କରିବାକୁ ପଡ଼ିବ ବୋଲି ଏସପି ମସୁଦ କହିଛନ୍ତି ।

ଏଥିସହ ପଢନ୍ତୁ: ଦୁଇ ଦୁଇଟା ପ୍ରାଣ ନେଇଗଲା ଜହ୍ଲାଦ ସ୍ଵାମୀ; ୮ ମାସର ଗର୍ଭବତୀଙ୍କୁ ହତ୍ୟା