Boyfriend Surprise / ହଠାତ୍ ବରଯାତ୍ରୀ ଧରି ଗର୍ଲଫ୍ରେଣ୍ଡ ଘରେ ହାଜର ବୟଫ୍ରେଣ୍ଡ; ଆଉ ତା' ପରେ...

ଲକ୍ଷ୍ନୌ: ଉତ୍ତର ପ୍ରଦେଶ ହାପୁଡରେ ପ୍ରେମ ପ୍ରସଙ୍ଗକୁ ନେଇ ଏକ ଅଜବ ଖବର ସାମ୍ନାକୁ ଆସିଛି । ଯେଉଁଠି ଦୀପାବଳି ପରଦିନ ଜଣେ ପ୍ରେମିକ ନିଜ ପ୍ରେମିକା ଘରେ ବରଯାତ୍ରୀ ଧରି ପହଞ୍ଚିଥିଲା । ହଠାତ୍ ଘର ସାମ୍ନାରେ ବାଜା ବାଣ ସହ ବରଯାତ୍ରୀଙ୍କୁ ଦେଖି ପ୍ରେମିକାଙ୍କ ଘରଲୋକେ ଦ୍ଵନ୍ଦ୍ଵରେ ପଡ଼ିଯାଇଥିଲେ । ଏହାପରେ ଯାହା ହେଲା ତାକୁ ନେଇ ବେଶ ଚର୍ଚ୍ଚା ହେଉଛି । ପ୍ରେମିକାଙ୍କ ଘର ଲୋକ ପ୍ରେମିକକୁ ମାଡ଼ ମାରିଥିବା ଜଣାପଡ଼ିଛି । ଶେଷରେ ଥାନାରେ ଘଟଣାର ନିଷ୍କର୍ସ ବାହାରିଛି ।

• କଣ ପୂରା ଘଟଣା ?

ଏହି ଘଟଣା ସୋମବାର ଅପରାହ୍ନ ସମୟରେ ଘଟିଥିଲା । ୨୧ ବର୍ଷୀୟ ଅମନ ନିଜ ପରିବାର, ସମ୍ପର୍କୀୟ ଓ ବନ୍ଧୁଙ୍କ ସହ ବରଯାତ୍ରୀ ଧରି ୧୯ ବର୍ଷୀୟ ପ୍ରେମିକା ଶିବାନୀଙ୍କ ଘରେ ପହଞ୍ଚିଥିଲା । ଗତ ୩ ବର୍ଷ ଧରି ପ୍ରେମ ସମ୍ପର୍କରେ ଅଛନ୍ତି ଶିବାନୀ ଓ ଅମନ । ଦୀପାବଳି ଦିନ ଅମନ ବିଳମ୍ବିତ ରାତିରେ ଶିବାନୀଙ୍କ ଘରକୁ ଯାଇଥିଲା ଓ ସେଠାରେ ବାହାଘର କଥା ଉଠାଇଥିଲା । କଥାବାର୍ତ୍ତା ମଧ୍ୟରେ ସେ କୌଣସି ଦ୍ଵନ୍ଦ୍ଵ ବଶତଃ ଅମନ ଏହି କଥାବାର୍ତ୍ତାକୁ ସହମତି ଭାବି ନେଇଥିଲା । ଏଥିଲାଗି ଦୀପାବଳି ପରଦିନ ବରଯାତ୍ରୀ ସହ ସେ ଶିବାନୀଙ୍କ ଘରେ ପହଞ୍ଚିଥିଲା ।

ପଢନ୍ତୁ ଏହି ଖବର: ଜ୍ଵାଇଁଙ୍କୁ ୨ କୋଟିର ଲ୍ୟାଣ୍ଡ ରୋଭର ଡିଫେଣ୍ଡର ଗିଫ୍ଟ; ଝିଅ ବାହାଘରରେ ୪ ଲକ୍ଷ ଲୋକଙ୍କ ପାଇଁ ଭୋଜି

ହଠାତ୍ ଘର ସାମ୍ନାରେ ବରଯାତ୍ରୀ ଦେଖି ଶିବାନୀଙ୍କ ପରିବାର ଲୋକେ ରାଗି ଯାଇଥିଲେ । ଏହାପରେ ସେମାନେ ଅମନ ଓ ତାଙ୍କ ଘରଲୋକଙ୍କ ସହ ଯୁକ୍ତିତର୍କ କରିଥିଲେ । ଏପରିକି ଉଭୟ ପକ୍ଷ ମଧ୍ୟରେ ହାତାହାତି ହୋଇଥିଲା । ଘଟଣା ସମ୍ପର୍କରେ ଖବର ପାଇବା ପରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲା ଓ ସ୍ଥିତିକୁ ନିୟନ୍ତ୍ରଣକୁ ନେଇଥିଲା । ପୋଲିସ ଉଭୟ ପକ୍ଷକୁ ଥାନାକୁ ଡାକି ବୁଝାସୁଝା କରିଥିଲା ।

• ପ୍ରେମିକ ଘରକୁ ଗଲା ପ୍ରେମିକା

ଥାନାରେ ଲୁଖରାଡା ଅଞ୍ଚଳର ଅଧିବାସୀ ଅମନ ସହ ରହିବାକୁ ଶିବାନୀ ରାଜି ହୋଇଥିଲା । ଏହାପରେ ପୋଲିସ ମିଶନ ଶକ୍ତି କେନ୍ଦ୍ରରେ ଶିବାନୀଙ୍କୁ ବସାଇ ଭିଡିଓ ରେକର୍ଡିଂ କରିଥିଲା ଓ ସେ ନିଜ ମୁହଁରେ ଅମନଙ୍କ ସହ ରହିବାକୁ ଇଚ୍ଛୁକ ବୋଲି କହିଥିଲା । ଯୁବକ ଓ ଯୁବତୀ ଉଭୟ ବିବାହ ପାଇଁ ଆଇନ ଅନୁସାରେ ଯୋଗ୍ୟ ଥିବାରୁ ଶେଷରେ ବିବାହ ସ୍ଥିର ହୋଇଥିଲା । ଉଭୟ ପକ୍ଷ ମଧ୍ୟ ପୋଲିସ ଆଗରେ ରାଜି ହୋଇଥିଲେ । ଶେଷରେ ଯୁବତୀ ନିଜ ଇଚ୍ଛାରେ ଅମନଙ୍କ ଘରକୁ ଯାଇଥିଲେ ।