India China Tension / ଭାରତୀୟ ଭୂମିକୁ ନିଜର ବୋଲି ଦେଖାଇବାକୁ ଚୀନର ନୂଆ ଚକ୍ରାନ୍ତ

ଭାରତୀୟ ସ୍ଥାନଗୁଡ଼ିକୁ କାଳ୍ପନିକ ନାମ ଦେବା ପାଇଁ ଚୀନ ପୁଣି ଥରେ ପ୍ରୟାସ କରିଛି । ଭାରତୀୟ ଭୂମି ଉପରେ ନଜର ପକାଇ ଦେଉଛି ମନଇଚ୍ଛା ନାଁ । ଏନେଇ ଭାରତର ବୈଦେଶିକ ମନ୍ତ୍ରଣାଳୟ ପ୍ରତିକ୍ରିୟା ପ୍ରକାଶ କରିଛି । ଭାରତୀୟ ବୈଦେଶିକ ମନ୍ତ୍ରଣାଳୟ ଚୀନର ଏହି ପ୍ରୟାସକୁ ଦୁଷ୍ଟତାପୂର୍ଣ୍ଣ ଏବଂ ଏକ ମିଥ୍ୟା ବୋଲି କହିଛି । ଭାରତୀୟ କ୍ଷେତ୍ରର ଅଂଶବିଶେଷ ସ୍ଥାନଗୁଡ଼ିକୁ କାଳ୍ପନିକ ନାମ ଦେବା ପାଇଁ ଚୀନ ଦ୍ୱାରା କରାଯାଇଥିବା ଯେକୌଣସି ଦୁଷ୍ଟତାପୂର୍ଣ୍ଣ ପ୍ରୟାସକୁ ଭାରତ ବରଦାସ୍ତ କରିବନି ବୋଲି ମନ୍ତ୍ରଣାଳୟ କହିଛି ।

ଚୀନ ସୀମାବର୍ତ୍ତୀ ଅଞ୍ଚଳ ଗୁଡ଼ିକୁ ହଡ଼ପ କରିବା ଲାଗି ଏହାର ନାମକରଣ କରୁଛି । ତେବେ ମନ୍ତ୍ରଣାଳୟର ବିବୃତ୍ତିରେ ଆହୁରି କୁହାଯାଇଛି ଯେ ଚୀନ ଦ୍ୱାରା ମିଥ୍ୟା ଦାବି କରିବା ଏବଂ ଭିତ୍ତିହୀନ କାହାଣୀ ପ୍ରସ୍ତୁତ କରିବାର ଏପରି ପ୍ରୟାସ ଏହି ସମ୍ପୂର୍ଣ୍ଣ ସତ୍ୟକୁ ପରିବର୍ତ୍ତନ କରିପାରିବ ନାହିଁ ଯେ ଅରୁଣାଚଳ ପ୍ରଦେଶ ସମେତ ଏହି ସ୍ଥାନ ଏବଂ ଅଞ୍ଚଳଗୁଡ଼ିକ ଭାରତର ଏକ ଅପରିହାର୍ଯ୍ୟ ଏବଂ ଅବିଚ୍ଛେଦ୍ୟ ଅଂଶ ଥିଲା, ଅଛି ଏବଂ ସବୁବେଳେ ରହିବ ।

• ବରଦାସ୍ତ କରିବନି ଭାରତ

ବୈଦେଶିକ ମନ୍ତ୍ରଣାଳୟର ପ୍ରତିକ୍ରିୟାରେ ଆହୁରି କୁହାଯାଇଛି ଯେ ଚୀନର ଏହି କାର୍ଯ୍ୟଗୁଡ଼ିକ ଭାରତ-ଚୀନ ସମ୍ପର୍କକୁ ସ୍ଥିର ଏବଂ ସ୍ୱାଭାବିକ କରିବା ପାଇଁ ଚାଲିଥିବା ପ୍ରୟାସକୁ ପ୍ରଭାବିତ କରୁଛି । ଚୀନର ଏହି ପ୍ରୟାସ ଉଭୟ ଦେଶର ସମ୍ପର୍କରେ ନକରାତ୍ମକ ପ୍ରଭାବ ପକାଉଛି । ଉଭୟ ଦେଶ ମଧ୍ୟରେ ଉତ୍ତମ ବୁଝାମଣା ଗଠନ ପାଇଁ ହେଉଥିବା ପ୍ରୟାସକୁ ଦୁର୍ବଳ କରୁଥିବା କାର୍ଯ୍ୟରୁ ନିବୃତ୍ତ ରହିବା ଉଚିତ ବୋଲି ଭାରତ କହିଛି ।

• ଅରୁଣାଚଳପ୍ରଦେଶ ଉପରେ ଚୀନର ଆଖି

ଭାରତ-ଚୀନ ସମ୍ପର୍କ ଦୀର୍ଘ ସମୟ ଧରି ଉତ୍ତେଜନାପୂର୍ଣ୍ଣ ରହିଛି । କାରଣ ଚୀନ ବାରମ୍ବାର ଭାରତୀୟ ଅଞ୍ଚଳର ନାମ ପରିବର୍ତ୍ତନ କରୁଛି । ଚୀନ ଅରୁଣାଚଳ ପ୍ରଦେଶକୁ ନିଜର ବୋଲି ଦାବି କରିବା ସହ ଭାରତର ଏହି ସୀମାବର୍ତ୍ତୀ ରାଜ୍ୟରେ ଅନେକ ଅଞ୍ଚଳ ସମେତ ପର୍ବତ, ନଦୀ, ଆବାସିକ ଅଞ୍ଚଳ ଏବଂ ଅନ୍ୟାନ୍ୟ ସ୍ଥାନକୁ ନିଜର ବୋଲି କହୁଛି । ଚୀନ ଦ୍ୱାରା ସମାନ ଷଡ଼ଯନ୍ତ୍ର ୨୦୧୭, ୨୦୨୧, ୨୦୨୩, ଏପ୍ରିଲ ୨୦୨୪ ଏବଂ ମେ ୨୦୨୫ରେ କରାଯାଇଥିଲା । ପ୍ରତ୍ୟେକ ଥର ଭାରତୀୟ ବୈଦେଶିକ ମନ୍ତ୍ରଣାଳୟ ଏହି ଦାବିଗୁଡ଼ିକୁ ଖଣ୍ଡନ କରିଛି ।

ପଢନ୍ତୁ ଏହି ଖବର: ଏଠି ମରିବା ବି ମହଙ୍ଗା; ଶବ ପାଇଁ କିଣାଯାଉଛି ଫ୍ଲାଟ୍, ଭୟରେ ପଡ଼ୋଶୀ

• ଭାରତର ୨୧ଟି ସ୍ଥାନର ନାଁ ବଦଳାଇବାକୁ ଚୀନର ଅପଚେଷ୍ଟା

ଉଲ୍ଲେଖନୀୟ ଯେ ୨୦୧୭ ପରେ ଚୀନ ଡିସେମ୍ବର ୨୦୨୧ରେ ୨୧ଟି ଭାରତୀୟ ସ୍ଥାନର ନାମ ପରିବର୍ତ୍ତନ କରିବାକୁ ଚେଷ୍ଟା କରିଥିଲା । ଚୀନ ତୱାଙ୍ଗରୁ ଅଞ୍ଜା ପର୍ଯ୍ୟନ୍ତ ୧୧ଟି ଅରୁଣାଚଳ ପ୍ରଦେଶ ଜିଲ୍ଲାର ନାମ ଚୀନ, ତିବ୍ବତୀ ଏବଂ ରୋମାନ ଭାଷାରେ ଜାରି କରିଥିଲା । ସେତେବେଳେ ଭାରତ ଚୀନର ଏହି ପଦକ୍ଷେପକୁ ଗ୍ରହଣୀୟ ନୁହେଁ ବୋଲି କହି ଖାରଜ କରିଥିଲା । ଭାରତ କହିଥିଲା ​​ଯେ ନାମ ପରିବର୍ତ୍ତନ କରିବା ଦ୍ୱାରା ଭୂମିର ବାସ୍ତବତା ପରିବର୍ତ୍ତନ ହୁଏ ନାହିଁ । ଭାରତ କହିଛି ଯେ ଅରୁଣାଚଳ ପ୍ରଦେଶ ଭାରତର ଏକ ଅଂଶ ଏବଂ ସର୍ବଦା ରହିବ ।