Argus News - ଏଠି ମରିବା ବି ମହଙ୍ଗା; ଶବ ପାଇଁ କିଣାଯାଉଛି ଫ୍ଲାଟ୍, ଭୟରେ ପଡ଼ୋଶୀ

ଥରେ ଭାବନ୍ତୁ ଆପଣ କୌଣସି ଫ୍ଲାଟରେ ରହୁଛନ୍ତି ଏବଂ ପଡ଼ୋଶୀ ଘରେ କେହି ରହୁନାହାନ୍ତି । କିନ୍ତୁ ସେଠାରେ ଜଣେ ମୃତବ୍ୟକ୍ତିଙ୍କ ଫଟୋ ଲାଗିଛି । ଉକ୍ତ ଫ୍ଲାଟ୍ ଭିତରେ ମୃତବ୍ୟକ୍ତିଙ୍କ ହାଡ଼ ରହିଛି ଓ ବନ୍ଦ ଘରୁ ଲାଲ ରଙ୍ଗର ଆଲୋକ ଆସୁଛି । ଏହା ବାସ୍ତବରେ କୌଣସି ହରର୍ ସିନ୍ ଠାରୁ କମ ନୁହେଁ । ତେବେ ଏପରି ସ୍ଥିତି ଏବେ ଚୀନର ବିଭିନ୍ନ ଆପାର୍ଟମେଣ୍ଟରେ ସୃଷ୍ଟି ହୋଇଛି । ଏଠାରେ ମୃତ୍ୟୁ ପରେ ବି ଶବ ମହଙ୍ଗା ମାଡ଼ର ସମ୍ମୁଖୀନ ହୋଇଛି । ଚୀନରେ ଏବେ ଅନ୍ତିମ ସଂସ୍କାରର ଖର୍ଚ୍ଚ ଏତେ ବଢିଛି ଯେ ଲୋକେ ଫ୍ଲାଟ୍ କିଣି ସେଠାରେ ମୃତ ବ୍ୟକ୍ତିଙ୍କ ଅସ୍ଥି ରଖୁଛନ୍ତି ।

ଚୀନର ଏବେ ଅନେକ ଅଞ୍ଚଳରେ ଏପରି ଆପାର୍ଟମେଣ୍ଟ ରହିଛି ଯାହାର ଝରକା କେବେ ବି ଖୋଲାଯାଏ ନାହିଁ କି ପରଦା ହଟାଯାଇନଥାଏ । ଚୀନର ମିଡିଆ ରିପୋର୍ଟ ଅନୁସାରେ, ଯେତେବେଳେ ପଡ଼ୋଶୀ ଏହି ଘର ଭିତରକୁ ଝାଙ୍କି ଦେଖିଲେ ତେବେ ଏହାର ଦୃଶ୍ୟ ବେଶ ଭୟଙ୍କର ଥିଲା । ଘରର ମଝିରେ ମହମବତୀ ଜଳୁଥିଲା ଓ ଏକ କଳା ରଙ୍ଗର ଫଟୋ ଆଗରେ ଅସ୍ଥି ରଖାଯାଇଥିଲା । ସେଠାକାର ଲୋକେ କବରସ୍ଥାନର ମହଙ୍ଗାରୁ ବର୍ତ୍ତିବା ଲାଗି ଅପହଞ୍ଚ ଅଞ୍ଚଳରେ ଥିବା ଫ୍ଲାଟକୁ କିଣି ସେଠାରେ ମୃତବ୍ୟକ୍ତିଙ୍କୁ ଅସ୍ଥି ରଖୁଥିବା ଜଣାପଡ଼ିଛି ।

• ଫ୍ଲାଟ୍ ହେଲା କବରସ୍ଥାନ

ଚୀନର ସାଂଘାଇ ଭଳି ସହରରେ, କବରସ୍ଥାନ ଜମିର ମୂଲ୍ୟ ଆବାସିକ ଗୃହ ଅପେକ୍ଷା ଅନେକ ଗୁଣ ଅଧିକ ହୋଇଯାଇଛି । ଏହା ଅନେକ ପରିବାରକୁ ଛୋଟ ଆପାର୍ଟମେଣ୍ଟ କିଣି ସେଗୁଡ଼ିକୁ କବରସ୍ଥାନରେ ପରିଣତ କରିବାକୁ ବାଧ୍ୟ କରିଛି । ତଥାପି, ପଡ଼ୋଶୀମାନଙ୍କ ଅଭିଯୋଗ ଏବଂ ପରମ୍ପରାର ଉଲ୍ଲଂଘନ ଯୋଗୁଁ ଶେଷରେ ଚୀନ୍ କର୍ତ୍ତୃପକ୍ଷ ଏବେ ଆବାସିକ ସମ୍ପତ୍ତିରେ ମୃତକଙ୍କ କବର ଉପରେ କଠୋର କଟକଣା ଜାରି କରିଛନ୍ତି ।

ପଢନ୍ତୁ ଏହି ଖବର: ମରିବା ପରେ କେମିତି ଲାଗେ ? ଏଠି ବଞ୍ଚିବା ଅବସ୍ଥାରେ ବି ହୁଏ ମୃତ୍ୟୁର ଟ୍ରାଏଲ୍

• ପ୍ରତି ବର୍ଗମିଟର ଜମିକୁ ୮୮ ଲକ୍ଷ

ଚୀନରେ ଦ୍ରୁତ ଗତିରେ ବଢୁଥିବା ବୃଦ୍ଧଙ୍କ ଜନସଂଖ୍ୟା ଓ ଜମିର ଅଭାବ ଏବେ କବରସ୍ଥାନଗୁଡ଼ିକୁ ମହଙ୍ଗା କରିଛି । ଏଠାରେ ୧ ବର୍ଗ ମିଟର ଜମିର ଦାମ ସହରର ବିଳାସପୂର୍ଣ୍ଣ ଫ୍ଲାଟର ଦାମଠାରୁ ବି ଅଧିକ । ସାଙ୍ଘାଇର ସୋଙ୍ଗହେର ଗୋଟିଏ ଫ୍ଲାଟର ଦାମ ପ୍ରାୟ ୭.୬ ଲକ୍ଷ ୟୁଆନ ବା ଭାରତୀୟ ମୁଦ୍ରାରେ ଏହାର ଦାମ ୮୮ ଲକ୍ଷ ଟଙ୍କା ପ୍ରତି ବର୍ଗ ମିଟର ପିଛା ରହିଛି । ଅଧିକ ଖର୍ଚ୍ଚ ଏଡାଇବା ପାଇଁ, ପରିବାରଗୁଡ଼ିକ ଛୋଟ ଆପାର୍ଟମେଣ୍ଟ କିଣିବା ଆରମ୍ଭ କରିଛନ୍ତି । କବରସ୍ଥାନଗୁଡ଼ିକ ୨୦ ବର୍ଷର ଲିଜ୍ ପ୍ରଦାନ କରୁଥିବା ବେଳେ, ଘରଗୁଡ଼ିକ ୭୦ ବର୍ଷ ପାଇଁ ଉପଲବ୍ଧ, ଯାହାକୁ ଅନେକେ ଏକ ସୁରକ୍ଷିତ ବିକଳ୍ପ ବୋଲି ବିବେଚନା କରୁଛନ୍ତି । ଏପରିକି ଚୀନର ଟିୟାଞ୍ଜିନ ସହରରେ ପୁରା ବଙ୍ଗଳାକୁ ହଜାର ହଜାର ଅସ୍ଥି ରଖିବା ଲାଗି ବ୍ୟବହାର କରାଯାଉଛି ।

• ଭୟରେ ପଡ଼ୋଶୀ, ନୂଆ ଆଇନ ଆଣିଲେ ସରକାର

ଚୀନର ଯେତେବେଳେ କିଙ୍ଗମିଙ୍ଗ ଫେଷ୍ଟିଭାଲ ଆସେ ସେତେବେଳେ ଏହି ଫ୍ଲାଟକୁ ଆସି ପରିବାର ଲୋକେ ଧୂପକାଠି ଜଳାଇ ନିଜ ପୂର୍ବପୁରୁଷଙ୍କୁ ସ୍ମରଣ କରିଥାନ୍ତି । ଏହି ସମୟରେ ପଡ଼ୋଶୀମାନେ ଭୟଭୀତ ହୋଇଯାଆନ୍ତି । ଅନେକ ଆବାସିକ ସ୍ଥଳକୁ ଏପରି କବରସ୍ଥାନରେ ପରିଣତ କରିବା ପରେ ଏବେ ସେଠାରେ ଚୀନ ସରକାର ନୂଆ ନିୟମ ଆଣିଛନ୍ତି । ଯଦି କେହି ଆବସିକ ଫ୍ଲାଟରେ ମୃତ ବ୍ୟକ୍ତିଙ୍କ ଅସ୍ଥି ରଖେ, ତେବେ ତାହାକୁ ବେଆଇନ ବିବେଚନା କରାଯାଇ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କୁହାଯାଇଛି ।

କିଙ୍ଗମିଙ୍ଗ ଫେଷ୍ଟିଭାଲ: ଏଠାରେ କହିରଖୁଛୁ କି, ଚୀନର କ୍ୱିଙ୍ଗମିଙ୍ଗ ଫେଷ୍ଟିଭାଲକୁ ସମାଧି ସଫା କରିବା ଦିବସ ବୋଲି ମଧ୍ୟ କୁହାଯାଏ । ଏହା ଚୀନର ଏକ ପ୍ରମୁଖ ପାରମ୍ପରିକ ପର୍ବ ଯେଉଁଥିରେ ପୂର୍ବପୁରୁଷଙ୍କୁ ସ୍ମରଣ କରାଯାଇଥାଏ ଏବଂ ସେମାନଙ୍କ ସମାଧି ସଫା କରାଯାଇଥାଏ । ଏହି ଦିନ ପରିବାରର ସଦସ୍ୟମାନେ ସେମାନଙ୍କ ପୂର୍ବପୁରୁଷଙ୍କ ସମାଧି ପାଖକୁ ଯାଇ ସେଠାରେ ସଫାସୁତୁରା କରନ୍ତି ଏବଂ ଫୁଲ, ଖାଦ୍ୟ ଓ ଧୂପ ଅର୍ପଣ କରନ୍ତି ।

• କାହିଁକି ଚୀନରେ ଉପୁଜିଲା ଏପରି ସମସ୍ୟା ?

ଦିନକୁ ଦିନ ଚୀନରେ ଜନ୍ମ ହାର କମୁଥିବାବେଳେ ମୃତ୍ୟୁ ହାର ବଢିବାରେ ଲାଗିଛି । ଏଥିଲାଗି ଏବେ ଦେଶର ଅନେକ ସ୍ଥାନରେ କବରସ୍ଥାନର ଚାହିଦା ବୃଦ୍ଧି ପାଇଛି ଓ ଦର ଆକାଶଛୁଆଁ ହୋଇଛି । ଏପରିକି ଅନ୍ତିମ ସଂସ୍କାର ଦର ବୃଦ୍ଧି ଓ ଠକେଇ ସାଧାରଣ ଲୋକଙ୍କୁ ବେଶ ପ୍ରଭାବିତ କରିଛି । ବର୍ଷ ୨୦୨୦ ପରେ ଚୀନର ବଡ଼ ରିଅଲ ଇଷ୍ଟେଟ୍ କମ୍ପାନୀ ଋଣରେ ବୁଡ଼ି ରହିଛି, ଯେଉଁଠି ଅନେକ ହାଉସିଂ ପ୍ରୋଜେକ୍ଟ ଖାଲି ପଡ଼ିଛି ଏବଂ ଏଠାରେ ହିଁ ମୂଲ୍ୟ ହ୍ରାସ ପାଉଛି ।

ଅଧିକ ଖବର ପଢନ୍ତୁ...