ନୂଆଦିଲ୍ଲୀ: ଟେକ୍ନୋଲୋଜିକୁ ନେଇ ଦୁନିଆ ଆଗକୁ ବଢ଼ୁଥିବା ବେଳେ ନୂଆ ନୂଆ ସମସ୍ୟା ବି ଆସୁଛି । ସାଇବର କ୍ରାଇମ୍‌ରୁ ନେଇ ଏକାଧିକ ପ୍ରକାର ଅନଲାଇନ୍ ଅପରାଧ ସମସ୍ତଙ୍କ ଚିନ୍ତା ବଢ଼ାଇଛି । ଯାହାକୁ ନେଇ ସୁପ୍ରିମକୋର୍ଟର ପ୍ରଧାନ ବିଚାରପତି ବିଆର୍ ଗବାଇ ଚିନ୍ତାବ୍ୟକ୍ତ କରିଛନ୍ତି ।

ଶନିବାର ଏକ କାର୍ଯ୍ୟକ୍ରମରେ ସୁପ୍ରିମକୋର୍ଟର ପ୍ରଧାନ ବିଚାରପତି କହିଛନ୍ତି, "ଡିଜିଟାଲ୍ ଯୁଗରେ ମହିଳାଙ୍କୁ ଅନେକ ନୂଆ ଆହ୍ଵାନ ଓ ବିପଦର ସମ୍ମୁଖୀନ ହେବାକୁ ପଡ଼ୁଛି । ପ୍ରଯୁକ୍ତିବିଦ୍ୟା ବା ଟେକ୍ନୋଲୋଜି ସଶକ୍ତିକରଣ ନୁହେଁ, ଶୋଷଣର ମାଧ୍ୟମ ହୋଇ ଯାଇଛି ।"

ଏଥିସହ ପଢ଼ନ୍ତୁ: ନୂଆପଡ଼ା ଉପନିର୍ବାଚନ ପୂର୍ବରୁ BJDକୁ ଶକ୍ତ ଝଟ୍‌କା, ପଦ୍ମ ଧରିଲେ ଜୟ ଢୋଲକିଆ

ପ୍ରଧାନ ବିଚାରପତି ବିଆର୍ ଗବାଇ କହିଛନ୍ତି, "ଝିଅ, ମହିଳାମାନଙ୍କ ପାଇଁ ଆଜି ଅନଲାଇନ୍ ନିର୍ଯାତନା, ସାଇବର ବୁଲିଂ, ବ୍ୟକ୍ତିଗତ ତଥ୍ୟର ଅପବ୍ୟବହାର, ଡିପଫେକ୍ ଫଟୋ ଆଜି ବଡ଼ ଚିନ୍ତାର ବିଷୟ । ଏହି ବିପଦରୁ ବର୍ତ୍ତିବା ଲାଗି ପୋଲିସ ଓ ଅଧିକାରୀଙ୍କୁ ବିଶେଷ ଟ୍ରେନିଂର ଆବଶ୍ୟକତା ରହିଛି । ଯେମିତି ଏଭଳି ମାମଲାକୁ ସେମାନେ ବୁଝି ବିଚାରି ସମ୍ବେଦନଶୀଳତାର ସହ ସମ୍ଭାଳି ପାରିବେ ।"

ଜୁଭେନାଇଲ୍ ଜଷ୍ଟିସ୍ କମିଟି ଓ ୟୁନିସେଫ୍ ଇଣ୍ଡିଆ ଦ୍ଵାରା ଆୟୋଜିତ ରାଷ୍ଟ୍ରୀୟ ସମ୍ମିଳନୀ "ସେଫ୍‌ଗାର୍ଡିଂ ଦ୍ ଗର୍ଲ ଚାଇଲ୍ଡ" କାର୍ଯ୍ୟକ୍ରମରେ ମହିଳା ଓ ଝିଅଙ୍କ ସୁରକ୍ଷାକୁ ନେଇ ଏହି କଥା କହିଛନ୍ତି ପ୍ରଧାନ ବିଚାରପତି ।

ଏହି କାର୍ଯ୍ୟକ୍ରମରେ ଜଷ୍ଟିସ ବିବି ନାଗରତ୍ନା, ଜଷ୍ଟିସ୍ ଦେବି ପାରଦିୱାଲା, କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଅନ୍ନପୂର୍ଣ୍ଣ ଦେବୀ ଓ ୟୁନିସେଫ୍ ଇଣ୍ଡିଆର ପ୍ରତିନିଧି ସିନ୍ଥିଆ ପ୍ରମୁଖ ଯୋଗ ଦେଇଥିଲେ । ଯେଉଁଠି ପ୍ରଧାନ ବିଚାରପତି କହିଥିଲେ, "ଝିଅଙ୍କ ସୁରକ୍ଷା ଅର୍ଥ କେବଳ ସେମାନଙ୍କ ଶରୀର ସୁରକ୍ଷା ନୁହେଁ ବରଂ ସେମାନଙ୍କ ଆତ୍ମାକୁ ମଧ୍ୟ ସ୍ଵାଧୀନତା ଦେବା ।"

ଏଥିସହ ପଢ଼ନ୍ତୁ: ଓଡ଼ିଆ ଛାତ୍ରୀଙ୍କୁ ପଶ୍ଚିମବଙ୍ଗରେ ଗଣଦୁଷ୍କର୍ମ ଅଭିଯୋଗ

ପ୍ରଧାନ ବିଚାରପତି ଆହୁରି କହିଛନ୍ତି, "ସାମ୍ବାଧାନିକ ଗ୍ୟାରେଣ୍ଟି ପରେ ମଧ୍ୟ ଦେଶରେ ଝିଅଙ୍କୁ ସେମାନଙ୍କ ପାରମ୍ପରିକ ଅଧିକାର ଓ ସମ୍ମାନରୁ ବଞ୍ଚିତ କରାଯାଉଛି । ଏହି ସ୍ଥିତି ଯୌନ ଶୋଷଣ, ମାନବ ଚାଲାଣ, ବାଲ୍ୟ ବିବାହ ଓ ଭେଦଭାବକୁ ପ୍ରୋତ୍ସାହନ ଦେଉଛି ।"

ପ୍ରଧାନ ବିଚାରପତି କହିଛନ୍ତି, "ଡିଜିଟାଲ୍ ଯୁଗରେ ଭୌତିକ ଦୁନିଆରୁ ବାହାରି ବିପଦ ଏବେ ଭର୍ଚୁଆଲ୍ ଦୁନିଆରେ ପହଞ୍ଚି ସାରିଲାଣି । ଯେଉଁଠି ଟେକ୍ନୋଲୋଜି ସୁଯୋଗ ଦେଉଛି, ସେଇଠି ନୂଆ ପ୍ରକାର ଶୋଷଣର ମାଧ୍ୟମ ବି ସାଜୁଛି ।"

Argus News | argus news | Odisha Latest News, Breaking News, Trending News, Live TV