ଆମ୍ ଆଦମି ପାର୍ଟିର ରାଜ୍ୟସଭା ସାଂସଦ ରାଘବ ଚଡ୍ଡାଙ୍କ ଉପନେତା ପଦରୁ ହଟାଯିବା ପରେ ଜାତୀୟ ରାଜନୀତି ବେଶ ସରଗରମ ହୋଇଛି । ରାଘବ ଚଡ୍ଡା ଗୃହରେ ପ୍ରମୁଖ ମୁଦ୍ଦା ନ ଉଠାଇ ସାଧାରଣ ପ୍ରସଙ୍ଗ ଉଠାଉଥିବାବେଳେ ମୋଦିଙ୍କ ବିରୁଦ୍ଧରେ କହିବାକୁ ଡରୁଥିବା ନେଇ ଆପ୍ ଅଭିଯୋଗ ଆଣିଛି । ଏହାରି ମଧ୍ୟରେ ରାଘବଙ୍କ ସପକ୍ଷରେ ବାହାରିଛି କଂଗ୍ରେସ । ରାଘବ ଯାହା କରିଛନ୍ତି ସମ୍ପୂର୍ଣ୍ଣ ଠିକ୍ କରିଛନ୍ତି । ଅନ୍ୟ ନେତାଙ୍କୁ ବି ଏହି ରାସ୍ତାରେ ଅଗ୍ରସର ହେବା ଉଚିତ ବୋଲି କଂଗ୍ରେସ ନେତା ଉଦିତ ରାଜ କହିଛନ୍ତି ।

ଆପ୍ ପୂର୍ବରୁ କଂଗ୍ରେସକୁ ବଦନାମ କରିବାକୁ ବି ଉଦ୍ୟମ କରୁଥିଲା । ଆପ୍ ଜନତାଙ୍କୁ ଧୋକା ଦେଇଥିଲା ଓ ସେମାନଙ୍କଠାରୁ ଲୁଟ୍ କରି କଂଗ୍ରେସକୁ ବଦନାମ କରୁଥିଲା । କିନ୍ତୁ ପରବର୍ତ୍ତୀ ପର୍ଯ୍ୟାୟରେ ଏହି ସମସ୍ତ ଅଭିଯୋଗ ପ୍ରମାଣିତ ହୋଇନଥିଲା । ଏବେ ସେମାନେ ନିଜ ଦଳର ନେତା ରାଘବ ଚଡ୍ଡାଙ୍କୁ ଘେରିଯାଇଛନ୍ତି ଏବଂ ତାଙ୍କ ବିରୋଧରେ ଅଭିଯୋଗ ଆଣୁଛନ୍ତି । ହେଲେ ରାଘବ ଚଡ୍ଡା ଯାହା କରିଛନ୍ତି ଠିକ୍ କରିଛନ୍ତି ଏବଂ ଅନ୍ୟମାନଙ୍କୁ ସେହି ରାସ୍ତାରେ ଚାଲିବା ଆବଶ୍ୟକ ବୋଲି ଉଦିତ୍ ରାଜ କହିଛନ୍ତି ।

• 'ରାଘବ ଚୁପ୍ ରହିବା ଉଚିତ ନୁହେଁ'

କଂଗ୍ରେସ ନେତା ଉଦିତ ରାଜ ରାଘବ ଚଡ୍ଡାଙ୍କୁ ଚୁପ୍ ନ ରହିବାକୁ ମଧ୍ୟ ପରାମର୍ଶ ଦେଇଛନ୍ତି । ସେ କହିଛନ୍ତି, "ରାଜନୀତି କୌଣସି ବ୍ୟକ୍ତିଗତ ପ୍ରସଙ୍ଗ ନୁହେଁ, ଏହା ସାର୍ବଜନୀନ । ରାଘବ ଚଡ୍ଡା କାହିଁକି ଚୁପ୍ ରହୁଛନ୍ତି ? ତାଙ୍କୁ କିଏ ଚୁପ୍ ରହିବାକୁ ବାଧ୍ୟ କରିଛି ? ରାଘବଙ୍କୁ ଏହି ପ୍ରସଙ୍ଗ ଉପରେ ଖୋଲାଖୋଲି ଭାବେ ପ୍ରତିକ୍ରିୟା ଦେବା ଉଚିତ । ଯଦି ରାଘବ ଦଳଠାରୁ ଅସନ୍ତୋଷ ଅଛନ୍ତି ତେବେ ସେ ସମ୍ପର୍କରେ କହିବା ଉଚିତ ।"

ପଢନ୍ତୁ ଏହି ଖବର: କାହିଁକି ରାଘବ ଚଡ୍ଡାଙ୍କୁ ରାଜ୍ୟସଭା ଉପନେତା ପଦରୁ ହଟାଇଲା AAP; କହିଲା କାରଣ

• ପାର୍ଟିର ନିଷ୍ପତ୍ତି ଉପରେ କଣ କହିଥିଲେ ରାଘବ ?

ରାଘବଙ୍କୁ ରାଜ୍ୟସଭା ଉପନେତା ପଦରୁ ହଟାଇ ଦିଆଯିବା ପରେ ରାଘବ ଏକ୍ସ ହ୍ୟାଣ୍ଡେଲରେ ଏକ ଭିଡିଓ ପୋଷ୍ଟ କରିଥିଲେ ଓ କହିଥିଲେ ତାଙ୍କୁ ସଂସଦରେ ଯେତେବେଳେ କହିବାକୁ ସୁଯୋଗ ମିଳେ ସେତେବେଳେ ସେ ସାଧାରଣ ଜନତାଙ୍କ ପ୍ରସଙ୍ଗ ଉଠାନ୍ତି । ସଂସଦରେ ଯେଉଁ ପ୍ରସଙ୍ଗକୁ ଅଣଦେଖା କରାଯାଏ, ସେ ସେହି ପ୍ରସଙ୍ଗକୁ ଉଠାଇଥାନ୍ତି । ଏହି ସମସ୍ୟାଗୁଡ଼ିକ ଉଠାଇ କଣ ସେ କିଛି ଭୁଲ୍ କରିଛନ୍ତି ବୋଲି ପ୍ରଶ୍ନ କରିଥିଲେ । ଏହାପରେ ଦଳ ପକ୍ଷରୁ ତାଙ୍କୁ ଟାର୍ଗେଟ୍ କରାଯାଇଛି । ସେ ପ୍ରଧାନମନ୍ତ୍ରୀ ମୋଦିଙ୍କ ବିରୁଦ୍ଧରେ କହିବାକୁ ଡରୁଛନ୍ତି ବୋଲି ଆପର ବିଭିନ୍ନ ନେତା ଅଭିଯୋଗ କରିଛନ୍ତି ।