ଦିଲ୍ଲୀ-ଏନସିଆରରେ ବଢ଼ୁଥିବା ପ୍ରଦୂଷଣକୁ ଦୃଷ୍ଟିରେ ରଖି ଦିଲ୍ଲୀ ସରକାର ଏକ ବଡ଼ ଘୋଷଣା କରିଛନ୍ତି। ଗୁରୁବାରଠାରୁ ଦିଲ୍ଲୀର ସମସ୍ତ ସରକାରୀ ଏବଂ ବେସରକାରୀ ପ୍ରତିଷ୍ଠାନରେ ୫୦ ପ୍ରତିଶତ କର୍ମଚାରୀ ଘରୁ କାମ କରିବା ବାଧ୍ୟତାମୂଳକ କରାଯାଇଛି । ପ୍ରଦୂଷଣ ସ୍ତର ଏବଂ ରାସ୍ତାରେ ଯାନବାହାନ ସଂଖ୍ୟା ହ୍ରାସ କରିବା ପାଇଁ ଏହି ନିଷ୍ପତ୍ତି ନିଆଯାଇଛି। ନିୟମ ଉଲ୍ଲଂଘନ କରୁଥିବା ସଂସ୍ଥାଗୁଡ଼ିକୁ ଭାରୀ ଜରିମାନା ଦେବାକୁ ପଡିବ ।

GRAP-3 ନିୟମ ଅନୁଯାୟୀ ଲାଗୁ ହୋଇଥିବା ନିର୍ମାଣ ନିଷେଧ ଦ୍ୱାରା ପ୍ରଭାବିତ ପଞ୍ଜିକୃତ ନିର୍ମାଣ ଶ୍ରମିକଙ୍କୁ ଦିଲ୍ଲୀ ସରକାର ୧୦ ହଜାର ଟଙ୍କ କ୍ଷତିପୂରଣ ପ୍ରଦାନ କରିବେ ।

ଦିଲ୍ଲୀ କ୍ୟାବିନେଟ ମନ୍ତ୍ରୀ କପିଲ ମିଶ୍ର ଘୋଷଣା କରିଛନ୍ତି ଯେ ଆସନ୍ତାକାଲିଠାରୁ ଦିଲ୍ଲୀର ସମସ୍ତ ସରକାରୀ ଏବଂ ବେସରକାରୀ ପ୍ରତିଷ୍ଠାନରେ ୫୦ ପ୍ରତିଶତ କର୍ମଚାରୀ ଘରୁ କାମ କରିବା ବାଧ୍ୟତାମୂଳକ ହେବ । ଶ୍ରମ ବିଭାଗ ନିଷ୍ପତ୍ତି ନେଇଛି ଯେ GRAP-3 ସମୟରେ ୧୬ ଦିନିଆ ନିର୍ମାଣ ବନ୍ଦ ଯୋଗୁଁ ପ୍ରଭାବିତ ପଞ୍ଜିକୃତ ଶ୍ରମିକଙ୍କ ଆକାଉଣ୍ଟକୁ ଦିଲ୍ଲୀ ସରକାର ସିଧାସଳଖ ୧୦ ହଜାର ଟଙ୍କା କ୍ଷତିପୂରଣ ପ୍ରଦାନ କରିବେ । ତେବେ ଯେଉଁମାନେ ଏହି ନିୟମ ପାଳନ କରିବେନି ସେମାନଙ୍କ ବିରୋଧରେ କଡ଼ା ଜରିମାନା କରାଯିବ ।

ଅଧିକ ପଢ଼ନ୍ତୁ: ପ୍ରେମିକା ସହ ସମୟ କାଟିବାକୁ ଏମିତି ଆପ୍ଲିକେସନ ଲେଖିଲେ କର୍ମଚାରୀ

ବୁଧବାର ଦିଲ୍ଲୀର ବାୟୁ ଗୁଣବତ୍ତା ସୂଚକାଙ୍କ(AQI) ୩୨୯ ରହିଛି । ଯାହା ଗତ ତିନି ଦିନ ଧରି ରାଜଧାନୀକୁ ଘେରି ରହିଥିବା ଗମ୍ଭୀର ପ୍ରଦୂଷଣରୁ କିଛି ଉନ୍ନତି ଆଣିଛି । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (CPCB) ଅନୁଯାୟୀ, ସକାଳ ୭ଟାରେ ଦିଲ୍ଲୀର ସମସ୍ତ ମନିଟରିଂ ଷ୍ଟେସନରେ AQI ଗମ୍ଭୀର ସୀମା ତଳେ ଥିଲା ।

CPCB ଅନୁଯାୟୀ, ୦ ରୁ ୫୦ ମଧ୍ୟରେ AQIକୁ "ଭଲ", ୫୧ ରୁ ୧୦୦ "ସନ୍ତୋଷଜନକ", ୧୦୧ ରୁ ୨୦୦ "ମଧ୍ୟମ", ୨୦୧ ରୁ ୩୦୦ "ଖରାପ", ୩୦୧ ରୁ ୪୦୦ "ଅତ୍ୟନ୍ତ ଖରାପ" ଏବଂ ୪୦୧ ରୁ ୫୦୦ "ଗମ୍ଭୀର" ବୋଲି ବିବେଚନା କରାଯାଏ ।

ଗତ ତିନି ଦିନ ଧରି ଜାତୀୟ ରାଜଧାନୀକୁ ଘେରି ରହିଥିବା ଘନ କୁହୁଡ଼ି ବିମାନ ଏବଂ ପରିବହନ ସେବାକୁ ଗୁରୁତର ଭାବରେ ପ୍ରଭାବିତ କରିଥିଲା, ଯାହା ଫଳରେ ଅନେକ ସଡ଼କ ଦୁର୍ଘଟଣା ଘଟିଥିଲା । ବାୟୁ ଗୁଣବତ୍ତା ସ୍ତର ଖରାପ ହେବା ଯୋଗୁଁ ରାଜଧାନୀରେ ସବୁଠାରୁ କଠୋର ପ୍ରଦୂଷଣ ପ୍ରତିବନ୍ଧକ, GRAP ୪ କାର୍ଯ୍ୟକାରୀ ହୋଇଛି ।