ଦିଲ୍ଲୀ ବୋମା ବିସ୍ଫୋରଣ ମାମଲା ତଦନ୍ତ ସମୟରେ ପୋଲିସକୁ ମିଳିଲା ବଡ଼ ସୁରାକ । ତଦନ୍ତରୁ ଜଣାପଡିଛି ଯେ ସନ୍ଦିଗ୍ଧ ବ୍ୟକ୍ତିଙ୍କ ପାଖରେ ଗୋଟିଏ ନୁହେଁ ଦୁଇଟି କାର ଥିଲା । Hyundai i20 ବ୍ୟତୀତ ଆଉ ଏକ ଲାଲ୍ ରଙ୍ଗର ଫୋର୍ଡ ଇକୋ ସ୍ପୋର୍ଟ୍ସ କାର ସନ୍ଦିଗ୍ଧ ପାଖରେ ଥିଲା ବୋଲି ପୋଲିସକୁ ସୂଚନା ମିଳିଛି । ତେବେ ସୁରାକ ମିଳିବା ପରେ ଦିଲ୍ଲୀର ସମସ୍ତ ପୋଲିସ ଷ୍ଟେସନ, ପୋଲିସ ପୋଷ୍ଟ ଏବଂ ବର୍ଡର ଚେକ୍‌ ପୋଷ୍ଟଗୁଡ଼ିକୁ ସତର୍କ କରାଯାଇଛି । ତେବେ ଏହି କାର ନମ୍ବର ହେଉଛି DL10CK0458 । ଯାହାକି ଉମର ଉନ୍ ନବି ନାମକ ଜଣେ ବ୍ୟକ୍ତିଙ୍କ ନାମରେ ରେଜିଷ୍ଟ୍ରେସନ୍‌ ରହିଛି ।

ଦିଲ୍ଲୀ ପୋଲିସ ସମସ୍ତ ଟିମ୍‌କୁ ଏହି କାରକୁ ତୁରନ୍ତ ଖୋଜିବା ପାଇଁ ନିର୍ଦ୍ଦେଶ ଦେଇଛି । ଦିଲ୍ଲୀ ପୋଲିସ୍‌ର ପାଞ୍ଚଟି ଟିମ୍‌ ଏବେ ବିଭିନ୍ନ ଅଞ୍ଚଳରେ ସର୍ଚ୍ଚ ଅପରେସନ୍ ଜାରି ରଖିଛନ୍ତି । ଉତ୍ତର ପ୍ରଦେଶ ଏବଂ ହରିୟାଣା ପୋଲିସକୁ ମଧ୍ୟ ସତର୍କ କରାଯାଇଛି । ନିକଟବର୍ତ୍ତୀ ଟୋଲ୍ ପ୍ଲାଜାରୁ ମଧ୍ୟ କାର ବିଷୟରେ ସୂଚନା ସଂଗ୍ରହ କରାଯାଉଛି ।
ସୂଚନା ଅନୁଯାୟୀ, ପୋଲିସକୁ ତୁରନ୍ତ ଯେ କୌଣସି ନାଲି ଫୋର୍ଡ ଇକୋସ୍ପୋର୍ଟକୁ ଅଟକାଇବା ଏବଂ ଜବତ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଏହା ସହ ପାଟ୍ରୋଲିଂ କିମ୍ବା ପିକେଟରେ ନିୟୋଜିତ ସମସ୍ତ କର୍ମଚାରୀଙ୍କୁ ସମ୍ପୂର୍ଣ୍ଣ ସଶସ୍ତ୍ର ରହିବାକୁ ନିର୍ଦ୍ଦେଶ ଦିଆଯାଇଛି।

ଅଧିକ ପଢ଼ନ୍ତୁ: ଦିଲ୍ଲୀ ବିସ୍ଫୋରଣ ମାମଲାରେ ବଡ଼ ଖୁଲାସା: ଜାନୁୟାରୀ ୨୬ରେ ହୋଇଥାନ୍ତା ବଡ଼ ଆକ୍ରମଣ

ତେବେ ଏସବୁ ମଧ୍ୟରେ ଅକ୍ଟୋବର ୨୯ ତାରିଖର ଫରିଦାବାଦରୁ ଏକ ନୂଆ ଭିଡିଓ ସାମ୍ନାକୁ ଆସିଛି। ଏହି ଫୁଟେଜ୍ ଏକ ପେଟ୍ରୋଲ ପମ୍ପ ନିକଟରୁ ମିଳିଛି । ଭିଡିଓରେ କାରରେ ତିନି ଜଣ ଲୋକ ଥିବା ଦେଖିବାକୁ ମିଳୁଛି । ତଦନ୍ତକାରୀ ସଂସ୍ଥାର ସୂଚନା ଅନୁଯାୟୀଳ ଉମର ଏବଂ ତାରିକ ନିଜେ ପ୍ରଦୂଷଣ ଯାଞ୍ଚ କରିବାକୁ ଆସିଥିଲେ ।
ସେପଟେ ଲାଲକିଲ୍ଲା ନିକଟରେ ବିସ୍ଫୋରଣ ପରେ ତଦନ୍ତ ଦାୟିତ୍ବ NIAକୁ ଦିଆଯାଇଛି । NIAର ସ୍ବତନ୍ତ୍ର ଟିମ୍‌ ବିସ୍ଫୋରଣ ସ୍ଥଳକୁ ଟିକନିକ୍‌ ତଦନ୍ତ କରୁଛି ।

ତେବେ ଏହି ବିସ୍ଫୋରଣ ଘଟଣା ପରେ ଦିଲ୍ଲୀକୁ ହାଇ ଆଲର୍ଟରେ ରଖାଯାଇଛି । ଦିଲ୍ଲୀରେ ଏକ ବଡ଼ ସର୍ଚ୍ଚ ଅପରେସନ୍ ଚାଲିଛି । ବିସ୍ଫୋରଣରେ ଏବେ ସୁଦ୍ଧା ୧୨ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଛନ୍ତି। ଦିଲ୍ଲୀର ସମସ୍ତ ପ୍ରବେଶ ଏବଂ ପ୍ରସ୍ଥାନ ସ୍ଥାନରେ ଅର୍ଦ୍ଧସାମରିକ ବାହିନୀ ସହିତ ବହୁ ସଂଖ୍ୟକ ପୋଲିସ କର୍ମଚାରୀ ମୁତୟନ ଅଛନ୍ତି । ସହରରେ ପ୍ରବେଶ ଏବଂ ପ୍ରସ୍ଥାନ କରୁଥିବା ଯାନବାହାନଗୁଡ଼ିକର ସମ୍ପୂର୍ଣ୍ଣ ଯାଞ୍ଚ କରାଯାଉଛି ।