ଜାତୀୟ ରାଜଧାନୀ ଦିଲ୍ଲୀର ଏକ ସ୍ଵତନ୍ତ୍ର କୋର୍ଟ ମଙ୍ଗଳବାର ଆତଙ୍କବାଦୀ ବିରୋଧୀ ଆଇନ UAPA ଅଧୀନସ୍ଥ ଏକ ମାମଲାରେ କାଶ୍ମୀର ଉଗ୍ରବାଦୀ ତଥା ଦୁଖତରାନ-ଏ-ମିଲ୍ଲତର ପ୍ରମୁଖ ଆସିୟା ଅନ୍ଦ୍ରାବୀକୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି । ଏହାସହିତ ତାର ଦୁଇ ସହଯୋଗୀ ସୋଫି ଫହମିଦା ଓ ନାହିଦା ନସରିନକୁ ୩୦-୩୦ ବର୍ଷ ଲେଖାଏଁ କାରାଦଣ୍ଡରେ ଦଣ୍ଡିତ କରିଛନ୍ତି । ଏହି ତିନି ଜଣଙ୍କୁ ଜାନୁଆରୀ ୧୪ରେ ୟୁଏପିଏର ବିଭିନ୍ନ ପ୍ରାବଧାନ ଓ ଅପରାଧୀ କାର୍ଯ୍ୟକଳାପ ଲାଗି ଦୋଷୀ ସାବ୍ୟସ୍ତ କରାଯାଇଥିଲା । ଏମାନେ ଦେଶ ବିରୋଧରେ ଲୋକଙ୍କୁ ପ୍ରବର୍ତ୍ତାଇବା ସହ ଯୁଦ୍ଧ ପରିସ୍ଥିତି ସୃଷ୍ଟି କରିବା ଲାଗି ଉଦ୍ୟମ କରୁଥିବା ଅଭିଯୋଗ ମଧ୍ୟ ଥିଲା ।

କୋର୍ଟଙ୍କ ଏହି ରାୟ ସେତେବେଳେ ଆସିଛି, ଯେତେବେଳେ ଜାତୀୟ ତଦନ୍ତକାରୀ ସଂସ୍ଥା (NIA) ଚଳିତ ମାସ ପ୍ରାରମ୍ଭରେ ଅନ୍ଦ୍ରାବୀ ଲାଗି ଆଜୀବନ କାରାଦଣ୍ଡ ଦାବି କରିଥିଲେ । ଆସିୟା ଅନ୍ଦ୍ରାବୀ ତାର ସଂଗଠନ ସହ ମିଶି ଭାରତ ବିରୋଧରେ ଯୁଦ୍ଧ ପରିସ୍ଥିତି ସୃଷ୍ଟି କରୁଥିଲା ବୋଲି ସଂସ୍ଥା ଯୁକ୍ତି ବାଢିଥିଲା । ଏହି ଦଣ୍ଡ ସେହି ଉଗ୍ରବାଦୀଙ୍କୁ ଏକ ଦୃଢ ଚେତାବନୀ ଦେବ ଯେ ଭାରତ ବିରୋଧୀ କାର୍ଯ୍ୟକଳାପ ଲାଗେ ଏହାକୁ ବରଦାସ୍ତ କରାଯିବନାହିଁ ।

• କିଏ ଆସିୟା ଅନ୍ଦ୍ରାବୀ ?

କାଶ୍ମୀରର ଏହି ୬୨ ବର୍ଷୀୟ ମହିଳା ଆସିୟା ଅନ୍ଦ୍ରାବୀ ହେଉଛି ଦୁଖତରାନ-ଏ-ମିଲ୍ଲତର ସଂସ୍ଥାପକ । ଏହି ସଂଗଠନର ସ୍ଥାପନା ପ୍ରାରମ୍ଭରୁ ଏକ ସାମାଜିକ ସୁଧାର ଆଣିବା ଲାଗି କରାଯାଇଥିଲା । ୨୦୧୮ରେ କେନ୍ଦ୍ର ସରକାର ଏହି ସଂଗଠନକୁ ଆତଙ୍କୀ ସଂଗଠନ ବୋଲି ଘୋଷଣା କରି ଏହା ଉପରେ ପ୍ରତିବନ୍ଧକ ଲଗାଇଥିଲେ । ଜମ୍ମୁ ଓ କାଶ୍ମୀରର ଧାରା ୩୭୦ ଉଚ୍ଛେଦ ହେବା ପରେ, ଅନ୍ଦ୍ରାବୀକୁ UAPA ଅଧୀନରେ ଦୋଷୀ ସାବ୍ୟସ୍ତ କରାଯାଇଥିଲା ।

ଆସିୟା ନିଜ ସଂଗଠନର ବ୍ୟବହାର ଦେଶରେ ଅଶାନ୍ତି ସୃଷ୍ଟି କରିବା ଓ ଜମ୍ମୁକାଶ୍ମୀରରେ ଭାରତ ବିରୋଧୀ ଚିନ୍ତାଧାରା ଲୋକମାନଙ୍କ ମୁଣ୍ଡରେ ଭର୍ତ୍ତି କରୁଥିଲା । ଭାରତର ଅବିଚ୍ଛେଦ ଅଙ୍ଗ କାଶ୍ମୀରକୁ ପାକିସ୍ତାନର ଅଂଶ ବୋଲି ମଧ୍ୟ କହୁଥିଲା । ଏଜେନ୍ସି ଏହା ମଧ୍ୟ କୋର୍ଟକୁ କହିଛି ଯେ ଅନ୍ଦ୍ରାବୀର ଅପରାଧିକ କାର୍ଯ୍ୟକଳାପ କଥା କହିଲେ ତାହା ଇତିହାସ ହେବ । ଜମ୍ମୁକାଶ୍ମୀରରେ ଅନ୍ଦ୍ରାବୀ ବିରୋଧରେ ପ୍ରାୟ ୩୩ଟି ମାମଲା ରୁଜୁ ହୋଇଛି । ସେହିପରି ତାର ସହଯୋଗୀ ଫହମିଦା ଓ ନସରିନ ବିରୋଧରେ ମଧ୍ୟ ଯଥାକ୍ରମେ ୯ ଓ ୫ଟି ମାମଲା ରୁଜୁ ହୋଇଛି । ଏମାନଙ୍କ ବିରୋଧରେ ୟୁଏପିଏର ଧାରା ୨୦, ୩୮ ଓ ୩୯ ଲାଗିଛି ।

ଅଧିକ ଖବର ପଢନ୍ତୁ...