Delhi Government Holiday / ସେପ୍ଟେମ୍ବର ୧୧ରେ ଦିଲ୍ଲୀରେ ସରକାରୀ ଛୁଟି, ବନ୍ଦ ରହିବ ସମସ୍ତ ସରକାରୀ ଅନୁଷ୍ଠାନ

ଦିଲ୍ଲୀବାସୀଙ୍କ ପାଇଁ ବଡ଼ ଖବର । ଆସନ୍ତା ସେପ୍ଟେମ୍ବର ୧୧ ତାରିଖରେ ରାଜଧାନୀ ଦିଲ୍ଲୀରେ ସରକାରୀ ଛୁଟି ଘୋଷଣା କରାଯାଇଛି । ଦିଲ୍ଲୀରେ ହେବାକୁ ଥିବା ଅନ୍ତର୍ଜାତୀୟ BRICS ସମିଟ୍‌କୁ ଦୃଷ୍ଟିରେ ରଖି ଭିଭିଆଇପି ସୁରକ୍ଷା, ଟ୍ରାଫିକ୍ ପରିଚାଳନା ଏବଂ ସହରରେ ସୁଗମ ଯାତାୟାତକୁ ନିଶ୍ଚିତ କରିବା ପାଇଁ ଏହି ନିଷ୍ପତ୍ତି ନିଆଯାଇଛି ।

ଦିଲ୍ଲୀର ଉପରାଜ୍ୟପାଳଙ୍କ ଅନୁମୋଦନ ପରେ ଏନେଇ ସାଧାରଣ ପ୍ରଶାସନ ବିଭାଗ ପକ୍ଷରୁ ବିଧିବଦ୍ଧ ବିଜ୍ଞପ୍ତି ଜାରି କରାଯାଇଛି । ୩ ସେପ୍ଟେମ୍ବର ୨୦୨୬ରେ ଜାରି ହୋଇଥିବା ଏହି ବିଜ୍ଞପ୍ତି ଅନୁସାରେ, ୧୧ ସେପ୍ଟେମ୍ବରରେ ଦିଲ୍ଲୀ ସରକାର ଅଧୀନରେ ଥିବା ସମସ୍ତ ସରକାରୀ କାର୍ଯ୍ୟାଳୟ, ସ୍ୱୟଂଶାସିତ ସଂସ୍ଥା ଏବଂ PSU ବନ୍ଦ ରହିବ ।
ଆସନ୍ତା BRICS ଶିଖର ସମ୍ମିଳନୀରେ ବିଭିନ୍ନ ସଦସ୍ୟ ଦେଶର ରାଷ୍ଟ୍ରମୁଖ୍ୟ ଓ ବହୁ ବିଦେଶୀ ପ୍ରତିନିଧି ଯୋଗଦେବାର ଥିବାରୁ ରାଜଧାନୀରେ ସୁରକ୍ଷା ବ୍ୟବସ୍ଥାକୁ ଅତ୍ୟନ୍ତ କଡ଼ାକଡ଼ି କରାଯିବ । ଭିଭିଆଇପିଙ୍କ ଯାତାୟାତ ପାଇଁ ଅନେକ ରୁଟ୍‌ରେ ଟ୍ରାଫିକ୍ ବ୍ୟବସ୍ଥାରେ ପରିବର୍ତ୍ତନ ହୋଇପାରେ । ଏହା ସହିତ ସମ୍ଭାବ୍ୟ ଟ୍ରାଫିକ୍ ଜାମ୍ ଓ ସାଧାରଣ ଲୋକଙ୍କ ଅସୁବିଧାକୁ କମାଇବା ପାଇଁ ସରକାରୀ ଛୁଟି ଘୋଷଣା କରାଯାଇଛି ।

Delhi LG has declared a holiday on 11th September 2026 in view of BRICS Summit pic.twitter.com/aaJKS9wWvp

— ANI (@ANI) September 3, 2026

ଏହି ଛୁଟି ଯୋଗୁଁ ସରକାରୀ କର୍ମଚାରୀଙ୍କ ଯାତାୟାତ କମିବ ଏବଂ ଦିଲ୍ଲୀର ରାସ୍ତାରେ ଭିଡ଼ ମଧ୍ୟ ହ୍ରାସ ପାଇବ ବୋଲି ପ୍ରଶାସନ ଆଶା କରୁଛି । ଫଳରେ ସୁରକ୍ଷା ଏଜେନ୍ସିଗୁଡ଼ିକ ବିଦେଶୀ ଅତିଥି ଓ ରାଷ୍ଟ୍ରମୁଖ୍ୟମାନଙ୍କ ସୁରକ୍ଷା ବ୍ୟବସ୍ଥାକୁ ଅଧିକ ସୁବିଧାରେ ପରିଚାଳନା କରିପାରିବେ । ବିଜ୍ଞପ୍ତିରେ ଏହା ମଧ୍ୟ ସ୍ପଷ୍ଟ କରାଯାଇଛି ଯେ ୧୧ ସେପ୍ଟେମ୍ବରରେ ଦିଲ୍ଲୀ ସରକାର ଅଧୀନରେ ଥିବା ସରକାରୀ ଅଫିସ୍ ଓ ସଂସ୍ଥାଗୁଡ଼ିକ ବନ୍ଦ ରହିବ । ଏହି ନୋଟିଫିକେସନ୍ ଦିଲ୍ଲୀ ଗଜେଟ୍‌ର ପାର୍ଟ-IVରେ ପ୍ରକାଶ ପାଇବ ।

ଅଧିକ ପଢ଼ନ୍ତୁ: ୟୁଜିସି ନେଟ୍ ପରୀକ୍ଷାରେ ତୃତୀୟ ଲିଙ୍ଗୀ ମୀରାଙ୍କ ସଫଳତା; ହେବେ ଆସିଷ୍ଟାଣ୍ଟ ପ୍ରଫେସର

ସାରା ଦିଲ୍ଲୀରେ BRICS ସମିଟ୍‌କୁ ନେଇ ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥାକୁ ନେଇ ପ୍ରଶାସନ ପକ୍ଷରୁ ବିଶେଷ ପ୍ରସ୍ତୁତି ଚାଲିଛି । ଅନ୍ତର୍ଜାତୀୟ ସ୍ତରର ଏହି ବଡ଼ କାର୍ଯ୍ୟକ୍ରମକୁ କୌଣସି ବାଧା ବିନା ସଫଳତାର ସହ ଆୟୋଜନ କରିବା ହିଁ ପ୍ରଶାସନର ମୁଖ୍ୟ ଲକ୍ଷ୍ୟ ରହିଛି ।