Transgender Qualifies UGC NET / ୟୁଜିସି ନେଟ୍ ପରୀକ୍ଷାରେ ତୃତୀୟ ଲିଙ୍ଗୀ ମୀରାଙ୍କ ସଫଳତା; ହେବେ ଆସିଷ୍ଟାଣ୍ଟ ପ୍ରଫେସର

ଛତିଶଗଡ଼ର ତୃତୀୟ ଲିଙ୍ଗ ସମ୍ପ୍ରଦାୟର ସଦସ୍ୟ ମୀରା ଯାଦବ । କଠିନ ପରିଶ୍ରମ କରି ୟୁଜିସି ନେଟ୍‌ରେ ଜୁନିୟର ରିସର୍ଚ୍ଚ ଫେଲୋସିପ୍ (JRF) ଏବଂ ଆସିଷ୍ଟାଣ୍ଟ ପ୍ରଫେସର ପଦବୀ ପାଇଁ ଯୋଗ୍ୟତା ଅର୍ଜନ କରିଛନ୍ତି । ମୀରା ସମାଜର ସେହି ଲୋକଙ୍କୁ ଏକ ଉପଯୁକ୍ତ ଜବାବ ଦେଇଛନ୍ତି ଯେଉଁମାନେ ସର୍ବଦା ତୃତୀୟ ଲିଙ୍ଗକୁ କେବଳ ତାଳି ପାଇବା ପର୍ଯ୍ୟନ୍ତ ସୀମିତ ବୋଲି ଭାବନ୍ତି । 'ରଘୁବଂଶ' ଭାବରେ ପରିଚିତ ମୀରା କେବଳ ନିଜର ପ୍ରକୃତ ପରିଚୟ ଗ୍ରହଣ କରିନାହାଁନ୍ତି ବରଂ ଜାତୀୟ ସ୍ତରର ପରୀକ୍ଷାରେ ଉତ୍ତୀର୍ଣ୍ଣ ହୋଇ ଅନେକ ଛାତ୍ରଛାତ୍ରୀଙ୍କ ପାଇଁ ପ୍ରେରଣାର ଉତ୍ସ ପାଲଟିଛନ୍ତି ।

ଭାରତୀୟ ବିଶ୍ୱବିଦ୍ୟାଳୟ ଏବଂ ମହାବିଦ୍ୟାଳୟଗୁଡ଼ିକରେ ଆସିଷ୍ଟାଣ୍ଟ ପ୍ରୋଫେସର ପାଇଁ ଜାତୀୟ ସ୍ତରରେ ଏହି ପରୀକ୍ଷା କରାଯାଇଥାଏ । ସମାଜରେ ଅନେକ ଟାହିଟାପରା ଭିତରେ ବି ମୀରା ନିଜର ଆତ୍ମବିଶ୍ଵାସକୁ ଉଚ୍ଚରେ ରଖିଥିଲେ । ଦିନରାତି ପାଠ ପଢି ଶେଷରେ ସେ ୟୁଜିସି ନେଟ୍‌ରେ JRF ଏବଂ ଆସିଷ୍ଟାଣ୍ଟ ପ୍ରଫେସର ପଦବୀ ପାଇଁ ଯୋଗ୍ୟତା ଅର୍ଜନ କରି ଇତିହାସ ସୃଷ୍ଟି କରିଛନ୍ତି । ଏହି ପରୀକ୍ଷାରେ କୃତକାର୍ଯ୍ୟ ହେଲେ କଲେଜ ବା ୟୁନିଭର୍ସିଟିରେ ଅଧ୍ୟାପକ ଚାକିରି ପାଇଁ ଯୋଗ୍ୟ ବିବେଚିତ ହୁଅନ୍ତି । ଏହାସହ ପିଏଚ୍‌.ଡି. (Ph.D) ଗବେଷଣା ପାଇଁ ସରକାରଙ୍କ ପକ୍ଷରୁ ମାସିକ ଆର୍ଥିକ ସହାୟତା (ଷ୍ଟାଇପେଣ୍ଡ) ମିଳିଥାଏ ।

• "ବିଶ୍ୱାସ ସାଜିଲା ସବୁଠୁ ବଡ଼ ଶକ୍ତି"

ବର୍ତ୍ତମାନ ପ୍ରଥମ ବର୍ଷ ଏଲଏଲବି ପଢୁଥିବା ମୀରାଙ୍କ ସ୍ୱପ୍ନ ଏତିକିରେ ସୀମିତ ନୁହେଁ । ସେ ପିଏଚଡି କରିବାକୁ ଏବଂ ଉଚ୍ଚଶିକ୍ଷାରେ ପରବର୍ତ୍ତୀ ପିଢ଼ି ପାଇଁ ଜଣେ ପ୍ରେରଣାର ଉତ୍ସ ସାଜିବାକୁ ଚାହାନ୍ତି । ତେବେ ମୀରାଙ୍କ ଏହି ସଂଘର୍ଷର ଯାତ୍ରାରେ ତାଙ୍କ ମାମୁଁ ନନ୍ଦ କୁମାର, ଶିକ୍ଷକ ଏବଂ ଟ୍ରାନ୍ସଜେଣ୍ଡର ସମ୍ପ୍ରଦାୟର ସଭାପତି ମୁସ୍କାନଙ୍କ ଅଟଳ ସମର୍ଥନ ଏବଂ ବିଶ୍ୱାସ ଏକ ପ୍ରମୁଖ ଶକ୍ତି ପ୍ରଦାନ କରିଥିଲେ ବୋଲେ ସେ କହିଛନ୍ତି ।

• 'ଦୃଢ ଇଚ୍ଛାଶକ୍ତି ଥିଲେ ସବୁ ସମ୍ଭବ'

ସାମାଜିକ ଉପହାସ ଏବଂ ରୀତିବାଦୀ ଧାରଣାକୁ ପଛରେ ପକାଇ, ମୀରା ପ୍ରମାଣ କଲେ ଯେ ଜଣଙ୍କର ପରିଚୟ ଯାହା ହେଉନା କାହିଁକି, ଯଦି ଜଣଙ୍କର ସଂକଳ୍ପ ଦୃଢ଼ ଥାଏ ତେବେ ଯେକୌଣସି ଲକ୍ଷ୍ୟ ହାସଲ କରାଯାଇପାରିବ । ମୀରାଙ୍କ ଐତିହାସିକ ସଫଳତା କେବଳ ଏକ ବ୍ୟକ୍ତିଗତ ବିଜୟ ନୁହେଁ, ବରଂ ସମାଜର ମାନସିକତା ପରିବର୍ତ୍ତନ କରିବା ଏବଂ ସେମାନଙ୍କ ଅଧିକାର ପାଇଁ ଲଢ଼ୁଥିବା ପ୍ରତ୍ୟେକ ବ୍ୟକ୍ତିଙ୍କ ସାହସର ବିଜୟ ।

ପଢନ୍ତୁ ଏହି ଖବର: ସରକାର ଆଣିଲେ ନୂଆ ଯୋଜନା 'ସ୍ଵୀକୃତି'; ସ୍ଵାବଲମ୍ବୀ ହେବେ କିନ୍ନର, ମିଳିବ ସାମାଜିକ ନ୍ୟାୟ

ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ମୀରା କହିଛନ୍ତି, "ମୁଁ ଅମ୍ବିକାପୁରର ମଲ୍ଟିପର୍ପସ୍ ହାଇସ୍କୁଲରୁ ମୋର ସ୍କୁଲ ଶିକ୍ଷା ସମାପ୍ତ କରିଛି । ତା'ପରେ, ମୁଁ ଅମ୍ବିକାପୁରର ପିଜି କଲେଜରେ ନାମ ଲେଖାଇଛି । ବର୍ତ୍ତମାନ ଅମ୍ବିକାପୁରର ପିଜି କଲେଜରେ ଏଲଏଲବି କରୁଛି । ମୋର ଆହୁରି ବଡ଼ ସ୍ୱପ୍ନ ଅଛି ଏବଂ ସେଗୁଡ଼ିକୁ ପୂରଣ କରିବା ପାଇଁ ମୁଁ କାମ କରୁଛି ।"