ନୂଆଦିଲ୍ଲୀ: ସରକାରୀ କାର୍ଯ୍ୟରେ ବିଳମ୍ବ ଏବଂ ଅନାବଶ୍ୟକ ହଇରାଣରୁ ମୁକ୍ତି ପାଇବେ ଦିଲ୍ଲୀବାସୀ । ସରକାରୀ ସେବାକୁ ସମୟବଦ୍ଧ, ସ୍ୱଚ୍ଛ କରିବା ପାଇଁ ଦିଲ୍ଲୀ ସରକାର ‘ଦିଲ୍ଲୀ ସେବା ବିତରଣ ଅଧିକାର ଅଧିନିୟମ, ୨୦୨୬’ ଲାଗୁ କରିବାକୁ ଯାଉଛନ୍ତି । ନୂଆ ଆଇନ ଅନୁଯାୟୀ, ନିର୍ଦ୍ଧାରିତ ସମୟରେ କାମ ନକଲେ ସମ୍ପୃକ୍ତ ସରକାରୀ କର୍ମଚାରୀଙ୍କୁ ଉପରେ ଦୈନିକ ୨୫୦ ଟଙ୍କା ଜୋରିମାନା ଲାଗୁ ହେବ । ଏହି ଜୋରିମାନାର ସର୍ବାଧିକ ସୀମା ୫,୦୦୦ ଟଙ୍କା ପର୍ଯ୍ୟନ୍ତ ରହିଛି ।
- ପ୍ରତ୍ୟେକ ସେବା ପାଇଁ ନିର୍ଦ୍ଧାରିତ ହେବ ସମୟସୀମା
ଦିଲ୍ଲୀରେ ସରକାରୀ ସେବାକୁ ଅଧିକ ସହଜ ଓ ସ୍ୱଚ୍ଛ କରିବା ଲକ୍ଷ୍ୟରେ ରେଖା ଗୁପ୍ତାଙ୍କ ସରକାର ଏହି ନୂଆ ଆଇନ ଆଣିଛନ୍ତି । ଏହା ୨୦୧୧ର ପୁରୁଣା ସମୟବଦ୍ଧ ସେବା ବିତରଣ ଆଇନର ସ୍ଥାନ ନେବ । ନୂଆ ଆଇନ ଅନୁଯାୟୀ, ସରକାରୀ ସେବା ପାଇଁ ନିର୍ଦ୍ଧିଷ୍ଟ ସମୟସୀମା ଧାର୍ଯ୍ୟ କରାଯିବ । କେଉଁ ସେବା ଏହି ଆଇନ ଅଧୀନରେ ଆସିବ, ତାହା ସରକାର ନିଷ୍ପତ୍ତି ନେବେ । ପ୍ରତ୍ୟେକ ସେବା ପାଇଁ ଜଣେ ନାମିତ ଅଧିକାରୀଙ୍କୁ ଦାୟିତ୍ୱ ଦିଆଯିବ । ଫଳରେ କୌଣସି ଆବେଦନ ଅନାବଶ୍ୟକ ଭାବେ ପଡ଼ିରହିଲେ ସମ୍ପୃକ୍ତ ଅଧିକାରୀଙ୍କ ଦାୟିତ୍ୱ ନିର୍ଦ୍ଧାରଣ କରାଯାଇପାରିବ ।
- ଅନଲାଇନରେ ଟ୍ରାକ୍ କରିପାରିବେ ଆବେଦନ
ନୂଆ ଆଇନରେ ସରକାରୀ ସେବା ପାଇଁ ଅନଲାଇନ୍ ଆବେଦନ ଏବଂ ଆବେଦନର ସ୍ଥିତି ଯାଞ୍ଚ ବ୍ୟବସ୍ଥା ରହିଛି । ପ୍ରତ୍ୟେକ ଆବେଦନକୁ ଏକ ସ୍ୱତନ୍ତ୍ର ଆଇଡି ଦିଆଯିବ । ଏହା ମାଧ୍ୟମରେ ଆବେଦନକାରୀ ନିଜ ଆବେଦନର ସ୍ଥିତି ଅନଲାଇନରେ ଜାଣିପାରିବେ । ଏଥିସହ ସମସ୍ତ ଆବେଦନର ଡିଜିଟାଲ୍ ରେକର୍ଡ ରଖିବା ଏବଂ ନିୟମିତ ଭାବେ ସ୍ଥିତି ଅପଡେଟ୍ କରିବା ବିଭାଗଗୁଡ଼ିକ ପାଇଁ ବାଧ୍ୟତାମୂଳକ ହେବ । ଆବେଦନ ଖାରଜ କରାଗଲେ ଏହାର କାରଣ ଲିଖିତ ଭାବେ ଜଣାଇବାକୁ ପଡ଼ିବ ।
ନୂଆ ଆଇନର ଏକ ପ୍ରମୁଖ ବ୍ୟବସ୍ଥା ହେଉଛି ‘ଅଟୋମେଟିକ୍ ଏସ୍କାଲେସନ୍’ ବା ସ୍ୱତଃ ଅପିଲ୍ ବ୍ୟବସ୍ଥା । ଯଦି ସମ୍ପୃକ୍ତ ଅଧିକାରୀ ନିର୍ଦ୍ଧାରିତ ସମୟ ମଧ୍ୟରେ ସେବା ଯୋଗାଇ ନଦିଅନ୍ତି, ତେବେ ମୂଳ ଆବେଦନକୁ ନାଗରିକ ଅଭିଯୋଗ ନିରାକରଣ ପ୍ରାଧିକରଣ ନିକଟରେ ଅପିଲ୍ ଭାବେ ବିବେଚନା କରାଯିବ । ଏଥିପାଇଁ ନାଗରିକଙ୍କୁ ଅଲଗା ଭାବେ ଅପିଲ୍ ଦାଖଲ କରିବାକୁ ପଡ଼ିବ ନାହିଁ । ପ୍ରତ୍ୟେକ ବିଭାଗରେ ଏକ ନାଗରିକ ଅଭିଯୋଗ ନିରାକରଣ ପ୍ରାଧିକରଣ ନିଯୁକ୍ତ ହେବ । ଏହା ସେବା ଯୋଗାଇବାକୁ ନିର୍ଦ୍ଦେଶ ଦେବା ସହ ବିଳମ୍ବ ପାଇଁ ଦାୟିତ୍ୱ ନିର୍ଦ୍ଧାରଣ କରିବ ।
- ୩୦ ଦିନ ମଧ୍ୟରେ ଅପିଲ୍ ନିଷ୍ପତ୍ତି
ପ୍ରାଧିକରଣକୁ ସାଧାରଣତଃ ୩୦ ଦିନ ମଧ୍ୟରେ ଅପିଲ୍ର ନିଷ୍ପତ୍ତି ନେବାକୁ ପଡ଼ିବ । ଯଦି ଏହି ସମୟସୀମା ମଧ୍ୟରେ ମାମଲାର ସମାଧାନ ନହୁଏ, ତେବେ ତାହା ସ୍ୱତଃ ଦିଲ୍ଲୀ ସେବା ଅଧିକାର ଆୟୋଗ ନିକଟକୁ ଯିବ। ଆୟୋଗ ଦ୍ୱିତୀୟ ଅପିଲ୍ର ଶୁଣାଣି କରିବା ସହ ଆଇନର କାର୍ଯ୍ୟକାରିତା ଉପରେ ନଜର ରଖିବ । ଏଥିସହ ସରକାରୀ କାର୍ଯ୍ୟାଳୟ ଯାଞ୍ଚ, ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ସୁପାରିସ ଏବଂ ପ୍ରକ୍ରିୟାରେ ସୁଧାର ଆଣିବାକୁ ପ୍ରସ୍ତାବ ଦେବାର କ୍ଷମତା ମଧ୍ୟ ଆୟୋଗକୁ ମିଳିବ ।
ପଢନ୍ତୁ ଏହି ଖବର: ଯୁବଗୋଷ୍ଠୀଙ୍କ ଡ୍ରଗ୍ସ ନିଶା ଛଡ଼ାଇବ ଘୋଡ଼ା; ଆର୍ମି କରିବ ସହାୟତା
- ବିଳମ୍ବ ପାଇଁ ଦୈନିକ ୨୫୦ ଟଙ୍କା ଜରିମାନା
ସରକାରୀ ସେବାରେ ଅବହେଳା ରୋକିବା ପାଇଁ ନୂଆ ଆଇନରେ ଅର୍ଥଦଣ୍ଡ ବ୍ୟବସ୍ଥା ରହିଛି । ଉଚିତ୍ କାରଣ ନଥାଇ ସେବା ପ୍ରଦାନରେ ବିଳମ୍ବ କଲେ ସମ୍ପୃକ୍ତ ଅଧିକାରୀଙ୍କ ଉପରେ ପ୍ରତିଦିନ ୨୫୦ ଟଙ୍କା ଜୋରିମାନା ଲାଗୁ ହୋଇପାରିବ । ଏହାର ସର୍ବାଧିକ ସୀମା ୫,୦୦୦ ଟଙ୍କା । ସେହିପରି କୌଣସି ଆବେଦନକୁ ଅନୁଚିତ୍ କାରଣରୁ ଖାରଜ କଲେ ୨୫୦ ଟଙ୍କାରୁ ୫,୦୦୦ ଟଙ୍କା ପର୍ଯ୍ୟନ୍ତ ଏକକାଳୀନ ଜରିମାନା ଲାଗୁ ହୋଇପାରିବ । ତେବେ ଜରିମାନା ଲାଗୁ କରିବା ପୂର୍ବରୁ ସମ୍ପୃକ୍ତ ଅଧିକାରୀଙ୍କୁ ନିଜ ପକ୍ଷ ରଖିବାର ସୁଯୋଗ ଦିଆଯିବ।
