Horse Riding / ଯୁବଗୋଷ୍ଠୀଙ୍କ ଡ୍ରଗ୍ସ ନିଶା ଛଡ଼ାଇବ ଘୋଡ଼ା; ଆର୍ମି କରିବ ସହାୟତା

କେରଳ: ନିଶା କବଳରୁ ଯୁବପିଢ଼ିଙ୍କୁ ମୁକ୍ତ କରିବା ପାଇଁ କେରଳ ପୋଲିସର ଏକ ନିଆରା ପଦକ୍ଷେପ ଏବେ ଚର୍ଚ୍ଚାକୁ ଆସିଛି । ଡ୍ରଗ୍ସଠାରୁ ଯୁବକମାନଙ୍କୁ ଦୂରେଇ ରଖିବାକୁ ଏବେ ଘୋଡ଼ା ସବାରିର ସାହାଯ୍ୟ ନେବ ପୋଲିସ । ଏଥିପାଇଁ ସାଧାରଣ ଲୋକଙ୍କୁ ମଧ୍ୟ ଘୋଡ଼ା ଚଢ଼ିବା ଶିଖାଯିବ । ଏହି ଅଭିଯାନରେ ଭାରତୀୟ ସେନାର ତାଲିମପ୍ରାପ୍ତ ଘୋଡ଼ା ସାମିଲ ହେବେ ବୋଲି ଜଣାପଡ଼ିଛି ।

• ନିଶା ବିରୋଧୀ ଅଭିଯାନରେ ଘୋଡ଼ାସବାରି

ଯୁବପିଢ଼ିଙ୍କୁ ନିଶାଦ୍ରବ୍ୟଠାରୁ ଦୂରେଇ ରଖିବା ସହ ସେମାନଙ୍କୁ ଭଲ କାର୍ଯ୍ୟକଳାପରେ ଯୋଡ଼ି ରଖିବା ହେଉଛି ଏହି ଯୋଜନାର ମୁଖ୍ୟ ଉଦ୍ଦେଶ୍ୟ । ଘୋଡ଼ା ଚଢିବା ମାଧ୍ୟମରେ ଯୁବକମାନଙ୍କୁ ଏକ ନୂଆ ଅନୁଭୂତି ଦେବା ସହ ପୋଲିସ ଓ ସାଧାରଣ ଲୋକଙ୍କ ମଧ୍ୟରେ ସମ୍ପର୍କ ମଜଭୁତ କରିବାକୁ ଯୋଜନା କରାଯାଇଛି । କେରଳ ପୋଲିସର ଜଣାଶୁଣା ମାଉଣ୍ଟେଡ୍ ପୋଲିସ ୟୁନିଟ୍ ଏହି ଯୋଜନାକୁ କାର୍ଯ୍ୟକାରୀ କରିବେ । ଏହାର ନାମ ରଖାଯାଇଛି ‘ଅପରେସନ୍ ତୁଫାନ୍ କେୟାର’।

• ଗୃହ ବିଭାଗର ମିଳିଲା ଅନୁମତି

ଥିରୁଅନନ୍ତପୁରମ୍ ସିଟି ପୋଲିସ କମିଶନର ଅରୁଲ୍ ବି. କୃଷ୍ଣା ଏହି ପ୍ରସ୍ତାବକୁ ଗୃହ ବିଭାଗକୁ ପଠାଇଥିଲେ । ଏହାକୁ ବିଭାଗ ପକ୍ଷରୁ ଅନୁମୋଦନ ମିଳିସାରିଛି । ବର୍ତ୍ତମାନ ମାଉଣ୍ଟେଡ୍ ପୋଲିସ ୟୁନିଟ୍ ପାଖରେ ୧୮ଟି ଘୋଡ଼ା ରହିଛି । ଏହି ଘୋଡ଼ାଗୁଡ଼ିକୁ ଭାରତୀୟ ସେନାଠାରୁ ଅଣାଯାଇଥିବା ବେଳେ ସେନା ପକ୍ଷରୁ ସେମାନଙ୍କୁ ତାଲିମ ମଧ୍ୟ ଦିଆଯାଇଛି । ପୂର୍ବରୁ ଏହି ୟୁନିଟ୍ କେବଳ ପୋଲିସ କର୍ମଚାରୀଙ୍କୁ ଘୋଡ଼ା ଚଢିବା ଶିଖାଉଥିଲା । ଏବେ ସାଧାରଣ ଲୋକଙ୍କୁ ମଧ୍ୟ ଏହି ସୁଯୋଗ ମିଳିବ।

• ୨୦ ଦିନର ଟ୍ରେନିଂ, ଦୁଇଟି ବ୍ୟାଚ୍

ଏହି ଯୋଜନାକୁ ପ୍ରଥମେ ପାଇଲଟ୍ ପ୍ରୋଜେକ୍ଟ ଭାବେ ଆରମ୍ଭ କରାଯିବ । ପ୍ରଥମ ପର୍ଯ୍ୟାୟରେ ପୋଲିସ କର୍ମଚାରୀଙ୍କ ସମ୍ପର୍କୀୟ ଓ ପରିଚିତମାନଙ୍କୁ ତାଲିମ ଦିଆଯିବ । ପ୍ରାରମ୍ଭିକ ଯୋଜନା ଅନୁସାରେ, ୧୦ରୁ ୨୦ ଜଣଙ୍କୁ ନେଇ ଦୁଇଟି ବ୍ୟାଚ୍ ଗଠନ କରାଯିବ । ପ୍ରତ୍ୟେକ ବ୍ୟାଚ୍‌କୁ ୨୦ ଦିନ ଧରି ଘୋଡ଼ା ଚାଳନା ତାଲିମ ଦିଆଯିବ । ପାଇଲଟ୍ ପ୍ରୋଜେକ୍ଟର ଫଳାଫଳକୁ ଦେଖିବା ପରେ ଅନ୍ୟ ସାଧାରଣ ଲୋକଙ୍କୁ ମଧ୍ୟ ଏଥିରେ ସାମିଲ କରାଯିବ ।

ପଢନ୍ତୁ ଏହି ଖବର: ଜ୍ଵାଇଁଙ୍କୁ ୨ କୋଟିର ଲ୍ୟାଣ୍ଡ ରୋଭର ଡିଫେଣ୍ଡର ଗିଫ୍ଟ; ଝିଅ ବାହାଘରରେ ୪ ଲକ୍ଷ ଲୋକଙ୍କ ପାଇଁ ଭୋଜି

• ଦେବାକୁ ପଡ଼ିବ ଫିସ୍, କିନ୍ତୁ ରହିବ ରିହାତି

ଘୋଡ଼ା ଚଢିବା ତାଲିମ ପାଇଁ ଫିସ୍ ନିଆଯିବ । ତେବେ ଏହାର ପରିମାଣ ଏପର୍ଯ୍ୟନ୍ତ ସ୍ଥିର ହୋଇନାହିଁ । ଅଧିକାରୀଙ୍କ କହିବା ଅନୁସାରେ, ଅନ୍ୟ ଘୋଡ଼ା ଚଢିବା କ୍ଲବ୍ ତୁଳନାରେ ଏହି ତାଲିମ ଅଧିକ ସୁଲଭ ମୂଲ୍ୟରେ ଉପଲବ୍ଧ ହେବ । ଫଳରେ ସାଧାରଣ ଲୋକ ମଧ୍ୟ ଏହାର ଲାଭ ଉଠାଇପାରିବେ । କେରଳ ପୋଲିସର ଏହି ନିଆରା ପଦକ୍ଷେପ କେବଳ ଘୋଡ଼ା ଚଢିବା ଶିଖାଇବାରେ ସୀମିତ ନୁହେଁ, ବରଂ ଯୁବପିଢ଼ିଙ୍କୁ ନିଶାରୁ ଦୂରେଇ ଏକ ସୁସ୍ଥ ଓ ସକାରାତ୍ମକ ଜୀବନଶୈଳୀ ଆପଣାଇବାକୁ ପ୍ରେରଣା ଦେବା ଏହାର ମୂଳ ଲକ୍ଷ୍ୟ ରହିଛି ।