Delhi PG Collapse / "ବାପା, ତୁମକୁ ଅଫିସର ହେଇ ଦେଖେଇବି': ବିଲ୍ଡିଂ ଭୁଶୁଡ଼ି ପୁଅ ଚାଲିଗଲା; ମନେ ପକାଇ କାନ୍ଦିଲେ ବାପା

ଜାତୀୟ ରାଜଧାନୀ ଦିଲ୍ଲୀର ସତ୍ୟ ନିକେତନରେ ପାଞ୍ଚ ମହଲା ବିଶିଷ୍ଟ କୋଠା ଭୁଶୁଡ଼ିବା ଘଟଣା । ଛାରଖାର ହୋଇଯାଇଛି ଅନେକ ପରିବାର । ସେହି କୋଠାଟି ଏକ ପିଜି ଥିବାବେଳେ ଅନେକ ପାଠପଢା ପିଲା ସେଠାରେ ରହୁଥିଲେ । ଏହି ଅଘଟଣରେ ମଧ୍ୟ ପ୍ରଦେଶ କଟନି ଅଧିବାସୀ ଅକ୍ଷତ ସିଂହ ଯାଦବଙ୍କ ମୃତ୍ୟୁ ତାଙ୍କ ପରିବାରର ମେରୁଦଣ୍ଡ ଭାଙ୍ଗିଦେଇଛି । ପୁଅ ଅଫିସର ହେବାକୁ ସ୍ଵପ୍ନ ଦେଖିଥିଲା । ପାଠ ପଢିବା ପାଇଁ ଘର ଛାଡ଼ି ଦିଲ୍ଲୀ ଆସିଥିଲା । ଏବେ ଅକାଳ ମୃତ୍ୟୁ ପରେ କାନ୍ଦିକାନ୍ଦି କୋହଭରା କଣ୍ଠରେ ପୁଅର ସ୍ଵପ୍ନକୁ କ୍ୟାମେରା ଆଗରେ ବଖାଣିଛନ୍ତି ଅଭାଗା ପିତା ।

ପାଠପଢାରେ ବେଶ ଧୁରନ୍ଧର ଥିଲେ ଅକ୍ଷତ । ଘର ଛାଡ଼ି ଦିଲ୍ଲୀ ଆସି ଅକ୍ଷତ ୟୁପିଏସସି ପାଇଁ ପଠାପଢି କରୁଥିଲେ । ସେ ନିଜ ବାପାଙ୍କୁ ସବୁବେଳେ କହୁଥିଲେ, "ବାପା, ଦିନେ ତୁମକୁ ଅଫିସର ହୋଇ ଦେଖେଇବି ।" ମାତ୍ର ଏକ ଦୁଃଖଦ ଘଟଣାରେ ତାର ଅକାଳ ମୃତ୍ୟୁ ଘଟିଛି । ପୁଅର ମୃତଦେହ ଦେଖି ପାଗଳ ହୋଇପଡ଼ିଛନ୍ତି ବାପାମାଆ । ପୁଅ ସହ ବିତାଇଥିବା ପ୍ରତିଟି ଘଟଣା ଏବେ ସେମାନଙ୍କ ଆଖି ଆଗରେ ନାଚି ଉଠୁଛି ।

• କେଉଁଠି ପଢୁଥିଲେ ଅକ୍ଷତ ?

ସତ୍ୟ ନିକେତନ ଘଟଣାରେ ଜୀବନ ହାରିଥିବା ଅକ୍ଷତ ସିଂ ଯାଦବ ଦିଲ୍ଲୀ ବିଶ୍ଵବିଦ୍ୟାଳୟର ପିଜିଡିଏଭି କଲେଜରେ ଦ୍ଵିତୀୟ ବର୍ଷର ଛାତ୍ର ଥିଲେ । ଘଟଣା ସମ୍ପର୍କରେ ଖବର ପାଇବା ପରେ ତାଙ୍କ ପରିବାର ଦିଲ୍ଲୀ ଏମ୍ସର ଟ୍ରମା ସେଣ୍ଟରରେ ପହଞ୍ଚିଥିଲେ । ପୁଅର ଶବ ଦେଖି ପରିବାର ଲୋକଙ୍କ ଗୋଡ଼ ତଳୁ ମାଟି ଖସିଯାଇଥିଲା । ଭଉଣୀ ଲିଚିଙ୍କୁ ସବୁଠୁ ବଡ଼ ଝଟକା ଲାଗିଛି । ଏହି ସତକୁ ସ୍ଵୀକାର କରିବାକୁ କେହି ବି ନାରାଜ ।

• କଟନିରୁ ଦିଲ୍ଲୀ ପର୍ଯ୍ୟନ୍ତ ଯାତ୍ରା

ଅକ୍ଷତଙ୍କ ପରିବାର ମଧ୍ୟ ପ୍ରଦେଶ କଟନି ଜିଲ୍ଲାର ଦୁବେ କଲୋନିରେ ରୁହନ୍ତି । ତାଙ୍କ ପିତା ରୋଜଗାର ଲାଗି ରାଜସ୍ଥାନର କୋଟାରେ କାମ କରନ୍ତି । ସେପଟେ ମାଆ ଜଣେ ଗୃହିଣୀ । ପରିବାର ସର୍ବଦା ଅକ୍ଷତଙ୍କ ପାଠପଢାକୁ ପ୍ରାଥମିକତା ଦେଇଥାଏ ଓ ତାଙ୍କ ସ୍ଵପ୍ନ ପୂରଣ କରିବା ଲାଗି ସବୁ ଅସମ୍ଭବକୁ ସମ୍ଭବ କରିବାରେ ଲାଗିପଡ଼ନ୍ତି । ଅକ୍ଷତ ମଧ୍ୟ ପରିବାର କଷ୍ଟ ବୁଝେ ଏବଂ ସେହି ଅନୁସାରେ ପାଠ ପଢେ ।

ପଢନ୍ତୁ ଏହି ଖବର: ୬ ମହଲା ବିଶିଷ୍ଟ ହଷ୍ଟେଲ କୋଠା ଭୁଶୁଡ଼ିବା ଘଟଣାରେ ବଢ଼ୁଛି ମୃତ୍ୟୁ ସଂଖ୍ୟା

• 'ପୂର୍ବରୁ ଆମେ ୪ ଥିଲୁ, ଏବେ ୩ ହୋଇଗଲୁ'

ଅକ୍ଷତଙ୍କ ମାଆ ପୁଅର ମୃତ୍ୟୁ ପରେ ଛାତି ପିଟି କାନ୍ଦିଛନ୍ତି । ସେ କହିଛନ୍ତି ଯେ ପୂର୍ବରୁ ପରିବାରରେ ୪ ଜଣ ସଦସ୍ୟ ଥିଲେ, ହେଲେ ଏବେ ସେମାନେ ୩ ଜଣ ହୋଇଗଲେ । ଅଘଟଣର କିଛି ଦିନ ପୂର୍ବରୁ ସେ ପୁଅ ସହ ଭିଡିଓ କଲ୍‌ରେ କଥା ହୋଇଥିଲେ । ହେଲେ ସେ ଜାଣିନଥିଲେ ଯେ ଏହା ପୁଅ ସହ ଶେଷ କଥାବାର୍ତ୍ତା ହୋଇଯିବ । ସେପଟେ କିଛି ଦିନ ପୂର୍ବରୁ ରକ୍ଷା ବନ୍ଧନ ଯାଇଥିବାବେଳେ ସେ ଘରକୁ ଯାଇଥିଲେ ଓ ଭଉଣୀ ଲିଚି ହାତରୁ ରାକ୍ଷୀ ବାନ୍ଧି ପୁଣି ଦିଲ୍ଲୀ ଫେରିଥିଲେ । ପରିବାର ତାକୁ ଘରେ କିଛି ଦିନ ରହିବାକୁ କହିଥିଲା, କିନ୍ତୁ ସେ ଟିକେଟ୍ ହୋଇଯିବା କହି ଦିଲ୍ଲୀ ପଳାଇ ଆସିଥିଲେ ।