Delhi Air Pollution / ଦୀପାବଳିରେ ଦିଲ୍ଲୀରେ ବିଷାକ୍ତ ବାୟୁ; AQI ୪୫୦ ଟପିଲା, ଅତ୍ୟନ୍ତ ଖରାପ ସ୍ତରକୁ ଖସିଲା

ନୂଆଦିଲ୍ଲୀ: ଦୀପାବଳିରେ ଦିଲ୍ଲୀର ବାୟୁ ପ୍ରଦୂଷଣ ସ୍ଥିତି ସାଂଘାତିକ ହୋଇପଡ଼ିଛି । ଜାତୀୟ ରାଜଧାନୀର ଅନେକ ଅଞ୍ଚଳରେ ବାୟୁ ଗୁଣବତ୍ତା ସୂଚକାଙ୍କ (AQI) ୪୦୦ ଅତିକ୍ରମ କରିଥିବାବେଳେ କେତେକ ସ୍ଥାନରେ ଏହା ୪୫୦ ଉପରେ ପହଞ୍ଚିଛି । ବିଷାକ୍ତ ଧୂଆଁର ଚାଦରରେ ଘୋଡ଼େଇ ହୋଇପଡ଼ିଛି ଦିଲ୍ଲୀ । ପ୍ରଦୂଷଣର ଭୟାବହତାକୁ ଦୃଷ୍ଟିରେ ରଖି ଦିଲ୍ଲୀ-ଏନସିଆରରେ GRAP-3 କଟକଣା ଲାଗୁ କରାଯାଇଛି ।

• ଜାହାଙ୍ଗୀରପୁରୀରେ ସର୍ବାଧିକ AQI ୪୫୦

ସୂଚନା ଅନୁସାରେ, ଦୀପାବଳି ସକାଳେ ଦିଲ୍ଲୀର ସାମଗ୍ରିକ AQI ୩୮୩ ରେକର୍ଡ କରାଯାଇଥିଲା । ସହରର ୫୪ଟି ବାୟୁ ଗୁଣବତ୍ତା ମାପକ କେନ୍ଦ୍ର ମଧ୍ୟରୁ ୨୪ଟିରେ ବାୟୁ ପ୍ରଦୂଷଣ 'ଗୁରୁତର' ବର୍ଗରେ ରହିଥିଲା । ଅନ୍ୟ କେନ୍ଦ୍ରଗୁଡ଼ିକରେ ବାୟୁର ଗୁଣବତ୍ତା 'ଅତ୍ୟନ୍ତ ଖରାପ' ବର୍ଗରେ ରେକର୍ଡ ହୋଇଛି । ସମୀର ଆପ୍‌ର ତଥ୍ୟ ଅନୁଯାୟୀ, ଜାହାଙ୍ଗୀରପୁରୀରେ ସର୍ବାଧିକ AQI ୪୫୦ ରେକର୍ଡ ହୋଇଥିବାବେଳେ ଆର୍‌କେପୁରମ୍‌ରେ ୪୪୮ ରହିଛି । ଶୁକ୍ରବାର ଦିଲ୍ଲୀର AQI ୩୮୨ ଥିବାବେଳେ ଶନିବାର ଏହା ୩୬୯କୁ ହ୍ରାସ ପାଇଥିଲା । ତେବେ ପ୍ରଦୂଷଣ ସ୍ତର ଏବେ ବି 'ଗୁରୁତର' ବର୍ଗର ସୀମା ୪୦୧ର ନିକଟବର୍ତ୍ତୀ ରହିଛି ।

• ନଭେମ୍ବର ୮ ଓ ୯ରେ ମଧ୍ୟ ରହିବ ସାଂଘାତିକ ସ୍ଥିତି

ଦିଲ୍ଲୀର ବାୟୁ ଗୁଣବତ୍ତା ପ୍ରାରମ୍ଭିକ ସତର୍କତା ପ୍ରଣାଳୀ (EWS) ଅନୁଯାୟୀ, ନଭେମ୍ବର ୮ ଓ ୯ ତାରିଖରେ ମଧ୍ୟ ବାୟୁ ପ୍ରଦୂଷଣ 'ଗୁରୁତର' ବର୍ଗରେ ରହିବାର ଆଶଙ୍କା ରହିଛି । ଆଗାମୀ ୬ ଦିନ ମଧ୍ୟରେ ପ୍ରଦୂଷଣ ସ୍ତର 'ଗୁରୁତର' ଓ 'ଅତ୍ୟନ୍ତ ଖରାପ' ବର୍ଗ ମଧ୍ୟରେ ରହିପାରେ । କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (CPCB) ଅନୁଯାୟୀ, AQIର ବର୍ଗୀକରଣ ହେଉଛି:

- ୦-୫୦: ଭଲ
- ୫୧-୧୦୦: ସନ୍ତୋଷଜନକ
- ୧୦୧-୨୦୦: ମଧ୍ୟମ
- ୨୦୧-୩୦୦: ଖରାପ
- ୩୦୧-୪୦୦: ଅତ୍ୟନ୍ତ ଖରାପ
- ୪୦୧-୫୦୦: ଗୁରୁତର

• GRAP-3 ଲାଗୁ

ପ୍ରଦୂଷଣ ସ୍ଥିତିକୁ ନିୟନ୍ତ୍ରଣ କରିବା ପାଇଁ ବାୟୁ ଗୁଣବତ୍ତା ପରିଚାଳନା କମିଶନ (CAQM) ଦିଲ୍ଲୀ-ଏନସିଆରରେ ଗ୍ରାଡେଡ୍ ରେସ୍ପନ୍ସ ଆକ୍ସନ୍ ପ୍ଲାନ୍ (GRAP)ର ତୃତୀୟ ପର୍ଯ୍ୟାୟ ଲାଗୁ କରିଛି। ଏହାଦ୍ଵାରା ଯାନ ବାହନ ନିର୍ମାଣ ଉପରେ କଟକଣା ଲାଗୁ କରାଯାଇଛି । ଏହା ଅଧୀନରେ BS-III ପେଟ୍ରୋଲ ଓ BS-IV ଡିଜେଲ ଚାରିଚକିଆ ଯାନ ଚଳାଚଳ ଉପରେ କଟକଣା ଲାଗିଛି । ସେହିପରି ଅତ୍ୟାବଶ୍ୟକ ନଥିବା ନିର୍ମାଣ କାର୍ଯ୍ୟ ବନ୍ଦ ଏବଂ ଷ୍ଟୋନ୍ କ୍ରସରଗୁଡ଼ିକୁ ବନ୍ଦ ରଖିବାକୁ ନିର୍ଦ୍ଦେଶ ରହିଛି । ଦିଲ୍ଲୀରେ ଶୀତଦିନେ ବାୟୁ ପ୍ରଦୂଷଣ ବୃଦ୍ଧି ପାଇବାର ମୁଖ୍ୟ କାରଣ ହେଉଛି ଗାଡ଼ିମୋଟରର ଧୂଆଁ, ଶିଳ୍ପ କାରଖାନାର ନିର୍ଗମନ, ପଞ୍ଜାବ ଓ ହରିୟାଣାରେ ନଡ଼ା ଜଳାଇବା, ତାପମାତ୍ରା ହ୍ରାସ ଏବଂ ପବନର ବେଗ କମିବା ।

ପଢନ୍ତୁ ଏହି ଖବର: ଯବାନଙ୍କ ସହ ଦୀପାବଳି ପାଳିବାକୁ କାହିଁକି ବସ୍ତରକୁ ବାଛିଲେ ମୋଦି ?

• ଗ୍ରୀନ୍ କ୍ରାକର୍ସକୁ ଅନୁମତି, ତଥାପି ବଢ଼ୁଛି ପ୍ରଦୂଷଣ

ଦୀପାବଳି ଅବସରରେ ଦିଲ୍ଲୀ-ଏନସିଆରରେ ଦୁଇ ଦିନ ପାଇଁ ସବୁଜ ବା ଗ୍ରୀନ୍ କ୍ରାକର୍ସ ବିକ୍ରିକୁ ସୁପ୍ରିମକୋର୍ଟ ଅନୁମତି ଦେଇଛନ୍ତି । ତେବେ ନିୟମ ଉଲ୍ଲଂଘନ କରି କେତେକ ବ୍ୟବସାୟୀ ସାଧାରଣ ବାଣ ବିକ୍ରି କରୁଥିବା ରିପୋର୍ଟ ହୋଇଛି । ଏସବୁ ଭିତରେ ଦୀପାବଳିର ଆଲୋକ ଓ ଉତ୍ସବ ମଧ୍ୟରେ ଦିଲ୍ଲୀର ବିଷାକ୍ତ ବାୟୁ ଏବେ ଜନସ୍ୱାସ୍ଥ୍ୟ ପାଇଁ ଏକ ବଡ଼ ଚିନ୍ତାର କାରଣ ପାଲଟିଛି ।