ଆଉ କିଛି ଦିନ ପରେ ଥିଲା ଝିଅର ବାହାଘର । ବାହାଘରରେ ସାମିଲ ହେବାକୁ ବନ୍ଧୁ ପରିଜନ ବି ପ୍ରସ୍ତୁତ । ସାଜସଜ୍ଜା ପ୍ରାୟ ଶେଷ ପର୍ଯ୍ୟାୟରେ । ହେଲେ ଏଠି ବାପା ମୁଣ୍ଡରେ ପଡ଼ିଛି ଚଡ଼କ । କାରଣ ମିଳୁନି ଗ୍ୟାସ ସିଲିଣ୍ଡର । ମଧ୍ୟପ୍ରାଚ୍ୟ ଯୁଦ୍ଧର ପ୍ରଭାବରେ ବହୁ ପୂର୍ବରୁ ଗ୍ୟାସ୍ ସିଲିଣ୍ଡର ଅର୍ଡର କରିଥିଲେ ସୁଦ୍ଧା ଏଯାଏଁ ଘରେ ସିଲିଣ୍ଡର ପହଞ୍ଚିନି । କିନ୍ତୁ ହଠାତ୍ ହୋଇଥିଲା ଚମତ୍କାର । ଘରେ ପହଞ୍ଚିଥିଲା ୨୦ଟି ଗ୍ୟାସ୍ ସିଲିଣ୍ଡର ।

ଏହି ଘଟଣା ହେଉଛି ଗ୍ରେଟର ନୋଏଡାର ଖାନପୁର ଗାଁରେ । ଏଠାକାର ବାସିନ୍ଦା ଅନିଲ ଭାଟି ନିଜ ଝିଅର ବାହାଘର କାର୍ଯ୍ୟରେ ବ୍ୟସ୍ତ ଥିଲେ । କାରଣ ବାହାଘର ତାରିଖ ପାଖେଇ ଆସୁଛି । ଖବର ଆସିଥିଲା ବାହାଘର ପାଇଁ ଆବଶ୍ୟକ ମୁତାବକ ଗ୍ୟାସ ସିଲିଣ୍ଡର ମିଳୁନାହିଁ । ଅନିଲ ଝିଅ ବାହାଘର ପାଇଁ ପ୍ରାୟ ୨୦ଟି କମର୍ସିଆଲ୍ ଗ୍ୟାସ ସିଲିଣ୍ଡର ଅର୍ଡର କରିଥିଲେ । ଏଥିଲାଗି ସେ ନିକଟସ୍ଥ ଗ୍ୟାସ ଏଜେନ୍ସିଙ୍କ ସହିତ ଯୋଗାଯୋଗ କରିଥିଲେ, କିନ୍ତୁ ତାଙ୍କୁ ନିରାଶ ହେବାକୁ ପଡ଼ିଥିଲା । ସମୟ କମ ଥିବାବେଳେ ଅନିଲଙ୍କ ଚିନ୍ତା ବଢୁଥିଲା ।

• କେମିତି ମିଳିଲା ଗ୍ୟାସ୍ ସିଲିଣ୍ଡର ?

ଗୁରୁବାର ଗ୍ୟାସ୍ ସିଲିଣ୍ଡର ଲାଗି ଜିଲ୍ଲା ଅଧିକାରୀ ମେଧା ରୁପମଙ୍କ ନିକଟରେ ପହଞ୍ଚିଥିଲେ ଓ ନିଜ ସମସ୍ୟା ସମ୍ପର୍କରେ ଲିଖିତ ଆକାରରେ ଜଣାଇଥିଲେ । ଯଦି ସଠିକ୍ ସମୟରେ ଗ୍ୟାସ୍ ସିଲିଣ୍ଡର ମିଳୁନାହିଁ, ତେବେ ଝିଅର ବାହାଘରରେ ବଡ଼ ସମସ୍ୟା ଉପୁଜିବ । ଜିଲ୍ଲା ଅଧିକାରୀ ମେଧା ଏହି ଘଟଣାକୁ ଗମ୍ଭୀରତାର ସହ ନେଇ ତୁରନ୍ତ ସହାୟତା କରିଥିଲେ । ସେ ଗ୍ୟାସ୍ ଏଜେନ୍ସିଙ୍କୁ ତୁରନ୍ତ ଅନିଲଙ୍କ ଘରେ ଆବଶ୍ୟକ ଗ୍ୟାସ୍ ସିଲିଣ୍ଡର ପହଞ୍ଚାଇବାକୁ ନିର୍ଦ୍ଦେଶ ଦେଇଥିଲେ ।

ପଢନ୍ତୁ ଏହି ଖବର: ଯାଞ୍ଚ ବାହାନାରେ ଘରେ ପଶିଲେ, ବାଇକ୍‌ରେ ନେଇ ପଳାଇଲେ ଗ୍ୟାସ୍ ସିଲିଣ୍ଡର

ମେଧାଙ୍କ ଆଦେଶର ତୁରନ୍ତ ପାଳନ ହୋଇଥିଲା । ଲିଖିତ ଅଭିଯୋଗ ଜଣାଇବାର ପ୍ରାୟ ୨୪ ଘଣ୍ଟା ମଧ୍ୟରେ ଅନିଲଙ୍କ ଘରେ ପହଞ୍ଚିଥିଲା ୨୦ଟି ଗ୍ୟାସ୍ ସିଲିଣ୍ଡର । ଏହାପରେ ଅନିଲଙ୍କ ମୁଣ୍ଡରୁ ଏକ ବଡ଼ ଚିନ୍ତା ଯାଇଥିଲା । ଏ ନେଇ ସେ ଜିଲ୍ଲା ଅଧିକାରୀ ମେଧା ରୁପମଙ୍କୁ ଅଶେଷ ଧନ୍ୟବାଦ ଜଣାଇଥିବାବେଳେ ଆଉ ବାହାଘରରେ କୌଣସି ସମସ୍ୟା ଉପୁଜିବ ନାହିଁ ବୋଲି ହସି ହସି କହିଥିଲେ । ଏହି ଘଟଣା ଜଣାପଡ଼ିବା ପରେ ସ୍ଥାନୀୟ ଲୋକେ ଜିଲ୍ଲା ଅଧିକାରୀ ମେଧାଙ୍କୁ ବେଶ ପ୍ରଶଂସା କରିଥିବାବେଳେ ତାଙ୍କ କର୍ତ୍ତବ୍ୟ ପ୍ରତି ନିଷ୍ଠାଭାବକୁ ସଲାମ ଜଣାଇଛନ୍ତି ।