Accident News / ଗଣେଶ ବିସର୍ଜନ ବେଳେ ବଡ଼ ଅଘଟଣ, ୧୩ ମୃତ...ମୃତକଙ୍କ ମଧ୍ୟରେ ଅଛନ୍ତି ସବ୍‌-ଇନ୍ସପେକ୍ଟର

ଗଣେଶଙ୍କୁ ବିସର୍ଜନ ବେଳେ ତେଲେଙ୍ଗାନାରେ ବଡ଼ ଅଘଟଣ । ଉତ୍ସବର ମାହୋଲ ଭିତରେ ଘଟିଗଲା ଏକାଧିକ ଦୁର୍ଘଟଣା । ଗଣେଶ ବିସର୍ଜନ ସମୟରେ ଭିନ୍ନ ଭିନ୍ନ ଘଟଣାରେ ଚାଲିଗଲା ୧୩ ଜଣଙ୍କ ଜୀବନ, ଆହତ ହୋଇଛନ୍ତି ୨୬ ଜଣ । ମୃତକଙ୍କ ମଧ୍ୟରେ ଜଣେ ସବ୍-ଇନ୍ସପେକ୍ଟର ମଧ୍ୟ ସାମିଲ ଅଛନ୍ତି । ତେଲେଙ୍ଗାନାର ଡିଜିପି ସିଭି ଆନନ୍ଦ ଏହି ମୃତ୍ୟୁ ସଂଖ୍ୟା ସ୍ପଷ୍ଟ କରିଛନ୍ତି ।

ଡିଜିପିଙ୍କ ସୂଚନା ଅନୁଯାୟୀ, ରାଜ୍ୟରେ ସରକାରୀ ଭାବେ ପ୍ରାୟ ୧.୨୪ ଲକ୍ଷ ଗଣେଶ ମୂର୍ତ୍ତି ପୂଜା କରାଯାଇଥିଲା । ଯଦି ଘର, କମ୍ୟୁନିଟି ଓ ଆପାର୍ଟମେଣ୍ଟରେ ପୂଜା କରାଯାଇଥିବା ମୂର୍ତ୍ତିକୁ ମିଶାଇଲେ ଏହି ସଂଖ୍ୟା ପ୍ରାୟ ୪ ଲକ୍ଷ ହେବ । ଗତରାତିରେ ବ୍ୟାପକ ଭାବେ ବିସର୍ଜନ କାର୍ଯ୍ୟକ୍ରମ ହୋଇଥିବା ବେଳେ ବିଭିନ୍ନ ସ୍ଥାନରେ ଏହି ଅଘଟଣ ଘଟିଥିଲା । ଗଣେଶ ବିସର୍ଜନ ସମୟରେ ଭିଡ଼ ନିୟନ୍ତ୍ରଣ ଓ ସୁରକ୍ଷା ପାଇଁ ବ୍ୟାପକ ପୋଲିସ ବ୍ୟବସ୍ଥା କରାଯାଇଥିଲା । ତଥାପି ଅନେକ ସ୍ଥାନରେ ଦୁର୍ଘଟଣା ଘଟି ଜୀବନହାନି ହୋଇଛି ।

ଅଧିକ ପଢ଼ନ୍ତୁ: ଗଣେଶ ପୂଜା ପେଣ୍ଡାଲରେ ବଡ଼ ଅଘଟଣ: ବିଦ୍ୟୁତ୍ ଆଘାତରେ ୪ ମୃତ, ୩ ଗୁରୁତର

ହ୍ରଦରେ ବୁଡ଼ି ୬ ଛାତ୍ରଙ୍କ ମୃତ୍ୟୁ

ସଙ୍ଗାରେଡ୍ଡୀ ଜିଲ୍ଲାର ପେଦ୍ଦାକଞ୍ଜେର୍ଲା ଗାଁରେ ଗଣେଶ ବିସର୍ଜନ ସମୟରେ ଏକ ହ୍ରଦରେ ବୁଡ଼ି ୬ ଜଣ ଛାତ୍ରଙ୍କ ମୃତ୍ୟୁ ହୋଇଛି । ମୃତ ଛାତ୍ରମାନେ ଶିରିଷା ଚାରିଟେବଲ ଟ୍ରଷ୍ଟର ଛାତ୍ର ବୋଲି ଜଣାପଡ଼ିଛି । ଘଟଣା ପରେ ସମସ୍ତ ୬ ଜଣଙ୍କ ମୃତଦେହ ଉଦ୍ଧାର କରାଯାଇଛି । ଏହି ଘଟଣାରେ ତେଲେଙ୍ଗାନା ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀ ଗଭୀର ଶୋକ ପ୍ରକାଶ କରିଛନ୍ତି ।

ଡ୍ୟୁଟିରୁ ଫେରୁଥିବା ବେଳେ ସବ୍-ଇନ୍ସପେକ୍ଟରଙ୍କ ମୃତ୍ୟୁ

ସେହିପରି ଗଣେଶ ବିସର୍ଜନ ଡ୍ୟୁଟି ସାରି ଫେରୁଥିବା ବେଳେ ଏକ ସଡ଼କ ଦୁର୍ଘଟଣାରେ ଜଣେ ସବ୍-ଇନ୍ସପେକ୍ଟରଙ୍କ ମୃତ୍ୟୁ ହୋଇଛି । ଅନ୍ୟପଟେ, ଶଙ୍କରପଲ୍ଲୀ ମଣ୍ଡଳରେ ଗଣେଶ ବିସର୍ଜନ ସମୟରେ ଫତେହପୁର ମୁସୀ ଫ୍ଲାଏଓଭରରୁ ଜଣେ ଯୁବକ ନଦୀକୁ ଖସି ପଡ଼ିଥିଲେ । ତେବେ ତାଙ୍କୁ ସୁରକ୍ଷିତ ଉଦ୍ଧାର କରାଯାଇଛି ।

ମଧ୍ୟପ୍ରଦେଶରେ ବିଦ୍ୟୁତ୍ ତାର ଲାଗି ୪ ମୃତ

ଏହି ଘଟଣା ମଧ୍ୟରେ ମଧ୍ୟପ୍ରଦେଶରେ ମଧ୍ୟ ଗଣେଶ ପୂଜା ପଣ୍ଡାଲରେ ଅଘଟଣ ଘଟିଛି । ସକାଳ ପ୍ରାୟ ୫ଟା ସମୟରେ ବିଦ୍ୟୁତ୍ ତାର ଛିଣ୍ଡି ପେଣ୍ଡାଲର ମଞ୍ଚ ଉପରେ ପଡ଼ିଥିଲା । ଏହାର ସଂସ୍ପର୍ଶରେ ଆସି ୪ ଜଣଙ୍କ ମୃତ୍ୟୁ ହୋଇଥିବା ବେଳେ ୩ ଜଣ ଗୁରୁତର ଅଛନ୍ତି ।