Pakistan Terrorists / କେଉଁଠି ଲୁଚିଛନ୍ତି କୁଖ୍ୟାତ ଆତଙ୍କବାଦୀ ମସୁଦ ଆଝାର ଓ ହାଫିଜ୍ ସଇଦ ? ଅପରେସନ ସିନ୍ଦୂର ପରେ କାର୍ଯ୍ୟାନୁଷ୍ଠାନ ଭୟ

ନୂଆଦିଲ୍ଲୀ: ପାକିସ୍ତାନରେ ଲୁଚି ରହିଥିବା ଦୁଇ କୁଖ୍ୟାତ ଆତଙ୍କବାଦୀ ମସୁଦ ଆଝାର ଓ ହାଫିଜ୍ ସଇଦକୁ ନେଇ ଆସିଛି ଏକ ବଡ଼ ଅପଡେଟ୍ । ଅପରେସନ ସିନ୍ଦୂର ପରେ ଭାରତୀୟ ସେନାର କାର୍ଯ୍ୟାନୁଷ୍ଠାନକୁ ଭୟ କରି ଉଭୟ ଆତଙ୍କବାଦୀ ଏବେ ସୁରକ୍ଷିତ ଠିକଣାରେ ଲୁଚିଥିବା ସୂଚନା ମିଳିଛି । ଗୁଇନ୍ଦା ସୂତ୍ରରୁ ମିଳିଥିବା ତଥ୍ୟ ଅନୁସାରେ ପାକିସ୍ତାନର ଗୁଇନ୍ଦା ସଂସ୍ଥା ISI ଉଭୟଙ୍କୁ ସେଫ୍ ହାଉସ୍‌ରେ ରଖିବା ସହ ସେମାନଙ୍କ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛି । ଏପରିକି ସେମାନଙ୍କ ଯାତାୟାତ ଉପରେ ମଧ୍ୟ କଟକଣା ଲଗାଯାଇଥିବା ଦାବି କରାଯାଉଛି ।

• କେଉଁଠି ଲୁଚିଛନ୍ତି ଦୁଇ କୁଖ୍ୟାତ ଆତଙ୍କବାଦୀ?

ଗୁଇନ୍ଦା ସୂତ୍ର ଅନୁସାରେ, ଲସ୍କର-ଏ-ତୋଏବାର ମୁଖ୍ୟ ହାଫିଜ୍ ସଇଦକୁ ଲାହୋରର ଜୋହର ଟାଉନ୍‌ରୁ ରାୱଲପିଣ୍ଡିର ଗ୍ୟାରିସନ୍ ଗ୍ରାଉଣ୍ଡ ଅଞ୍ଚଳକୁ ସ୍ଥାନାନ୍ତର କରାଯାଇଛି । ଏହି ଅଞ୍ଚଳ ନିକଟରେ ପାକିସ୍ତାନ ସେନାର ମୁଖ୍ୟାଳୟ ରହିଛି । ସେହିପରି ଜୈଶ-ଏ-ମହମ୍ମଦର ମୁଖ୍ୟ ମାସୁଦ ଆଝାରକୁ ସିନ୍ଧ ପ୍ରଦେଶର ନୱାବଶାହରେ ଥିବା ଏକ ସୁରକ୍ଷିତ ଘରକୁ ନିଆଯାଇଥିବା ସୂଚନା ରହିଛି । ତେବେ ଏହି ସ୍ଥାନାନ୍ତର ସମ୍ପର୍କିତ ତଥ୍ୟ ଗୁଇନ୍ଦା ସୂତ୍ର ଉପରେ ଆଧାରିତ।

• ଅପରେସନ ସିନ୍ଦୂର ପରେ ଭୟ

ଭାରତର ଅପରେସନ ସିନ୍ଦୂର ପରେ ଉଭୟ ଆତଙ୍କବାଦୀଙ୍କ ମନରେ ଭୟ ସୃଷ୍ଟି ହୋଇଛି । ଭାରତୀୟ ସେନାର ପ୍ରଚଣ୍ଡ ଆକ୍ରମଣ ବା କୌଣସି ଅଜଣା ଆକ୍ରମଣକାରୀଙ୍କ ଟାର୍ଗେଟ୍‌ରେ ସେମାନେ ଆସିପାରନ୍ତି ବୋଲି ଆଶଙ୍କା ରହିଛି । ତେଣୁ ISI କୌଣସି ପ୍ରକାର ବିପଦ ନେବାକୁ ଚାହୁଁନାହିଁ । ଏଣୁ ଦୁଇ ଜଣଙ୍କର ଯାତାୟାତକୁ ସୀମିତ କରାଯିବା ସହ ସଂଗଠନର ଅନ୍ୟ କମାଣ୍ଡର ଓ କର୍ମୀଙ୍କ ସହ ସିଧାସଳଖ ସାକ୍ଷାତ ଉପରେ ମଧ୍ୟ କଟକଣା ଲଗାଯାଇଥିବା ଦାବି ହୋଇଛି ।

• ଭାରତର ଏକାଧିକ ଆତଙ୍କୀ ଆକ୍ରମଣରେ ରହିଛି ନାଁ

ହାଫିଜ୍ ସଇଦ ଓ ମାସୁଦ ଆଝାର ଉଭୟେ ଜାତିସଂଘ ଦ୍ୱାରା ଘୋଷିତ ଅନ୍ତର୍ଜାତୀୟ ଆତଙ୍କବାଦୀ । ୨୬/୧୧ ମୁମ୍ବାଇ ଆତଙ୍କୀ ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ଭାବେ ହାଫିଜ୍ ସଇଦର ନାଁ ଆସିଥିବା ବେଳେ ସଂସଦ ଆକ୍ରମଣ, ପଠାନକୋଟ୍ ଏୟାରବେସ୍ ଆକ୍ରମଣ ଓ ପୁଲୱାମା ଆକ୍ରମଣ ଭଳି ଘଟଣାରେ ମାସୁଦ ଆଝାର ଓ ତା'ର ସଂଗଠନର ଭୂମିକା ରହିଛି । ଅନ୍ୟପଟେ ହାଫିଜ୍ ସଇଦ ଜେଲ୍‌ରେ ଥିବା ନେଇ ପାକିସ୍ତାନ ପକ୍ଷରୁ ଦାବି କରାଯାଇଥିଲେ ମଧ୍ୟ ଗୁଇନ୍ଦା ସୂତ୍ରର ଏହି ନୂଆ ତଥ୍ୟ ଅନେକ ପ୍ରଶ୍ନ ସୃଷ୍ଟି କରିଛି ।

• ୨୦୨୫ ମେ'ରେ ଭାରତ ଚଳାଇଥିଲା ଅପରେସନ ସିନ୍ଦୂର

ଏଠାରି କହିରଖୁଛୁ କି, ୨୨ ଏପ୍ରିଲ ୨୦୨୫ରେ ଜମ୍ମୁ-କଶ୍ମୀରର ପହଲଗାଓଁସ୍ଥିତ ବୈସରନ ଉପତ୍ୟକାରେ ଆତଙ୍କବାଦୀ ଆକ୍ରମଣ ହୋଇଥିଲା । ଏହି ଆକ୍ରମଣରେ ୨୬ ଜଣଙ୍କ ଜୀବନ ଯାଇଥିଲା । ଏହାର ଜବାବରେ ମେ' ୭ ତାରିଖରେ ଭାରତ ଅପରେସନ ସିନ୍ଦୂର ଆରମ୍ଭ କରି ପାକିସ୍ତାନ ଓ ପାକ୍ ଅଧିକୃତ କଶ୍ମୀରରେ ଥିବା ଆତଙ୍କୀ ଠିକଣା ଉପରେ ଆକ୍ରମଣ କରିଥିଲା । ଏହାପରେ ଉଭୟ ଦେଶ ମଧ୍ୟରେ ସାମରିକ ଉତ୍ତେଜନା ବଢ଼ିଥିଲା । ମେ' ୧୦ ତାରିଖରେ ଦୁଇ ଦେଶ ମଧ୍ୟରେ ଯୁଦ୍ଧବିରତି ବୁଝାମଣା ହୋଇଥିଲା ।

ପଢନ୍ତୁ ଏହି ଖବର: କୁଲଗାମ ଆତଙ୍କୀ ହମଲା ପଛରେ ଲସ୍କର ମଡ୍ୟୁଲ୍! ୫୦୦ରୁ ଅଧିକ ଲୋକଙ୍କୁ ଜେରା, ୨୦ ଅଟକ

ତେବେ ଅପରେସନ ସିନ୍ଦୂର ପରେ ମସୁଦ ଆଝାର ଓ ହାଫିଜ୍ ସଇଦଙ୍କୁ ନେଇ ଆସିଥିବା ଏହି ନୂଆ ତଥ୍ୟ ଏବେ ଚର୍ଚ୍ଚାର ବିଷୟ ପାଲଟିଛି । ପାକିସ୍ତାନରେ ଆତଙ୍କବାଦୀଙ୍କ ସୁରକ୍ଷାକୁ ନେଇ ପୁଣି ଥରେ ଅନ୍ତର୍ଜାତୀୟ ସ୍ତରରେ ପ୍ରଶ୍ନ ଉଠିଛି ।