Sarpanch Election / ଗୋଟିଏ ଘରେ ଜନ୍ମ, ଗୋଟିଏ ଘରେ ବିବାହ...ଏବେ ୨ ଭଉଣୀଙ୍କ ମଧ୍ୟରେ କ୍ଷମତା ଲଢେଇ

ଜୟପୁର: ଗୋଟିଏ ପରିବାର, ଗୋଟିଏ ସମ୍ପର୍କ, କିନ୍ତୁ ଲକ୍ଷ୍ୟ ଗୋଟିଏ ସରପଞ୍ଚ ଆସନ । ରାଜସ୍ଥାନର ନାଗୌର ଜିଲ୍ଲାର ବରଣଗାଓଁରେ ପଞ୍ଚାୟତ ନିର୍ବାଚନକୁ ନେଇ ଏବେ ଏମିତି ଏକ ରୋଚକ ରାଜନୈତିକ ଚିତ୍ର ସାମ୍ନାକୁ ଆସିଛି । ଏଠାରେ ସରପଞ୍ଚ ପଦ ପାଇଁ ମୋଟ ୭ ଜଣ ମହିଳା ପ୍ରାର୍ଥୀ ମୈଦାନରେ ଥିବାବେଳେ ସମସ୍ତଙ୍କ ନଜର ଅଟକିଛି ଦୁଇ ସମ୍ପର୍କୀୟ ନୁହେଁ, ବରଂ ଦୁଇ ଭଉଣୀ ମୀରା ବେନିୱାଲ ଓ ରାଜବାଲା ବେନିୱାଲଙ୍କ ଉପରେ ।

ଏହି ନିର୍ବାଚନର ଆଉ ଏକ ଦିଗ ହେଉଛି, ଉଭୟେ ରାଜସ୍ଥାନର ସାଂସଦ ତଥା ରାଷ୍ଟ୍ରୀୟ ଲୋକତାନ୍ତ୍ରିକ ପାର୍ଟି (RLP) ମୁଖ୍ୟ ହନୁମାନ ବେନିୱାଲଙ୍କ ପରିବାରର ସଦସ୍ୟ । ମୀରା ହେଉଛନ୍ତି ହନୁମାନଙ୍କ ବଡ଼ ଭାଇ ସ୍ୱର୍ଗତ ରାମପ୍ରସାଦ ବେନିୱାଲଙ୍କ ପତ୍ନୀ । ସେହିପରି ରାଜବାଲା ହେଉଛନ୍ତି ଅନ୍ୟ ବଡ଼ ଭାଇ ପ୍ରେମସୁଖ ବେନିୱାଲଙ୍କ ପତ୍ନୀ । ଦୁଇ ଭଉଣୀଙ୍କ ଏହି ରାଜନୈତିକ ମୁକାବିଲା ଏବେ ଗାଁରେ ଚର୍ଚ୍ଚାର ବିଷୟ ପାଲଟିଛି।

• ୨୫ବର୍ଷ ପରେ ପୁଣି ଚର୍ଚ୍ଚାରେ ରାମପ୍ରସାଦଙ୍କ ପରିବାର

ବରଣଗାଓଁର ଏହି ନିର୍ବାଚନ ସହ ଜଡ଼ିତ ରହିଛି ପୁରୁଣା ରାଜନୈତିକ ଇତିହାସ । ମୀରା ବେନିୱାଲଙ୍କ ସ୍ୱାମୀ ରାମପ୍ରସାଦ ବେନିୱାଲ ପ୍ରାୟ ୨୫ ବର୍ଷ ପୂର୍ବେ ଗାଁର ସରପଞ୍ଚ ଥିଲେ । ତେଣୁ ମୀରାଙ୍କ ପ୍ରାର୍ଥିତ୍ୱ ସହ ତାଙ୍କ ପରିବାରର ପୂର୍ବ ରାଜନୈତିକ ପରିଚୟ ମଧ୍ୟ ଆଲୋଚନାକୁ ଆସିଛି । ଅନ୍ୟପଟେ ରାଜବାଲା ବେନିୱାଲ ମଧ୍ୟ ସରପଞ୍ଚ ପଦ ପାଇଁ ନିଜ ପ୍ରାର୍ଥୀପତ୍ର ଦାଖଲ କରିଛନ୍ତି । ଉଭୟଙ୍କ ମଧ୍ୟରେ ପାରିବାରିକ ସମ୍ପର୍କ ଥିବାରୁ ଏହି ନିର୍ବାଚନ କେବଳ ପଦ ପାଇଁ ଲଢ଼େଇରେ ସୀମିତ ନାହିଁ, ବରଂ ଏହା ପରିବାର ଭିତରେ ଦୁଇ ମହିଳାଙ୍କ ରାଜନୈତିକ ଆକାଂକ୍ଷାକୁ ମଧ୍ୟ ସାମ୍ନାକୁ ଆଣିଛି । ଏହି ଦୁଇ ଭଉଣୀଙ୍କୁ ଛାଡ଼ିଲେ ମୈଦାନରେ ଆଉ ୫ ଜଣ ମହିଳା ପ୍ରାର୍ଥୀ ମଧ୍ୟ ଅଛନ୍ତି । ତେଣୁ ଭୋଟରଙ୍କ ସମର୍ଥନ କାହା ସପକ୍ଷରେ ଯାଉଛି, ତାହା ହିଁ ଦେଖିବା ରୋଚକ ହେବ ।

• ପୁରୁଣା ରାଜନୈତିକ ମତଭେଦକୁ ନେଇ ମଧ୍ୟ ଚର୍ଚ୍ଚା

ବରଣଗାଓଁର ସରପଞ୍ଚ ନିର୍ବାଚନକୁ ନେଇ ଆଲୋଚନା ମଧ୍ୟରେ ବେନିୱାଲ ପରିବାରର ପୂର୍ବ ରାଜନୈତିକ ଘଟଣାଗୁଡ଼ିକ ମଧ୍ୟ ଚର୍ଚ୍ଚାକୁ ଆସିଛି । ମୀରା ବେନିୱାଲ ଓ ହନୁମାନ ବେନିୱାଲଙ୍କ ମଧ୍ୟରେ ଦୀର୍ଘଦିନ ଧରି ମତଭେଦ ରହିଥିବା କୁହାଯାଏ । ପୂର୍ବ ବିଧାନସଭା ନିର୍ବାଚନରେ ମୀରାଙ୍କ ଝିଅ ଡକ୍ଟର ଅନୀତା ବେନିୱାଲ ମଧ୍ୟ ହନୁମାନ ବେନିୱାଲଙ୍କ ବିରୋଧରେ ନିର୍ବାଚନ ଲଢ଼ିଥିଲେ । ହେଲେ ସେ ପରାଜୟର ସାମ୍ନା କରିଥିଲେ । ଏହି ପୂର୍ବ ଘଟଣାଗୁଡ଼ିକ ପୁଣିଥରେ ବେନିୱାଲ ପରିବାରର ରାଜନୈତିକ ସମୀକରଣକୁ ଚର୍ଚ୍ଚାରେ ରଖିଛି ।

• ହନୁମାନ ବେନିୱାଲ କାହାକୁ ସମର୍ଥନ କରିବେ ?

ଏହି ନିର୍ବାଚନକୁ ନେଇ ଆଉ ଏକ ପ୍ରଶ୍ନ ଉଠୁଛି ସାଂସଦ ହନୁମାନ ବେନିୱାଲ ଏହି ମୁକାବିଲାରେ କେଉଁ ଭୂମିକା ନେବେ ? ସେ କୌଣସି ପ୍ରାର୍ଥୀଙ୍କ ସମର୍ଥନରେ ଖୋଲାଖୋଲି ଆଗକୁ ଆସିବେ ନା ନିର୍ବାଚନଠାରୁ ଦୂରେଇ ରହିବେ, ତାହା ସ୍ପଷ୍ଟ ହୋଇନାହିଁ । ଏ ସମ୍ପର୍କରେ ତାଙ୍କର କୌଣସି ନିଶ୍ଚିତ ଆଭିମୁଖ୍ୟ ସାମ୍ନାକୁ ଆସିନାହିଁ । ତେବେ ବରଣଗାଓଁ ସହ ବୁଢ଼ୀ ଓ ଅର୍ଜୁନପୁରା ଅଞ୍ଚଳକୁ ମିଶାଇ ମୋଟ ୨,୯୭୦ ଜଣ ଭୋଟର ଥିବା କୁହାଯାଉଛି । ଏହି ଭୋଟରଙ୍କ ସମର୍ଥନ ହାସଲ କରିବା ଏବେ ୭ ଜଣ ମହିଳା ପ୍ରାର୍ଥୀଙ୍କ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ।

ପଢନ୍ତୁ ଏହି ଖବର: ପୂର୍ବତନ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କୋଟିଆ ଗସ୍ତ କରି ତାହାର ବିକାଶ କାମ ହାତକୁ ନେଇଥିଲେ

ସୂଚନା ଥାଉ କି, ରାଜସ୍ଥାନରେ ପଞ୍ଚାୟତ ନିର୍ବାଚନ ୪ଟି ପର୍ଯ୍ୟାୟରେ ହେବ । ପ୍ରଥମ ପର୍ଯ୍ୟାୟ ଅକ୍ଟୋବର ୨୪ରେ ହେବାକୁ ଥିବାବେଳେ ଦ୍ଵିତୀୟ, ତୃତୀୟ ଓ ଚତୁର୍ଥ ପର୍ଯ୍ୟାୟ ଯଥାକ୍ରମେ ଅକ୍ଟୋବର ୩୧, ନଭେମ୍ବର ୬ ଏବଂ ନଭେମ୍ବର ୧୬ ତାରିଖରେ ହେବ । ତେବେ ରାଜସ୍ଥାନର ଏହି ବରଣଗାଓଁରେ ନିର୍ବାଚନ ଆସନ୍ତାକାଲି (ଅକ୍ଟୋବର ୨୪)ରେ ଅନୁଷ୍ଠିତ ହେବ ।