ପାକିସ୍ତାନକୁ ଭାରତର କଡା ଚେତାବନୀ । ଯଦି ବିଶ୍ୱ ଇତିହାସ ଓ ଭୂଗୋଳରେ ରହିବାର ଅଛି ତାହେଲେ ଆତଙ୍କବାଦକୁ ସମର୍ଥନ କରିବା ବନ୍ଦ କର । କାରଣ ଏଥର ଆମେ ସେ ସମୟ ଦେଖାଇବୁ ନାହିଁ ଯାହା ଆମେ ଅପରେସନ ସିନ୍ଦୂର 1.0 ରେ ଦେଖାଇଥିଲୁ । ଯଦି ପୁଣି ଆମକୁ ଉକସାଅ ତେବେ ସ୍ଥିତି ଏହାଠୁ ଭୟଙ୍କର ହେବ । ଅପରେସନ 2.0ରେ ଭାରତ ସଂଯମତା ଆଚରଣ କରିବ ନାହିଁ ବୋଲି ରାଜସ୍ଥାନ ମାଟିରୁ ଆତଙ୍କୀ ପ୍ରୋତ୍ସାହନକାରୀ ପାକିସ୍ତାନକୁ ସ୍ପଷ୍ଟ ସନ୍ଦେଶ ଦେଇଛନ୍ତି ସେନାମୁଖ୍ୟ। ଏୟାର ଚିଫ୍ ମାର୍ଶାଲଙ୍କ ପରେ ପାକିସ୍ତାନକୁ ଆର୍ମି ଚିଫ କଡ଼ା ଚେତାବନୀ ଦେଇଛନ୍ତି । ରାଜସ୍ଥାନର ଅନୁପଗଡ଼ରେ ଏକ ସେନା ପୋଷ୍ଟରେ ଭାଷଣ ଦେବା ସମୟରେ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ପାକିସ୍ତାନକୁ ଏପରି କଡା ଚେତାବନୀ ଦେଇଛନ୍ତି ।

ଆତଙ୍କବାଦୀ କାର୍ଯ୍ୟକଳାପ ବନ୍ଦ କର , ନଚେତ୍ ତୁମର ଭୌଗୋଳିକ ଉପସ୍ଥିତି ହରାଇବ । ଯଦି ପାକିସ୍ତାନ ମାନଚିତ୍ରରେ ତା'ର ସ୍ଥାନ ବଜାୟ ରଖିବାକୁ ଚାହୁଁଛି, ତେବେ ତାକୁ ରାଷ୍ଟ୍ର-ପ୍ରାୟୋଜିତ ଆତଙ୍କବାଦ ବନ୍ଦ କରିବାକୁ ପଡିବ । ଏହାସହ ସଫା ସଫା କହିଛନ୍ତି ଯେ, "ଏହି ଥର ଆମେ ଅପରେସନ୍ ସିନ୍ଦୁର 1.0 ରେ ଆମର ଯେଉଁ ସଂଯମତା ଥିଲା ତାହା ବଜାୟ ରଖିବୁ ନାହିଁ । ଏଥର ଆମେ ଏପରି କିଛି କରିବୁ ଯାହା ପାକିସ୍ତାନକୁ ଭାବିବାକୁ ବାଧ୍ୟ କରିବ ଯେ ସେ ଭୂଗୋଳରେ ତା'ର ସ୍ଥାନ ବଜାୟ ରଖିବାକୁ ଚାହୁଁଛି କି ନାହିଁ । ଯଦି ପାକିସ୍ତାନ ଭୂଗୋଳରେ ତା'ର ସ୍ଥାନ ବଜାୟ ରଖିବାକୁ ଚାହୁଁଛି, ତେବେ ତାକୁ ରାଷ୍ଟ୍ର-ପ୍ରାୟୋଜିତ ଆତଙ୍କବାଦ ବନ୍ଦ କରିବାକୁ ପଡିବ," ।

ଆହୁରି ପଢନ୍ତୁ ଅପରେସନ ସିନ୍ଦୂରରେ ସେନାର ପରାକ୍ରମକୁ ପ୍ରଧାନମନ୍ତ୍ରୀଙ୍କ ଉଚ୍ଚ ପ୍ରଶଂସା

ଏହାସହ ସେନାକୁ ପ୍ରସ୍ତୁତ ରହିବାକୁ କହିଛନ୍ତି ଜେନେରାଲ ଉପେନ୍ଦ୍ର ଦ୍ୱିବେଦୀ । "ଯଦି ଭଗବାନ ଚାହାଁନ୍ତି, ତେବେ ତୁମକୁ ଶୀଘ୍ର ଏକ ସୁଯୋଗ ମିଳିବ । ଶୁଭକାମନା,"।

ପହଲଗାମରେ ଆତଙ୍କବାଦୀ ଆକ୍ରମଣ ପରେ ଉପଯୁକ୍ତ ଜବାବ ଦେବାକୁ ଭାରତ ଦ୍ୱାରା ମେଗା ସାମରିକ ଅଭିଯାନ କରାଯାଇଥିଲା। ମେ ୭ ତାରିଖରେ ଭାରତୀୟ ସେନା ପାକିସ୍ତାନ ଏବଂ ପିଓକେ (ପାକିସ୍ତାନ ଅଧିକୃତ କାଶ୍ମୀର)ରେ ନଅଟି ଆତଙ୍କବାଦୀ ଶିବିର ଉପରେ ଆକ୍ରମଣ କରିଥିଲା ।

ଆହୁରି ପଢନ୍ତୁ NCERT ମଡ୍ୟୁଲରେ ଅପରେସନ ସିନ୍ଦୂର

ଆତଙ୍କବାଦୀ ଶିବିର ଉପରେ ଆକ୍ରମଣ ଦୁଇ ଦେଶକୁ ଏକ ଯୁଦ୍ଧ ପରିସ୍ଥିତିକୁ ନେଇ ଆସିଥିଲା । ଶେଷରେ ପାକିସ୍ତାନୀ କମାଣ୍ଡରମାନେ ଆକ୍ରମଣ ବନ୍ଦ କରିବାକୁ ସେମାନଙ୍କ ଭାରତୀୟ ପ୍ରତିପକ୍ଷଙ୍କୁ ଅନୁରୋଧ କରିବା ପରେ ମେ ୧୦ ରେ ଏକ ଯୁଦ୍ଧବିରତି ହୋଇଥିଲା ।

ସେନା ମୁଖ୍ୟ କହିଛନ୍ତି ଯେ ଅପରେସନ ସିନ୍ଦୁର ସମୟରେ ଭାରତ ସଂକଳ୍ପ ନେଇଥିଲା ଯେ କୌଣସି ନିର୍ଦ୍ଦୋଷ ଜୀବନ କ୍ଷତିଗ୍ରସ୍ତ ହେବ ନାହିଁ ଏବଂ କୌଣସି ସାମରିକ ଲକ୍ଷ୍ୟସ୍ଥଳକୁ ନଷ୍ଟ କରାଯିବ ନାହିଁ । କେବଳ ଆତଙ୍କବାଦୀ ଆଡ୍ଡା, ତାଲିମ କେନ୍ଦ୍ର ଏବଂ ସେମାନଙ୍କର ମାଷ୍ଟରମାଇଣ୍ଡମାନଙ୍କୁ ନିପାତ କରିବା ଉଦ୍ଦେଶ୍ୟ ଥିଲା ।

Argus News | argus news | Odisha Latest News, Breaking News, Trending News, Live TV