Student Hacker / ଆଡମିସନ ନହେବାରୁ ସାଇଟ୍ ହ୍ୟାକ୍ କଲେ...FIR ନୁହେଁ ଆସିଲା ଇଣ୍ଟର୍ନସିପ୍ ଅଫର୍

ନୂଆଦିଲ୍ଲୀ: ଆଇଆଇଟି କାନପୁରରେ ବିଟେକ୍ ସାଇବର ସୁରକ୍ଷା ପାଠ୍ୟକ୍ରମ ପାଇଁ ଛାତ୍ରଙ୍କୁ ଆଡମିଶନ ମିଳିଲା ନାହିଁ । ଏହାପରେ ଛାତ୍ର ଜଣକ ୱେବସାଇଟକୁ ହ୍ୟାକ୍ କରି "Site is Hacked, All I Need is Just a Fair Chance" (ସାଇଟ୍ ହ୍ୟାକ୍ ହୋଇଯାଇଛି, ମୋତେ କେବଳ ଗୋଟିଏ ସୁଯୋଗର ଆବଶ୍ୟକ) ମେସେଜ ଲେଖିଥିଲେ । ଏପରିକି ଛାତ୍ର ଜଣକ ଏହାର ସ୍କ୍ରିନସଟ୍ ନେଇ ସାଇବର ସିକ୍ୟୁରିଟି ଦକ୍ଷତାର ପ୍ରମାଣ ସ୍ଵରୂପ ଏକ୍ସ ଓ ରେଡିଟରେ ପୋଷ୍ଟ କରିଥିଲେ । ତା'ପରେ ଯାହା ହେଲା ତାହା ବିରଳ ଥିଲା ।

ଏପରି ଏକ ପ୍ରତିଷ୍ଠିତ ସଂସ୍ଥାନର ୱେବସାଇଟକୁ ହ୍ୟାକ୍ କରିବା ପରେ ଉକ୍ତ ଛାତ୍ରଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିଲା, ବରଂ ସଂସ୍ଥାନ ପକ୍ଷରୁ ତାଙ୍କୁ ଇଣ୍ଟର୍ନସିପ୍ ଅଫର୍ ଆସିଥିଲା । ଆଇଆଇଟି କାନପୁର ପ୍ରଫେସର ମନିନ୍ଦ ଅଗ୍ରୱାଲ କହିଛନ୍ତି ଯେ ଆଡମିଶନ ପ୍ରକ୍ରିୟା ପୂର୍ବରୁ ବନ୍ଦ ହୋଇସାରିଛି, ତଥାପି ସଂସ୍ଥାନ ଛାତ୍ରଟିର ଭବିଷ୍ୟତକୁ ଅନ୍ଧାରକୁ ଠେଲି ଦେବାକୁ ଚାହୁଁନି । ଏଥିଲାଗି ଛାତ୍ରଙ୍କୁ ଗୋଟିଏ ସୁଯୋଗ ଭାବରେ C3iHubରେ ଇଣ୍ଟର୍ନସିପ୍ କରିପାରିବେ ଓ ଆସନ୍ତା ବର୍ଷ ସେ ଆଡମିସନ ପାଇଁ ଉଦ୍ୟମ କରିପାରିବେ ।

• ଅନ୍ୟ ଛାତ୍ରଙ୍କୁ କଣ କହିଲେ ପ୍ରଫେସର

ଏହି ଘଟଣାକୁ ନେଇ ପ୍ରଫେସର ଜଣକ ଅନ୍ୟ ଛାତ୍ରଛାତ୍ରୀଙ୍କୁ ବାର୍ତ୍ତା ଦେବାକୁ କହିଛନ୍ତି ଯେ ଆଡମିସନରେ ସୁଯୋଗ ନ ମିଳିବା ପରେ ଏପରି ପନ୍ଥା ଆପଣେଇବା ଆଦୌ ଠିକ୍ ନୁହେଁ । ସାଇବର ସିକ୍ୟୁରିଟିରେ ଯେଉଁମାନେ ଯୋଗ୍ୟ ସେମାନଙ୍କୁ ସଂସ୍ଥାନ ସବୁବେଳେ ସ୍ଵାଗତ କରେ । ଏଥିଲାଗି ଛାତ୍ରଛାତ୍ରୀମାନେ ନିଜର CVକୁ ସଂସ୍ଥାନ ସହିତ ସେୟାର କରିପାରିବେ ଓ C3iHubରେ ଇଣ୍ଟର୍ନସିପ୍ ଓ ଚାକିରି ପାଇପାରିବେ । ଛାତ୍ରଛାତ୍ରୀ ନିଜର ଲକ୍ଷ୍ୟ ହାସଲ କରିବା ପାଇଁ ସର୍ବଦା ସଠିକ୍ ଓ ଆଇନଗତ ରାସ୍ତା ବାଛିବା ଆବଶ୍ୟକ ।

• ୱେବସାଇଟ୍ ହ୍ୟାକ୍ କରିବାର ପ୍ରକୃତ କାରଣ

ପ୍ରଫେସର ମନିନ୍ଦ ଅଗ୍ରୱାଲ କହିଛନ୍ତି ଯେ ବି.ଟେକ୍ ସାଇବର ସୁରକ୍ଷା ପ୍ରବେଶ ପ୍ରକ୍ରିୟାରେ ହ୍ୟାକଥନ୍ ଜରିଆରେ ଛାତ୍ରଛାତ୍ରୀଙ୍କୁ ନିଜର ପ୍ରତିଭା ଦର୍ଶାଇବାକୁ କୁହାଯାଇଥିଲା । ତେବେ ଏହି ଛାତ୍ର ଜଣକ ସେଥିରେ ବିଫଳ ହୋଇଥିଲେ । ଏଥିଲାଗି ଛାତ୍ର ଜଣକ ସିଧା ୱେବସାଇଟକୁ ହ୍ୟାକ୍ କରି ନିଜର ଯୋଗ୍ୟତା ପ୍ରଦର୍ଶନ କରିଥିଲେ ।

ପଢନ୍ତୁ ଏହି ଖବର: କଲ୍ ରିସିଭ୍ କରିବା ପଡ଼ିଲା ମହଙ୍ଗା; ବ୍ୟାଙ୍କ ଆକାଉଣ୍ଟ ଖାଲି, ଫସିଗଲେ ଯୁବକ

• FIR ନୁହେଁ ଇଣ୍ଟର୍ନସିପ୍ ସୁଯୋଗ

ପ୍ରଥମେ ଏହି ଛାତ୍ରଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ସ୍ଥିର କରାଯାଇଥିଲା । ମାତ୍ର ପରବର୍ତ୍ତୀ ସମୟରେ ସଂସ୍ଥାନ ପ୍ରଥମେ ଛାତ୍ରଙ୍କର ଦାବି ଓ ଦକ୍ଷତାକୁ ବିଚାରକୁ ନେବାକୁ ଚେଷ୍ଟା କରିଥିଲା । ପ୍ରଫେସର ମନିନ୍ଦ କହିଛନ୍ତି ଯେ ବର୍ତ୍ତମାନ ଆଡମିସନ ପ୍ରକ୍ରିୟା ବନ୍ଦ ହୋଇଯାଇଥିବାରୁ, ଏହି ଛାତ୍ରଙ୍କୁ C3iHubରେ ଇଣ୍ଟର୍ନସିପ୍ ପାଇଁ ସୁଯୋଗ ଦିଆଯାଉଛି ।