Illegal Bangladeshi / ସୀମାରେ ହଠାତ୍ ମାଳମାଳ ବାଂଲାଦେଶୀଙ୍କ ଭିଡ଼; ଓଡ଼ିଶା ପଶିବା ଆଶଙ୍କା !

ପଶ୍ଚିମବଙ୍ଗରେ ଆଉ ଅବୈଧ ବାଂଲାଦେଶୀଙ୍କୁ ନିସ୍ତାର ନାହିଁ । ବିଜେପି ସରକାର ଆସିବା ପରେ ଆରମ୍ଭ ହୋଇଛି ବାଂଲାଦେଶୀ ଅନୁପ୍ରବେଶକାରୀଙ୍କ ବିରୋଧରେ ଆକ୍ସନ । ବହୁ ଦିନ ଧରି ପଶ୍ଚିମବଙ୍ଗରେ ଆଡ୍ଡା ଜମାଇ ସରକାରୀ ସୁବିଧାର ଲାଭ ଉଠାଉଥିବା ଅବୈଧ ବାଂଲାଦେଶୀ ଏବେ ଭୟରେ ରାଜ୍ୟ ଛାଡୁଛନ୍ତି । ଏହାପରେ ସୀମାରେ ଜମିଛି ବାଂଲାଦେଶୀଙ୍କ ଭିଡ଼ । ଦିନେ ବେଆଇନ ଭାବେ ଭାରତରେ ପ୍ରବେଶ କରିଥିବା ବାଂଲାଦେଶୀ ଏବେ ଭାରତ ଛାଡ଼ି ନିଜ ଦେଶମୁହାଁ । ତେବେ ଏମାନେ ଓଡ଼ିଶାରେ ପଶିବାର ମଧ୍ୟ ଆଶଙ୍କା ରହିଛି ।

ପଶ୍ଚିମବଙ୍ଗର ନୂଆ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଗତ ମଙ୍ଗଳବାର ଦେଶ ଛାଡ଼ି ଚାଲିଯିବାକୁ ବାଂଲାଦେଶୀ ଅନୁପ୍ରବେଶକାରୀଙ୍କୁ କହିଥିଲେ । ଯଦି ଅବୈଧ ବାଂଲାଦେଶୀ ନିଜେ ଦେଶ ଛାଡ଼ି ଚାଲିଯାଉଛନ୍ତି, ତେବେ ବର୍ତ୍ତିଯିବେ । କିନ୍ତୁ ଯଦି ପୋଲିସ ସେମାନଙ୍କୁ ଚିହ୍ନଟ କରୁଛି, ତେବେ ଆକ୍ସନ ନିଆଯିବ । ଶୁଭେନ୍ଦୁଙ୍କ ଏହି ତାଗିଦ ପରେ ଶେଷରେ ଭୟଭୀତ ବାଂଲାଦେଶୀ ଅନୁପ୍ରବେଶକାରୀ ଭାରତ ଛାଡୁଛନ୍ତି । ଏଣୁ ଏବେ ଭାରତ ଓ ବାଂଲାଦେଶୀ ସୀମାରେ ଭିଡ଼ ଜମିଛି । ରିପୋର୍ଟରେ ଜଣାପଡ଼ିଛି ଯେ ମମତା ସରକାରରେ ଏମାନେ କିଛି ଦଲାଲଙ୍କ ଜରିଆରେ ମାତ୍ର ୧୦ମିନିଟରେ ସୀମାପାର କରୁଥିଲେ । ଏହାପରେ ସ୍ଥାନୀୟ ରାଜନେତାଙ୍କ ସହାୟତାରେ ପଶ୍ଚିମବଙ୍ଗରେ ରହିବା ସହ ଭୋଟ୍ ମଧ୍ୟ ଦେଉଥିଲେ । ମାତ୍ର ଶୁଭେନ୍ଦୁ ସରକାର ଆସିବା ପରେ ଅନୁପ୍ରବେଶକାରୀଙ୍କୁ ତଡ଼ିପାର ପ୍ରକ୍ରିୟା ଆରମ୍ଭ ହୋଇଛି ।

• ହାକିମପୁର ଚେକପୋଷ୍ଟରେ ବାଂଲାଦେଶୀଙ୍କ ଭିଡ଼

ଗତ ମଙ୍ଗଳବାର ସକାଳେ ପଶ୍ଚିମବଙ୍ଗର ଉତ୍ତର ୨୪ ପ୍ରଗଣାର ହାକିମପୁର ଚେକପୋଷ୍ଟରେ ୧୦୦ରୁ ଅଧିକ ବିଦେଶୀ ନାଗରିକ ଏକାଠି ହେବା ଆରମ୍ଭ କରିଥିଲେ । ରିପୋର୍ଟ ଅନୁଯାୟୀ ଏହି ଲୋକମାନେ ପଶ୍ଚିମବଙ୍ଗର ବିଭିନ୍ନ ସ୍ଥାନରେ ଅବୈଧ ଭାବରେ ରହୁଥିଲେ ଏବଂ ଏବେ ବାଂଲାଦେଶ ଫେରିବା ପାଇଁ ସୀମାରେ ପହଞ୍ଚିଛନ୍ତି । ତେବେ ଏହି ପଦକ୍ଷେପ କେନ୍ଦ୍ର ସରକାରଙ୍କ ଗାଇଡଲାଇନ୍ ଅନୁସାରେ ନିଆଯାଇଛି, ଯେଉଁଥିରେ ବେଆଇନ ଭାବେ ଭାରତରେ ପ୍ରବେଶ କରିଥିବା ବାଂଲାଦେଶୀ ନାଗରିକଙ୍କୁ ଦେଶରୁ ବିଦା କରିବା ସାମିଲ।

• ଭାରତ-ବାଂଲାଦେଶ ସୀମା କେତେ ଲମ୍ବା ?

ଭାରତ ଏବଂ ବାଂଲାଦେଶ ମଧ୍ୟରେ ୪୦୯୬ କିଲୋମିଟର ସୀମା ରହିଛି । ପଶ୍ଚିମବଙ୍ଗ ବାଂଲାଦେଶ ସହିତ ପ୍ରାୟ ୨୨୧୬ କିଲୋମିଟରର ଅନ୍ତର୍ଜାତୀୟ ସୀମା ସେୟାର କରେ । ଏହା ଭାରତ ଏବଂ ବାଂଲାଦେଶ ମଧ୍ୟରେ ସବୁଠାରୁ ଲମ୍ବା ରାଜ୍ୟ ସୀମା । ଅନ୍ୟପଟେ ଆସାମ ବାଂଲାଦେଶ ସହିତ ୨୬୨ କିଲୋମିଟର ସୀମା, ତ୍ରିପୁରା ୮୫୬ କିଲୋମିଟର, ମିଜୋରାମ ୩୧୮ କିଲୋମିଟର ଏବଂ ମେଘାଳୟ ୪୪୩ କିଲୋମିଟର ସୀମାରେ ଅବସ୍ଥିତ । କେନ୍ଦ୍ର ଗୃହ ମନ୍ତ୍ରଣାଳୟ ଅନୁଯାୟୀ, ପ୍ରାୟ ୩୨୪୦ କିଲୋମିଟର ସୀମାରେ ବାଡ଼ ଦିଆଯାଇଛି ଓ ୮୫୦ କିଲୋମିଟରରେ ବାଡ଼ ଦେବା ବାକି ଅଛି ।

ପଢନ୍ତୁ ଏହି ଖବର: ଅନୁପ୍ରବେଶକାରୀଙ୍କୁ ନିସ୍ତାର ନାହିଁ, ଓଡ଼ିଶାରୁ ହଟିବେ ବାଂଲାଦେଶ ଅନୁପ୍ରବେଶକାରୀ

• ଓଡ଼ିଶାରେ ପଶିପାରନ୍ତି ବାଂଲାଦେଶୀ

ପଶ୍ଚିମବଙ୍ଗ ସରକାର ଅନୁପ୍ରବେଶକାରୀଙ୍କୁ ଚିହ୍ନଟ ଓ ତଡ଼ିପାର ପ୍ରକ୍ରିୟା ଆରମ୍ଭ କରିବା ପରେ ଓଡ଼ିଶାରେ ବାଂଲାଦେଶୀଙ୍କ ଅନୁପ୍ରବେଶ ଆଶଙ୍କା ରହିଛି । ରାଜ୍ୟ ସରକାର ବିଶେଷ କରି ବାଲେଶ୍ଵର ଓ ମୟୂରଭଞ୍ଜ ଜିଲ୍ଲାର ଅଧିକାରୀଙ୍କୁ ସାବଧାନ ରହିବାକୁ ନିର୍ଦ୍ଦେଶ ଦେଇଛନ୍ତି । ଅନୁପ୍ରବେଶ ଉପରେ ଓଡ଼ିଶା ସରକାର ସଜାଗ ଅଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ବିଭାଗ କାମ କରୁଛି ।