India LPG Ships / ମହାଯୁଦ୍ଧ ମଧ୍ୟରେ ଭାରତର ବଡ଼ କୂଟନୈତିକ ବିଜୟ, ହର୍ମୁଜ ପ୍ରଣାଳୀ ଦେଇ ଆସିଲା ୨ LPG ଜାହାଜ

ମଧ୍ୟପ୍ରାଚ୍ୟ ମହାଯୁଦ୍ଧ ମଧ୍ୟରେ ଭାରତକୁ ମିଳିଛି ବଡ଼ କୂଟନୈତିକ ବିଜୟ । ସବୁଠାରୁ ସମ୍ବେଦନଶୀଳ ହର୍ମୁଜ ପ୍ରଣାଳୀ ଦେଇ ଆସିଛି ଦୁଇଟି LPG ଭର୍ତ୍ତି ଜାହାଜ । ଏଥିରେ ମୋଟ୍ ୯୨ ହଜାର ୭୦୦ ମେଟ୍ରିକ୍ ଟନ୍ LPG ଆସିଥିବାବେଳେ ୨ ଦିନ ମଧ୍ୟରେ ଏହା ମୁମ୍ବାଇ କିମ୍ବା କାଣ୍ଡଲା ବନ୍ଦରରେ ପହଞ୍ଚିବ । ଭାରତରେ LPG ସଂକଟ ଆଶଙ୍କା ଭିତରେ ଏହି ଖବର ବଡ଼ ଆଶ୍ବସ୍ତି ଆଣିଦେଇଛି । ସେପଟେ ଭାରତକୁ ବଡ଼ ବନ୍ଧୁ ବୋଲି କହିଛି ଇରାନ୍ । ଯୁଦ୍ଧ ୧୫ ଦିନରେ ପହଞ୍ଚିଥିବାବେଳେ ଟ୍ରମ୍ପ କିନ୍ତୁ ଇରାନ ଉପରେ ଆକ୍ରମଣକୁ ଜୋରଦାର କରିଛନ୍ତି । ଏପରିକି ଇରାନର ସର୍ବୋଚ୍ଚ ନେତାଙ୍କ ମୁଣ୍ଡ ପାଇଁ ୧୦ ମିଲିଅନ ଡଲାର ବା ଭାରତୀୟ ମୁଦ୍ରାରେ ପ୍ରାୟ ୮୩ କୋଟି ଟଙ୍କା ଘୋଷଣା କରିଛି ଆମେରିକା ।

ଭାରତକୁ ଶକ୍ତି ସୁରକ୍ଷା କ୍ଷେତ୍ରରେ ମିଳିଛି ବଡ଼ ସଫଳତା । କାରଣ 'ଶିବାଲିକ' ପରେ ଭାରତର ଦ୍ୱିତୀୟ LPG ବାହୀ ଜାହାଜ 'ନନ୍ଦା ଦେବୀ' ସୁରକ୍ଷିତ ଭାବେ ହର୍ମୁଜ ପ୍ରଣାଳୀ ଅତିକ୍ରମ କରିଛି । ବର୍ତ୍ତମାନ ଏହି ଜାହାଜଟି ଖୋଲା ସମୁଦ୍ରରେ ପ୍ରବେଶ କରିଥିବା ନେଇ ସରକାରୀ ସୂତ୍ରରୁ ସୂଚନା ମିଳିଛି । ଭାରତୀୟ ନୌସେନା ବର୍ତ୍ତମାନ ଏହି ଜାହାଜକୁ ଏସ୍କର୍ଟ ପ୍ରଦାନ କରୁଛି । ଆଗାମୀ ଦୁଇ ଦିନ ମଧ୍ୟରେ ଏହା ଭାରତୀୟ ବନ୍ଦରରେ ପହଞ୍ଚିବାର ସମ୍ଭାବନା ରହିଛି । ମୁମ୍ବାଇ କିମ୍ବା କାଣ୍ଡଲା ବନ୍ଦର ମଧ୍ୟରୁ କୌଣସି ଗୋଟିଏ ସ୍ଥାନରେ ଏହି ଜାହାଜଟି ନିଜର ମାଲ୍ ଖଲାସ କରିପାରେ ।

ଏଥିସହ ପଢ଼ନ୍ତୁ: ଇରାନ୍ ଯୁଦ୍ଧରେ ଖସିଲା ଆମେରିକାର ଚତୁର୍ଥ ବିମାନ, ୪ ଜଣଙ୍କ ମୃତ୍ୟୁ

'ନନ୍ଦା ଦେବୀ' ଜାହାଜରେ ୪୬,୦୦୦ ମେଟ୍ରିକ୍ ଟନ୍‌ରୁ ଅଧିକ LPG ଗ୍ୟାସ ରହିଛି । ଏହା ପୂର୍ବରୁ 'ଶିବାଲିକ' ନାମକ ଜାହାଜକୁ ମଧ୍ୟ ସୁରକ୍ଷିତ ଭାବେ ବାହାରକୁ ଅଣାଯାଇଥିଲା । ଏଥିରେ ମଧ୍ୟ ୪୬,୦୦୦ ମେଟ୍ରିକ୍ ଟନ୍‌ରୁ ଅଧିକ LPG ଗ୍ୟାସ ରହିଥିବା ବୈଦେଶିକ ବ୍ୟାପାର ବିଭାଗର ମୁଖପାତ୍ର ସୂଚନା ଦେଇଛନ୍ତି । ସରକାରଙ୍କ ସଫଳ କୂଟନୈତିକ ଆଲୋଚନା ପରେ ଏହି ଜାହାଜଗୁଡ଼ିକର ଯାତ୍ରା ପାଇଁ ପଥ ପରିଷ୍କାର ହୋଇଥିଲା ।

ଇରାନ୍- ଆମେରିକା ଓ ଇସ୍ରାଏଲ ମଧ୍ୟରେ ଚାଲିଥିବା ସଂଘର୍ଷ ପରଠାରୁ ପ୍ରଧାନମନ୍ତ୍ରୀ ମୋଦି ଓ ଇରାନ ରାଷ୍ଟ୍ରପତିଙ୍କ ମଧ୍ୟରେ ଫୋନରେ ଆଲୋଚନା ଥିଲା । ଏଥିସହିତ ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ମଧ୍ୟ ତାଙ୍କ ଇରାନ ପ୍ରତିପକ୍ଷ ମହମ୍ମଦ ଅର୍ଗାଚିଙ୍କ ସହ କଥା ହୋଇଥିଲେ । ଭାରତରେ ଅବସ୍ଥାପିତ ଇରାନର ରାଷ୍ଟ୍ରଦୂତ ମହମ୍ମଦ ଫଥାଲି କହିଛନ୍ତି ଯେ, ଇରାନ ଏବଂ ଭାରତ ପରସ୍ପରର ବନ୍ଧୁ ଓ ଉଭୟଙ୍କର ସମାନ ସ୍ୱାର୍ଥ ରହିଛି । ସେଥିପାଇଁ ଭାରତୀୟ ଜାହାଜଗୁଡ଼ିକୁ ସୁରକ୍ଷିତ ଯାତାୟାତ ପାଇଁ ଅନୁମତି ଦିଆଯାଇଛି ।

ଯୁଦ୍ଧ ୧୫ ଦିନରେ ପହଞ୍ଚିଥିବାବେଳେ ଆହୁରି ବଢ଼ିଛି ଆକ୍ରମଣ । ଇରାନର ଗୁରୁତ୍ବପୂର୍ଣ୍ଣ ଖାର୍ଗ ଦ୍ବୀପ ଉପରେ ଶକ୍ତିଶାଳୀ ଆକ୍ରମଣ ହୋଇଛି । ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ ଏନେଇ ଘୋଷଣା କରିଛନ୍ତି । ଆମେରିକା ସେଣ୍ଟ୍ରାଲ୍ କମାଣ୍ଡ ପକ୍ଷରୁ ଖାର୍ଗ ଦ୍ୱୀପ ଉପରେ ମଧ୍ୟ-ପ୍ରାଚ୍ୟ ଇତିହାସରେ ସବୁଠାରୁ ଶକ୍ତିଶାଳୀ ବୋମାମାଡ଼ ହୋଇଛି । ଖାର୍ଗ ଦ୍ୱୀପ ଇରାନର ୯୦ ପ୍ରତିଶତ ତୈଳ ରପ୍ତାନି ପାଇଁ ବ୍ୟବହୃତ ହୁଏ ।

ସେହିପରି ଇରାନ ସମ୍ପୂର୍ଣ୍ଣ ପରାସ୍ତ ହୋଇସାରିଥିବା ଦାବି କରିଛନ୍ତି ଆମେରିକା ରାଷ୍ଟ୍ରପତି । ବ୍ୟାପକ କ୍ଷୟକ୍ଷତି ପରେ ଡିଲ୍ ପାଇଁ ଇରାନ ଚାହୁଁଥିବା କହିଛନ୍ତି ଟ୍ରମ୍ପ । କିନ୍ତୁ ଏଭଳି କିଛି ସର୍ତ୍ତକୁ ସେ କୌଣସି ପରିସ୍ଥିତିରେ ଗ୍ରହଣ କରିବେ ନାହିଁ ବୋଲି ରୋକଠୋକ ଶୁଣାଇ ଦେଇଛନ୍ତି । ଇରାନର ଇସଲାମିକ ରିଭୋଲ୍ୟୁସନାରୀ ଗାର୍ଡ କର୍ପସ- IRGC ଓ ଦେଶର ସାମରିକ ନେତୃତ୍ୱ ଉପରେ ଚାପ ପକାଇବା ପାଇଁ ଆମେରିକା ଏହି ବଡ଼ ପଦକ୍ଷେପ ନେଇଛି । ଇରାନର ସର୍ବୋଚ୍ଚ ନେତା ମୋଜତାବା ଖାମେନେଇଙ୍କ ବିଷୟରେ ସୂଚନା ଦେଲେ ୧୦ ମିଲିୟନ ଡଲାର ବା ଭାରତୀୟ ମୁଦ୍ରାରେ ପ୍ରାୟ ୮୩ କୋଟିରୁ ଅଧିକ ଟଙ୍କାର ପୁରସ୍କାର ଦିଆଯିବ ବୋଲି ଘୋଷଣା କରିଛି ଆମେରିକା ।
ଏଥିସହ ପଢ଼ନ୍ତୁ: ଯୁଦ୍ଧ ମଧ୍ୟରେ ଇରାନ ରାଷ୍ଟ୍ରପତିଙ୍କ ସହ କଥା ହେଲେ ପ୍ରଧାନମନ୍ତ୍ରୀ ମୋଦି