Silver Import Rules / ଆଉ ସହଜ ହେବନି ବିଦେଶରୁ ରୁପା ଆଣିବା, କେନ୍ଦ୍ର ସରକାର ଲଗାଇଲେ ବଡ଼ କଟକଣା

ବଦଳିଗଲା ରୁପା ଆମଦାନୀ ନିୟମ । ଦେଶକୁ ରୁପା ଆଣିବା ଉପରେ କେନ୍ଦ୍ର ସରକାର ଲଗାଇଲେ ବଡ଼ କଟକଣା । ଏଣିକି ଆଉ ସହଜ ହେବନି ବିଦେଶରୁ ରୁପା ବିସ୍କୁଟ୍ ଆଣିବା । ଏଥିପାଇଁ ସରକାରଙ୍କ ଠାରୁ ନେବାକୁ ପଡ଼ିବ ସ୍ପେଶାଲ୍ ପରମିଟ୍ । ଯେଉଁ ରୁପା ପୂର୍ବରୁ 'ଫ୍ରୀ କାଟେଗୋରୀ' ବା ମୁକ୍ତ ବ୍ୟାପାର ଅଧୀନରେ ସହଜରେ ଆମଦାନୀ ହେଉଥିଲା, ଏବେ ତାହାକୁ 'ରେଷ୍ଟ୍ରିକ୍ଟେଡ୍' ବା ନିୟନ୍ତ୍ରିତ ଶ୍ରେଣୀଭୁକ୍ତ କରାଯାଇଛି ।

ବିଶେଷ କରି ୯୯.୯ ପ୍ରତିଶତ ଶୁଦ୍ଧତା ଥିବା ରୁପା ବିସ୍କୁଟ୍, ଅଶୋଧିତ ରୁପା, ଅର୍ଦ୍ଧ-ନିର୍ମିତ ରୁପା ଏବଂ ରୁପା ଗୁଣ୍ଡ ଆମଦାନୀ ଉପରେ ଏହି ନୂଆ ନିୟମ ଲାଗୁ ହେବ । ଏଭଳି ସମସ୍ତ ସାମଗ୍ରୀ ବିଦେଶରୁ ଆଣିବା ପାଇଁ ଏବେ ସରକାରଙ୍କ ବାଧ୍ୟତାମୂଳକ ଅନୁମତି ଆବଶ୍ୟକ । କେତେକ ନିର୍ଦ୍ଦିଷ୍ଟ କାଟେଗୋରୀର ରୁପା ଆମଦାନୀକୁ ଏବେ RBIର ନିୟନ୍ତ୍ରଣ ପରିସରକୁ ମଧ୍ୟ ଅଣାଯାଇଛି ।

ଅଧିକ ପଢ଼ନ୍ତୁ: ଭାରତର 'ଅପରେସନ୍ ରେଜପିଲ୍'; ୧୮୨ କୋଟି ମୂଲ୍ୟର କ୍ୟାପଟାଗନ୍ ଜବତ, ରହିଛି ଅନ୍ତର୍ଜାତୀୟ ଲିଙ୍କ୍‌

ସେହିପରି ଇଣ୍ଡଷ୍ଟ୍ରିଆଲ୍ ବ୍ୟବହାର ଓ ନିବେଶ କ୍ଷେତ୍ରରେ ବ୍ୟବହୃତ ହେଉଥିବା ପ୍ରାୟ ସବୁ ପ୍ରକାରର ରୁପା ଯୋଗାଣ ଶୃଙ୍ଖଳାକୁ ଅଧିକ ସ୍ୱଚ୍ଛ ଓ ନିୟନ୍ତ୍ରିତ କରିବା ପାଇଁ ସରକାର ଏହି ବଡ଼ ପଦକ୍ଷେପ ନେଇଛନ୍ତି । ITC (HS) ବର୍ଗୀକରଣ ଅଧୀନରେ ଥିବା ଆମଦାନୀ ନୀତିର ସଂଶୋଧନ କରି ଏହି ନୂଆ ନିୟମକୁ ତୁରନ୍ତ ଲାଗୁ କରାଯାଇଛି । ପୂର୍ବରୁ ସାଧାରଣ ନିୟାମକ ଯାଞ୍ଚ ପରେ ବ୍ୟବସାୟୀମାନେ ସହଜରେ ରୁପା ଆମଦାନୀ କରିପାରୁଥିଲେ, କିନ୍ତୁ ଏବେ ସରକାରଙ୍କ ଗ୍ରୀନ୍ ସିଗନାଲ୍ ନ ମିଳିଲେ କ୍ଲିୟରାନ୍ସ ମିଳିବା ଅସମ୍ଭବ ।

ଭାରତ ବହୁ ପରିମାଣରେ ସୁନା ଏବଂ ରୁପା ଆମଦାନୀ କରିଥାଏ । ପଶ୍ଚିମ ଏସିଆ ସଙ୍କଟ ଏବଂ ବର୍ଦ୍ଧିତ ଅଶୋଧିତ ତୈଳ ମୂଲ୍ୟ ଆମଦାନୀ ବିଲ୍ ବୃଦ୍ଧି କରିସାରିଛି । ବହୁମୂଲ୍ୟ ଧାତୁର ଆମଦାନୀ ଦେଶର ବୈଦେଶିକ ମୁଦ୍ରା ଭଣ୍ଡାର ଉପରେ ଅତିରିକ୍ତ ଚାପ ପକାଇଥାଏ । ତେଲ ଏବଂ ଗ୍ୟାସ ପରି ସୁନା ଏବଂ ରୁପା ମଧ୍ୟ ଡଲାରରେ ଆମଦାନୀ କରାଯାଏ । ଏହି ସାମଗ୍ରୀଗୁଡ଼ିକର ବର୍ଦ୍ଧିତ ଆମଦାନୀ ଅର୍ଥ ଡଲାର ଖର୍ଚ୍ଚକୁ ହ୍ରାସ କରିବ ।