Engine Fails Mid Air / ଗୋଆରୁ ଦିଲ୍ଲୀ ଯାଉଥିବା ବିମାନର ଇଞ୍ଜିନ୍ ଅଚଳ, ୧୪ ହଜାର ଫୁଟ୍ ଉଚ୍ଚତାର ଜଣାପଡ଼ିଲା ତ୍ରୁଟି

ନୂଆଦିଲ୍ଲୀ: ଉଡ଼ାଣର ମାତ୍ର କିଛି ସମୟରେ ଅଚଳ ହୋଇଗଲା ବିମାନର ଇଞ୍ଜିନ୍ । ତୁରନ୍ତ କରାଗଲା ଜରୁରୀକାଳୀନ ଅବତରଣ । ମଙ୍ଗଳବାର ଗୋଆରୁ ନୂଆଦିଲ୍ଲୀ ଯାଉଥିବା ଇଣ୍ଡିଗୋର ଏକ ବିମାନର ଇଞ୍ଜିନ୍ ଫେଲ୍ ହେବା ପରେ ଏମରଜେନ୍ସିଂ ଲ୍ୟାଣ୍ଡିଂ କରିବାକୁ ପଡ଼ିଛି ।

ସୂଚନା ଅନୁସାରେ, ଇଣ୍ଡିଗୋ ବିମାନ 6E 2102 ଗୋଆରୁ ମଙ୍ଗଳବାର ସକାଳେ ଉଡ଼ାଣ କରିବାର କିଛି ସମୟ ପରେ ହିଁ ଇଞ୍ଜିନ୍‌ରେ ସମସ୍ୟା ଥିବା ଜଣାପଡ଼ିଥିଲା । ଫଳରେ ବିମାନଟିକୁ ଗୋଆର ମୋପା ବିମାନବନ୍ଦରରେ ଜରୁରୀକାଳୀନ ଅବତରଣ କରାଯାଇଛି ।

ଏଥିସହ ପଢ଼ନ୍ତୁ: ପାର୍ବଣ ପୂର୍ବରୁ ବଡ଼ ଝଟକା... କ୍ଷୀର ଦର ବଢ଼ିଲା, ବଢ଼ିବ ଖର୍ଚ୍ଚ 

ମିଳିଥିବା ସୂଚନା ଅନୁସାରେ, ବିମାନ 6E 2102 ସକାଳ ୯ଟା ୧୬ରେ ଗୋଆରୁ ଦିଲ୍ଲୀ ଅଭିମୁଖେ ଉଡ଼ାଣ ଆରମ୍ଭ କରିଥିଲା । ଉଡ଼ାଣର କିଛି ମନିଟ୍ ପରେ ବିମାନଟି ୧୪ ହଜାର ଫୁଟ୍ ଉଚ୍ଚତାରେ ଥିବାବେଳେ ଗୋଟିଏ ଇଞ୍ଜିନ୍ ଅଚଳ ହୋଇ ପଡ଼ିଥିବା ଜଣାପଡ଼ିଥିଲା । ଯାହାପରେ ଏୟାର୍ ଟ୍ରାଫିକ୍ କଣ୍ଟ୍ରୋଲ୍ (ATC) ସାଢ଼େ ୯ଟାରେ ସମ୍ପୂର୍ଣ୍ଣ ଜରୁରୀକାଳୀନ ପରିସ୍ଥିତି ଘୋଷଣା କରିଥିଲା ।

ଯାହା ପରେ ବିମାନଟିକୁ ପୁଣି ଥରେ ଗୋଆର ମୋପା ବିମାନବନ୍ଦରରେ ଜରୁରୀ ଅବତରଣ କରାଯାଇଛି । ସକାଳ ୯ଟା ୫୧ ମିନିଟ୍‌ରେ ରନ୍‌ୱେ ୨୮ରେ ସୁରକ୍ଷିତ ଭାବେ ଓହ୍ଲାଇଛି ବିମାନ । ଏବେ ବିମାନଟକୁ ଷ୍ଟାଣ୍ଡ ନମ୍ବର ୬ରେ ପାର୍କ କରି ଦିଆଯାଇଛି ।

ବିମାନକୁ ସୁରକ୍ଷିତ ପାର୍କ କରାଯିବା ପରେ ATC ଦିନ ୧୦ଟା ୩ରେ ଜରୁରୀକାଳୀନ ସ୍ଥିତି ସମାପ୍ତ ଘୋଷଣା କରିଛି । ବିମାନ ଅବତରଣ ପରେ ଯାତ୍ରୀଙ୍କୁ ସୁରକ୍ଷିତ ଭାବେ ଓହ୍ଲାଇବା ପରେ ବୋର୍ଡିଂ ଅଞ୍ଚଳରେ ରଖା ଯାଇଛି ।

ଏଥିସହ ପଢ଼ନ୍ତୁ: ଗଙ୍ଗା ଏକ୍ସପ୍ରେସୱେରେ ଓଲଟିଲା ଦ୍ରୁତଗାମୀ ଥାର୍; ୪ ଜଣ ଯୁବକ ମୃତ 

ଦିଲ୍ଲୀ ଯିବାକୁ ଥିବା ଯାତ୍ରୀଙ୍କ ପାଇଁ ବିକଳ୍ପ ବିମାନ ବ୍ୟବସ୍ଥା କରାଯାଇଛି । ଦିନ ସାଢ଼େ ୩ଟାରେ ଆଉ ଏକ ବିମାନ ଯାତ୍ରୀଙ୍କୁ ନେଇ ଦିଲ୍ଲୀ ଯିବ । ତେବେ ଏହା ଜରୁରୀ କ୍ଲିୟରାନ୍ସ ଉପରେ ନିର୍ଭର କରେ ।

ସୂତ୍ର ଅନୁସାରେ, ଇଞ୍ଜିନରେ ତ୍ରୁଟି ଆସିଥିବା ଜଣାପଡ଼ିବା ପରେ ବିମାନକୁ ପୁଣି ଥରେ ଗୋଆ ଫେରାଇ ନେବାକୁ ନିଷ୍ପତ୍ତି ନିଆ ଯାଇଥିଲା । ବିମାନଟି ମୋପା ଏୟାରପୋର୍ଟରେ ସୁରକ୍ଷିତ ଅବତରଣ କରିଛି । ଖବର ଲେଖାଯିବା ସୁଦ୍ଧା ଇଣ୍ଡିଗୋ ପକ୍ଷରୁ ଅଧିକାରୀକ ବୟାନ ଜାରି କରାଯାଇ ନାହିଁ ।