ଭାରତରେ ପ୍ରିମିୟମ୍ ପେଟ୍ରୋଲ୍ ମୂଲ୍ୟ ବୃଦ୍ଧି ପରେ ଏବେ ଇଣ୍ଡଷ୍ଟ୍ରିଆଲ୍‌ ଡିଜେଲ୍ ମୂଲ୍ୟ ମଧ୍ୟ ବୃଦ୍ଧି ପାଇଛି । ଇଣ୍ଡିଆନ୍ ଅଏଲ୍ କର୍ପୋରେସନ୍ (IOC) ଇଣ୍ଡଷ୍ଟ୍ରିଆଲ୍‌ ଡିଜେଲ୍ ଦରରେ ଏକ ବଡ଼ ସଂଶୋଧନ କରିଛି । ପ୍ରତି ଲିଟର ପିଛା ୮୭.୬୭ ରୁ ପ୍ରତି ଲିଟର ୧୦୯.୫୯ ଟଙ୍କାକୁ ବୃଦ୍ଧି କରିଛି । ଏହି ନିଷ୍ପତ୍ତି ଶିଳ୍ପ କ୍ଷେତ୍ର, ଲଜିଷ୍ଟିକ୍ସ ଏବଂ ପରିବହନ ଖର୍ଚ୍ଚ ଉପରେ ପ୍ରଭାବ ପକାଇବ ବୋଲି ଆଶା କରାଯାଉଛି ।

ନିୟମିତ ପେଟ୍ରୋଲ୍ ପମ୍ପରେ ଇଣ୍ଡଷ୍ଟ୍ରିଆଲ୍‌ ଡିଜେଲ୍ ବିକ୍ରି ହୁଏ ନାହିଁ । ଏହା ସିଧାସଳଖ କାରଖାନା, ବଡ଼ ଜେନେରେଟର, ଖଣି କମ୍ପାନୀ, ନିର୍ମାଣ ସ୍ଥଳ ଏବଂ ବିଦ୍ୟୁତ୍ ପ୍ଲାଣ୍ଟ ଦ୍ୱାରା କିଣାଯାଏ । ପୂର୍ବରୁ, ତୈଳ କମ୍ପାନୀଗୁଡ଼ିକ ବ୍ରାଣ୍ଡେଡ୍ ଏବଂ ଉଚ୍ଚ-ଅକ୍ଟେନ୍ ପ୍ରିମିୟମ୍ ପେଟ୍ରୋଲ୍ ମୂଲ୍ୟ ପ୍ରତି ଲିଟର ପ୍ରାୟ ୨.୯ ଟଙ୍କାରୁ ୨.୩୫ ଟଙ୍କାକୁ ବୃଦ୍ଧି କରିଥିଲେ । କିନ୍ତୁ ନିୟମିତ ପେଟ୍ରୋଲ୍ ମୂଲ୍ୟ ଅପରିବର୍ତ୍ତିତ ରହିଛି, ଯାହା ଗ୍ରାହକମାନଙ୍କୁ ଆଶ୍ୱସ୍ତି ପ୍ରଦାନ କରୁଛି ।

ମଧ୍ୟପ୍ରାଚ୍ୟରେ ମହାଯୁଦ୍ଧ ମଧ୍ୟରେ ଭାରତରେ ବଢ଼ିଲା ପେଟ୍ରୋଲ୍‌ ଦର । ପେଟ୍ରୋଲିୟମ୍ କମ୍ପାନୀଗୁଡ଼ିକ ପ୍ରିମିୟମ୍ ପେଟ୍ରୋଲର ମୂଲ୍ୟରେ ୨ ଟଙ୍କା ୩୫ ପଇସା ବୃଦ୍ଧି କରିଛନ୍ତି । କିନ୍ତୁ ସାଧାରଣ ପେଟ୍ରୋଲ ଏବଂ ଡିଜେଲର ମୂଲ୍ୟରେ କୌଣସି ପରିବର୍ତ୍ତନ ହୋଇନାହିଁ ଏବଂ ସେଗୁଡ଼ିକ ପୂର୍ବ ପରି ସମାନ ଦରରେ ବିକ୍ରି ହେଉଛି । ଏହି ବର୍ଦ୍ଧିତ ହାର ୨୦ ମାର୍ଚ୍ଚ ରାତିରୁ ଲାଗୁ ହେବ । BPCLର ସ୍ପିଡ୍, HPCLର ପାୱାର ଏବଂ IOCLର XP95 ର ମୂଲ୍ୟ ଲିଟର ପିଛା ୨.୦୯ ଟଙ୍କାରୁ ୨.୩୫ ଟଙ୍କା ପର୍ଯ୍ୟନ୍ତ ବୃଦ୍ଧି ହୋଇଛି ।

ପ୍ରିମିୟମ୍‌ ପେଟ୍ରୋଲ୍‌ ହେଉଛି ଅଧିକ ଅକ୍ଟାନ୍ ସଂଖ୍ୟା ବିଶିଷ୍ଟ ପେଟ୍ରୋଲ । ସାଧାରଣ ପେଟ୍ରୋଲରେ ଅକ୍ଟାନ୍‌ ସଂଖ୍ୟା ୯୧ ରହିଥିବା ବେଳେ ପ୍ରିମିୟମ୍‌ ପେଟ୍ରୋଲରେ ଅକ୍ଟାନ୍‌ ସଂଖ୍ୟା ୯୫ରୁ ଅଧିକ ରହିଥାଏ । ପ୍ରିମିୟମ୍ ପେଟ୍ରୋଲ ଯାନବାହାନ ଇଞ୍ଜିନଗୁଡ଼ିକୁ ମସୃଣ ଏବଂ ଉତ୍ତମ କାର୍ଯ୍ୟଦକ୍ଷତା ପ୍ରଦାନ କରେ । ପ୍ରମୁଖ ସହରଗୁଡ଼ିକର ପ୍ରାୟ ପ୍ରତ୍ୟେକ ପେଟ୍ରୋଲ ପମ୍ପରେ ଏହା ଉପଲବ୍ଧ । ଏହା ସ୍ପୋର୍ଟସ୍ ବାଇକ୍, କାର, ଟର୍ବୋଚାର୍ଜଡ୍ ଯାନ ଏବଂ ଉଚ୍ଚ-କ୍ଷମତା ସମ୍ପନ୍ନ କାରଗୁଡ଼ିକରେ ବ୍ୟବହୃତ ହୁଏ ।

ଏଥିସହ ପଢ଼ନ୍ତୁ: ଗାଡ଼ି ଚାଳକଙ୍କୁ ବଡ଼ ଝଟକା, ବଢ଼ିଲା ପ୍ରିମିୟମ୍‌ ପେଟ୍ରୋଲ୍‌ ଦର୍‌