ଟ୍ରେନ୍ ଟିକେଟ୍ ବୁକିଂ ହେବ ଆହୁରି ସହଜ ଓ ଦ୍ରୁତ । ଯାତ୍ରୀଙ୍କ ସୁବିଧାକୁ ଆଖିଆଗରେ ରଖି ଆଇଆରସିଟିସି ଆଣିଛି ନୂଆ ୱେବସାଇଟ୍‌ର ବିଟା ଭର୍ସନ୍ । ସରଳ ଇଣ୍ଟରଫେସ୍, ଦ୍ରୁତ ଚେକଆଉଟ୍ ଓ ଏକାସାଙ୍ଗରେ ସମସ୍ତ ଶ୍ରେଣୀର ସିଟ୍ ଉପଲବ୍ଧତା ଭଳି ଅନେକ ନୂଆ ସୁବିଧା ସହ ରେଳ ଟିକେଟ୍ ବୁକିଂ ବ୍ୟବସ୍ଥା ଏବେ ଆହୁରି ଆଧୁନିକ ହେବାକୁ ଯାଉଛି ।

ଭାରତୀୟ ରେଳବାଇ ଅନଲାଇନ୍ ଟିକେଟ୍ ବୁକିଂ ବ୍ୟବସ୍ଥାକୁ ଆଧୁନିକ କରିବା ଦିଗରେ ବଡ଼ ପଦକ୍ଷେପ ନେଇଛି । IRCTC ନିଜର ନୂଆ ୱେବସାଇଟ୍‌ର ବିଟା ଭର୍ସନ୍ ସାଧାରଣ ଲୋକଙ୍କ ପାଇଁ ଉନ୍ମୋଚନ କରିଛି । ଏହା ମାଧ୍ୟମରେ ଯାତ୍ରୀମାନେ ନୂଆ ଡିଜାଇନ୍ ଓ ଫିଚର୍‌ର ଅନୁଭୂତି ନେବା ସହ ନିଜର ମତାମତ ଓ ପରାମର୍ଶ ମଧ୍ୟ ଦେଇପାରିବେ ।

ଅଧିକ ପଢ଼ନ୍ତୁ: ମମତାଙ୍କ ମୁଣ୍ଡରେ ଚଡ଼କ; ଖୋଲିବ TMC ସରକାରର ଦୁର୍ନୀତି ଫାଇଲ୍; ଶୁଭେନ୍ଦୁ ସରକାର ଗଠନ କଲେ ନ୍ୟାୟିକ କମିଶନ

ନୂତନ ୱେବସାଇଟର ବିଟା ସଂସ୍କରଣ https://www.irctc.co.in/eticket/ ରେ ଉପଲବ୍ଧ ହେବ । ରେଳ ମନ୍ତ୍ରାଳୟର ସୂଚନା ଅନୁଯାୟୀ, ନୂଆ ୱେବସାଇଟ୍‌ରେ କରାଯାଇଥିବା ଅନେକ ଗୁରୁତ୍ୱପୂର୍ଣ୍ଣ ସୁଧାର ଜୟପୁରର ଏମ୍‌ଏନ୍‌ଆଇଟି (MNIT)ର ଛାତ୍ରଛାତ୍ରୀଙ୍କ ପରାମର୍ଶ ଆଧାରରେ କରାଯାଇଛି । କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ସହ ଆଲୋଚନା ସମୟରେ ଛାତ୍ରମାନେ ୱେବସାଇଟ୍‌ର ଡିଜାଇନ୍ ଓ ୟୁଜର୍ ଏକ୍ସପିରିଏନ୍ସକୁ ଆହୁରି ଉନ୍ନତ କରିବା ପାଇଁ ବିଭିନ୍ନ ପ୍ରସ୍ତାବ ଦେଇଥିଲେ ।
୨୦୦୨ ମସିହାରେ ଆରମ୍ଭ ହୋଇଥିବା ବର୍ତ୍ତମାନର IRCTC ୱେବସାଇଟ୍‌ରେ ପ୍ରତିଦିନ ହାରାହାରି ୧୪.୫ ଲକ୍ଷ ଟିକେଟ୍ ବୁକିଂ ହେଉଛି। ଏବେ ନୂଆ ବିଟା ଭର୍ସନ୍‌କୁ ଅଧିକ ସରଳ, ଦ୍ରୁତ ଓ ୟୁଜର୍-ଫ୍ରେଣ୍ଡଲି କରାଯାଇଛି ।

ନୂଆ ୱେବସାଇଟ୍‌ରେ ଅନେକ ନୂଆ ସୁବିଧା ଯୋଡ଼ାଯାଇଛି । ଅନାବଶ୍ୟକ କ୍ୟାପଚା, ପପ୍-ଅପ୍ ଓ ଧ୍ୟାନ ବିଚଳିତ କରୁଥିବା ଗ୍ରାଫିକ୍ସକୁ ହଟାଯାଇଛି । ଯାତ୍ରୀମାନେ ଏକାସାଙ୍ଗରେ ସମସ୍ତ ଶ୍ରେଣୀର ସିଟ୍ ଉପଲବ୍ଧତା ଦେଖିପାରିବେ । ଟିକେଟ୍ ବୁକିଂ ପ୍ରକ୍ରିୟାରେ ପଦକ୍ଷେପ ସଂଖ୍ୟା କମ୍ କରାଯାଇଥିବାରୁ ଚେକଆଉଟ୍ ଅଧିକ ଦ୍ରୁତ ହେବ । ସେହିପରି, ପୂର୍ବରୁ ସେଭ୍ ହୋଇଥିବା ଯାତ୍ରୀଙ୍କ ସୂଚନା ଉପଲବ୍ଧ ରହିବାରୁ ବାରମ୍ବାର ସମାନ ତଥ୍ୟ ଭରିବାର ଆବଶ୍ୟକତା ପଡ଼ିବ ନାହିଁ ।

ରେଳ ମନ୍ତ୍ରାଳୟ କହିଛି, ବିଟା ଭର୍ସନ୍ ଲଞ୍ଚ କରିବାର ମୂଳ ଉଦ୍ଦେଶ୍ୟ ହେଉଛି ଯାତ୍ରୀଙ୍କଠାରୁ ମତାମତ ଓ ପରାମର୍ଶ ସଂଗ୍ରହ କରିବା। ଏହା ଆଧାରରେ ଅନ୍ତିମ ସଂସ୍କରଣକୁ ଆହୁରି ଉନ୍ନତ କରାଯିବ ।