eRickshaw Jewellery Robbery / ଇ-ରିକ୍ସାରେ ବସିଥିବା ମହିଳା ଦେଲେ ଚକମା; ଚୋରି କରିନେଲେ ୨କୋଟି ହୀରା ସୁନା ଅଳଙ୍କାର

ଜୟପୁର: ଗୁଜୁରାଟ ଜୟପୁରର ମାଣକ ଅଞ୍ଚଳରୁ ଏକ ବଡ଼ ଧରଣର ଅଳଙ୍କାର ଚୋରିର ପର୍ଦ୍ଦାଫାଶ ହୋଇଛି । ଶେଷରେ ଧରାପଡ଼ିଲେ ୨ କୋଟିର ସୁନା ହୀରା ଅଳଙ୍କାର କରିଥିବା ମହିଳା । ପୋଲିସ ମହିଳାଙ୍କୁ ଗିରଫ କରିବା ସହ ସମସ୍ତ ହୀରା ଓ ସୁନା ଅଳଙ୍କାର ଜବତ କରିଛି । ମହିଳା ଜଣକ ଇ-ରିକ୍ସାରେ ବସିଥିବା ବ୍ୟବସାୟୀଙ୍କୁ ଚକମା ଦେଇ ଆଖି ପିଛୁଳାକେ ସୁନା ଅଳଙ୍କାର ଚୋରି କରିନେଇଥିଲେ । ଏହି ମହିଳାଙ୍କୁ ପୋଲିସ କେମିତି ଧରିଲା ଜାଣନ୍ତୁ ।

ଡିସିପି କରନ ଶର୍ମାଙ୍କ କହିବାନୁସାରେ, ଚୋରିର ଶିକାର ହୋଇଥିବା ଅଳଙ୍କାର ବ୍ୟବସାୟୀ ଜଣକ ମାଣକ ଚୌକ ପୋଲିସ ନିକଟରେ ଗତ ଅକ୍ଟୋବର ୧୫ ତାରିଖରେ ଅଭିଯୋଗ କରିଥିଲେ । ବ୍ୟବସାୟୀ ଜଣକ କହିଥିଲେ ଯେ ସେ ଅନ୍ୟ ସୁନା ହୀରା ବ୍ୟବସାୟୀଙ୍କୁ ଅଳଙ୍କାର ଦେଖାଇବା ଓ ବିକିବା ଲାଗି ୨ କୋଟିର ଅଳଙ୍କାର ଧରି ଆସିଥିଲେ । ଅକ୍ଟୋବର ୧୫ ତାରିଖ ଅପରାହ୍ନ ୩ଟାରେ ସେ ସାଙ୍ଗାନେର ଗେଟ୍ ଆଡକୁ ଇ-ରିକ୍ସା ଯୋଗେ ଯାଉଥିଲେ । ତାଙ୍କ ନିକଟରେ ସୁନା ହୀରା ଅଳଙ୍କାର ଭର୍ତ୍ତି ଥିବା ୧୩ଟି ପ୍ୟାକେଟ୍ ଥିଲା । ଏଥିରେ ଅନେକ ଦାମି ଷ୍ଟୋନ୍ ମଧ୍ୟ ଥିଲା ।

• ୨ କୋଟିର ଅଳଙ୍କାର ଚୋରି

ସେ ଇ-ରିକ୍ସାରେ ଯାତ୍ରା କରୁଥିବା ସମୟରେ ଚୋରିର ଶିକାର ହୋଇଥିଲେ । ଚୋରି ହୋଇଥିବା ଅଳଙ୍କାର ମଧ୍ୟରେ ଦୁଇଟି ୧୧.୫୨ କ୍ୟାରେଟ୍ ଏମେରେଲ୍ଡ, ୪ଟି ୧୪୪.୬୦ କ୍ୟାରେଟ୍ ଏମେରେଲ୍ଡ ଓ ୯୪୨.୫୨-କ୍ୟାରେଟ୍ ଏମେରେଲ୍ଡ ଥିବା ୧୧ଟି ପ୍ୟାକେଟ୍ ମଧ୍ୟ ଥିଲା । ଚୋରି ହୋଇଥିବା ମୋଟ ହୀରା ଓ ଅଳଙ୍କାର ମୂଲ୍ୟ ପ୍ରାୟ ୨ କୋଟି ଥିଲା ।

• ପୋଲିସକୁ ଚକମା ଦେବାକୁ ଉଦ୍ୟମ

ଡିସିପିଙ୍କ କହିବାନୁସାରେ, ଅଭିଯୋଗ ଆସିବା ପରେ ସେ ସିସିଟିଭି ଫୁଟେଜ ଯାଞ୍ଚ କରିଥିଲେ । ବୈଷୟକି ଯାଞ୍ଚ ପରେ ଜଣେ ସନ୍ଦିଗ୍ଧ ମହିଳା ବ୍ୟବସାୟୀଙ୍କ ସହ ଇ-ରିକ୍ସାରେ ଯାତ୍ରା କରୁଥିବା ଦେଖାଯାଇଥିଲା । ଏହାପରେ ମହିଳା ସେହି ଇ-ରିକ୍ସାରେ ଓହ୍ଲାଇ କୁଆଡେ ଯାଉଛନ୍ତି ତାହାର ତଦନ୍ତ କରାଯାଇଥିଲା । ମହିଳା ଜଣକ ଚୋରି କରିବା ପରେ ମୁଖ୍ୟ ବଜାର ଦେଇ ପଳାଇ ଯିବାକୁ ଉଦ୍ୟମ କରିଥିଲେ । ପୋଲିସକୁ ଚକମା ଦେବା ଲାଗି ସେ ବାରମ୍ବାର ଅନେକ ରିକ୍ସା ବଦଳାଇଥିବା ମଧ୍ୟ ଦେଖିବାକୁ ମିଳିଥିଲା । ଫଳରେ ପୋଲିସକୁ ମହିଳା ଜଣକୁ ଚିହ୍ନଟ କରିବା କଠିନ ହୋଇପଡ଼ିଥିଲା ।

ପଢନ୍ତୁ ଏହି ଖବର: ବୁର୍ଖା ପିନ୍ଧା ଗ୍ୟାଙ୍ଗ୍ ଡକାୟତି ଉଦ୍ୟମ ବିଫଳ! ପଡୋଶୀ ଚିତ୍କାର କରିବା ପରେ ମାରିଲେ ଛୁ...

• ଏମିତି ଧରାପଡ଼ିଲା ଚୋର

ଏହାପରେ ପୋଲିସ ମହିଳାଙ୍କୁ ଧରିବା ଲାଗି ଏକାଧିକ ଟିମକୁ ଦାୟିତ୍ଵ ଦେଇଥିଲା । ଯାଞ୍ଚ ବେଳେ ଜଣାପଡ଼ିଛି ଯେ ମହିଳା ଜଣକ ଗୁଜୁରାଟର ଅଧିବାସୀ ଓ ସେ ଜୟପୁରରେ ଭଡ଼ାରେ ରହୁଥିଲେ । ଯାଞ୍ଚ ବେଳେ ଜଣାପଡ଼ିଛି ଯେ ମହିଳା ଜଣକ ପ୍ରଥମେ ମୁଖ୍ୟ ମାର୍କେଟକୁ ଯାଇଥିଲେ । ଚୋରି କରିବା ପାଇଁ ସେ ପ୍ରଥମେ ବ୍ୟବସାୟୀଙ୍କୁ ଚିହ୍ନଟ କରିଥିଲେ । ଏହାପରେ ସେ ବ୍ୟବସାୟୀଙ୍କୁ ଅନୁସରଣ କରିଥିଲେ । ଚୋରି କରିବା ପାଇଁ ସଠିକ୍ ସୁଯୋଗ ନମିଳିବା ପର୍ଯ୍ୟନ୍ତ ସେ ବାରମ୍ବାର ବ୍ଯବସାୟୀଙ୍କ ସହ ଯାତ୍ରା କରୁଥିଲା । ଚୋରି କରିବା ପରେ ସେ ବାରମ୍ବାର ରିକ୍ସା ବଦଳାଇଥିଲା । ଏବେ ପୋଲିସ ମହିଳାଙ୍କୁ ଚିହ୍ନଟ କରିବା ସହ ଏହି ଘଟଣାରେ ଆଉ କାହାର ସମ୍ପୃକ୍ତି ଅଛି ସେନେଇ ଯାଞ୍ଚ କରୁଛି ।