୨୦ ବର୍ଷ ପୂର୍ବେ ରୋଜଗାର ଆଶାରେ ଘର ଛାଡ଼ିଥିଲେ ରାଜକୁମାର ନାମକ ଜଣେ ଯୁବକ । କିନ୍ତୁ ଏବେ ବର୍ଷ ବର୍ଷ ପରେ ଯେବେ ଘରକୁ ଫେରିଲେ, ସାଙ୍ଗରେ ଥିଲେ ପତ୍ନୀ ଓ ୪ ପିଲା । ଆଉ ପରିଚୟ ଥିଲା ରଫିକ୍ ଖାନ୍‌ । ଏବେ କିନ୍ତୁ ସେ ପୁଣି ନିଜ ପୁରୁଣା ପରିଚୟ 'ରାଜକୁମାର'କୁ ଫେରିବାକୁ ଚାହୁଁଛନ୍ତି । ତେବେ ୨୦ ବର୍ଷର ଏହି କାହାଣୀ ପଛର ସତ କ'ଣ ?

ଉତ୍ତରପ୍ରଦେଶର ଝାନ୍ସୀରେ ଏକ ଚର୍ଚ୍ଚିତ ଘଟଣା ସାମ୍ନାକୁ ଆସିଛି । ରକ୍ସା ଥାନା ଅଧୀନ ରାଜାପୁର ଗାଁର ରାଜକୁମାରଙ୍କ କହିବା ଅନୁସାରେ, ପ୍ରାୟ ୨୦ ବର୍ଷ ପୂର୍ବ ସେ ରୋଜଗାର ପାଇଁ ପଶ୍ଚିମବଙ୍ଗର ମାଲଦା ଯାଇଥିଲେ । ସେଠାରେ ସେ ଦିନ ମଜୁରିଆ କାମ କରିବା ସମୟରେ ସ୍ଥାନୀୟ ଲୋକ ବହୁ ହଇରାଣ କରିଥିଲେ । ଏମିତିକି ତାଙ୍କୁ ଧର୍ମ ପରିବର୍ତ୍ତନ ପାଇଁ ବାଧ୍ୟ ମଧ୍ୟ କରିଥିଲେ ବୋଲି ସେ ଅଭିଯୋଗ କରିଥିଲେ । ଶେଷରେ ସେ ଧର୍ମ ପରିବର୍ତ୍ତନ କରି ହିନ୍ଦୁରୁ ମୁସଲିମ ହୋଇଥିଲେ । ଆଉ ରାଜକୁମାରରୁ ରଫିକ୍‌ ଖାନ୍ ହୋଇଥିଲେ । ଏପରିକି ରଫିକ୍ ଖାନ୍ ନାମରେ ଆଧାର କାର୍ଡ ମଧ୍ୟ ତିଆରି ହୋଇଥିବା ସେ କହିଛନ୍ତି । ଏହା ପରେ ତାଙ୍କର ଅଫସରୀ ଖାତୁନ ନାମକ ଜଣେ ମୁସଲିମ ଯୁବତୀଙ୍କ ସହ ବିବାହ ହୋଇଥିଲା । ଆଉ ପରେ ତାଙ୍କ ପିଲାଙ୍କ ନାମ ମଧ୍ୟ ମୁସଲିମ ପରମ୍ପରା ଅନୁଯାୟୀ ରଖାଯାଇଛି ।

ରାଜକୁମାର କହିଛନ୍ତି ଯେ, ଗତ ୫ ବର୍ଷ ହେବ ସେ ଝାନ୍ସୀକୁ ଯିବା ଆସିବା କରୁଥିଲେ । କିନ୍ତୁ ଏବେ ସେ ତାଙ୍କ ପତ୍ନୀ ଓ ୪ ପିଲାଙ୍କୁ ନେଇ ସ୍ଥାୟୀ ଭାବେ ଗାଁକୁ ଫେରିଛନ୍ତି । ତେବେ ମୁସଲିମ ହୋଇଥିବାରୁ ତାଙ୍କୁ ତାଙ୍କ ପରିବାର ଓ ସମ୍ପର୍କୀୟଙ୍କ ଠାରୁ ବିଭିନ୍ନ ଅପବାଦ ଶୁଣିବାକୁ ପଡ଼ୁଛି । ଏହାପରେ ସେ ପୁଣି ହିନ୍ଦୁ ଧର୍ମ ଗ୍ରହଣ କରିବା ପାଇଁ ଝାନ୍ସୀ ଜିଲ୍ଲାପାଳଙ୍କ ନିକଟରେ ଆବେଦନ କରିଛନ୍ତି । ତାଙ୍କ ପତ୍ନୀ ମଧ୍ୟ ଏହି ନିଷ୍ପତ୍ତିରେ ସହମତ ଥିବା ସେ କହିଛନ୍ତି ।

ଅନ୍ୟପଟେ, ରାଜାପୁର ଗ୍ରାମର ମୁଖିଆ ରାଜାପୁର ଗ୍ରାମର ମୁଖିଆ ଗୋବିନ୍ଦ ସିଂହ ଯାଦବ କହିଛନ୍ତି ଯେ ଜିଲ୍ଲା ମାଜିଷ୍ଟ୍ରେଟଙ୍କ କାର୍ଯ୍ୟାଳୟ ଏହି ଘଟଣାର ତଦନ୍ତ କରୁଛି । ଜିଲ୍ଲାପାଳ ଯାହା ନିଷ୍ପତ୍ତି ନେବେ ପୂରା ଗାଁ ସେହି ନିଷ୍ପତ୍ତିକୁ ଗ୍ରହଣ କରିବ । ସେହିପରି ସେ ଆହୁରି କହିଛନ୍ତି, ରାଜକୁମାରଙ୍କ ପରିବାରର ଜମି ବୁନ୍ଦେଲଖଣ୍ଡ ଇଣ୍ଡଷ୍ଟ୍ରିଆଲ ଡେଭଲପମେଣ୍ଟ ଅଥରିଟି (BIDA) ଅଧୀନକୁ ଯାଇଥିବା ଏବଂ ଏଥିପାଇଁ କ୍ଷତିପୂରଣ ମିଳିଥିବା ନେଇ ଗାଁରେ ଚର୍ଚ୍ଚା ହେଉଛି । ଏହି କାରଣରୁ ସେ ଜମିରେ ନିଜ ଅଂଶ ପାଇବା ଓ ଆଧାର କାର୍ଡରେ ନାମ ପରିବର୍ତ୍ତନ ପାଇଁ ପୁଣି ହିନ୍ଦୁ ଧର୍ମ ଗ୍ରହଣ କରିବାକୁ ଚାହୁଁଥିବା କଥା ଗ୍ରାମ ପ୍ରଧାନ କହିଛନ୍ତି ।

ଘଟଣାର ଅଭିଯୋଗ ପରେ ପୋଲିସ ମଧ୍ୟ ତଦନ୍ତ ଆରମ୍ଭ କରିଛି । ତଦନ୍ତ ସମୟରେ ରାଜକୁମାରଙ୍କ ମା' ତାଙ୍କୁ ନିଜ ପୁଅ ବୋଲି ଚିହ୍ନଟ କରିଥିବା କୁହାଯାଉଛି । ତେବେ ଆଗାମୀ ଦିନରେ ସମାଜର ବୈଠକ ପରେ ‘ଶୁଦ୍ଧିକରଣ’ କରାଯିବ ବୋଲି ଗାଁରେ ଆଲୋଚନା ହେଉଛି ।

ଏଥି ସହ ପଢନ୍ତୁ: ଗରମରୁ ବଞ୍ଚିବାକୁ ଗାମୁଛା ହଲାଇଲେ…ଅଟକିଗଲା ଏକ୍ସପ୍ରେସ ଟ୍ରେନ୍! ଘଟଣା ଶୁଣି ସବୁ ଆଶ୍ଚର୍ଯ୍ୟ…