Jharkhand teacher quits job within 24 hours: ଚାକିରି ମିଳିବାର ମାତ୍ର ୨୪ ଘଣ୍ଟା ମଧ୍ୟରେ ଜଣେ ଶିକ୍ଷକଙ୍କୁ ନେବାକୁ ପଡ଼ିଛି ଅବସର। ଆପଣଙ୍କୁ ହୁଏତ ଏକଥା ଆଶ୍ଚର୍ଯ୍ୟ ଲାଗୁ ଥାଇପାରେ ହେଲେ ଏହା ସତ୍ୟ। ସଦ୍ୟ ଝାଡଡ଼ଖଣ୍ଡରେ ଦେଖିବାକୁ ମିଳିଛି ଏଭଳି ଘଟଣା। ନିକଟରେ ରାଜ୍ୟରେ ୨୬,୦୦୦ ଶିକ୍ଷକଙ୍କ ନିଯୁକ୍ତି ପ୍ରକ୍ରିୟାର ଅଂଶ ଭାବରେ, ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ସୋମବାର (ଜୁନ୍ ୨୯) ହଜାରରୁ ଅଧିକ ଶିକ୍ଷକଙ୍କୁ ନିଯୁକ୍ତି ପତ୍ର ବଣ୍ଟନ କରିଥିଲେ। ରାଜଧାନୀ ରାଞ୍ଚି ସ୍ଥିତ ତାନା ଭଗତ ଇଣ୍ଡୋର ଷ୍ଟାଡିୟମ ଠାରେ ଏହି ନିଯୁକ୍ତି ସମାରୋହ ଅନୁଷ୍ଠିତ ହୋଇଥିଲା। ଏହି ଅବସରରେ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ରାଜ୍ୟର ଦୂରଦୂରାନ୍ତ ଅଞ୍ଚଳରେ ଶିକ୍ଷା ଏବଂ ସଚେତନତାର ବାର୍ତ୍ତା ପ୍ରସାର କରିବାକୁ ନବନିଯୁକ୍ତ ଶିକ୍ଷକଙ୍କୁ ଆହ୍ୱାନ କରିଥିଲେ। ନିଯୁକ୍ତି ପତ୍ର ପାଇବା ପରେ କାର୍ଯ୍ୟକ୍ରମରେ ଉପସ୍ଥିତ ଅନେକ ଶିକ୍ଷକ ଆନନ୍ଦରେ ଝଲସି ଉଠିଥିଲେ।

ନିଯୁକ୍ତି ପତ୍ର ପାଇବା ପରେ ଦୁଃଖି ଥିଲେ ଶିକ୍ଷକ
ହଜାରରୁ ଅଧିକ ଶିକ୍ଷକଙ୍କ ଭିଡ଼ ମଧ୍ୟରେ, ଅନେକଙ୍କୁ ନିଯୁକ୍ତି ପତ୍ର ମିଳିଥିଲା, ହେଲେ ସେମାନଙ୍କ ମୁହଁରେ ଖୁସି ଅପେକ୍ଷା ଦୁଃଖ ଦେଖିବାକୁ ମିଳିଥିଲା। ନିଯୁକ୍ତି ପତ୍ର ପାଇବା ସତ୍ତ୍ୱେ ଶିକ୍ଷକଙ୍କ ମୁହଁରେ ଦୁଃଖ ଦେଖିବାକୁ ମିଳିବା ପଛରେ ରହିଥିବା ସବୁଠାରୁ ବଡ଼ କାରଣ ହେଉଛି ନିଯୁକ୍ତି ପ୍ରକ୍ରିୟାରେ ବିଳମ୍ବ। ଅନେକ ଶିକ୍ଷକ ସରକାରୀ ଚାକିରି ପାଇଁ ନିଯୁକ୍ତି ପତ୍ର ପାଇବା ସତ୍ତ୍ୱେ ମଧ୍ୟ ଅସନ୍ତୁଷ୍ଟ ରହିଥିଲେ। କାରଣ ସେମାନଙ୍କ ମଧ୍ୟରୁ ଅନେକ ଶିକ୍ଷକଙ୍କ ଚାକିରୀରୁ ଅବସର ନେବା ପାଇଁ ମାତ୍ର କିଛି ଦିନ ବାକି ରହିଥିଲା। ଏପରିକି କେତେକ ଶିକ୍ଷକ ମାତ୍ର କିଛି ଘଣ୍ଟା ପରେ ଅବସର ନେଇଥାନ୍ତେ।

ଅବସର ପରେ ମଧ୍ୟ ମିଳିଲା ନିଯୁକ୍ତି ପତ୍ର
ରାଜ୍ୟରେ ଏପରି ଜଣେ ଶିକ୍ଷକ ଥିଲେ ଯିଏ ସରକାରୀ ଚାକିରି ପାଇଁ ନିଯୁକ୍ତି ପତ୍ର ପାଇଥିଲେ, ହେଲେ ତାଙ୍କର ଅବସର ବୟସ ମାସେ ପୂର୍ବରୁ ପୂରଣ ହୋଇ ସାରିଥିଲା। କହିବାକୁ ଗଲେ ତାଙ୍କର ସେବାରୁ ଅବସର ମାସ ପୂର୍ବରୁ ହୋଇ ସାରିଥିଲା। ପାଲାମୁ ଜିଲ୍ଲାର ନିୟୁମ୍ ଅନସାରୀ ମଧ୍ୟ ସେହି ୧୦୪୨ ଶିକ୍ଷକଙ୍କ ସହିତ ତାଙ୍କର ନିଯୁକ୍ତି ପତ୍ର ପାଇଥିଲେ। ହେଲେ ତଥାପି ସେ ମାସେ ପୂର୍ବରୁ ୨୦୨୬ ମେ ୩୧ ତାରିଖରେ ୬୦ ବର୍ଷ ବୟସରେ ପାଦ ଥାପିଥିଲେ।

ଏହା ସହ ପଢନ୍ତୁ: ଟିଇଟି ବିରୋଧରେ ରାଜରାସ୍ତାକୁ ଓହ୍ଲାଇଲେ ଶିକ୍ଷକ; ପରୀକ୍ଷାକୁ ନେଇ ତେଜିଲା ବିବାଦ

ଏହାର ଅର୍ଥ ହେଉଛି ଯେ ସେ ବୟସଗତ ଦୃଷ୍ଟିକୋଣରୁ ମାସେ ପୂର୍ବରୁ ତାଙ୍କ ଚାକିରୀରୁ ଅବସର ନେଇ ସାରିଛନ୍ତି। ବର୍ତ୍ତମାନ ନିଯୁକ୍ତି ପତ୍ର ପାଇବା ସତ୍ତ୍ୱେ ସେ ବିଦ୍ୟାଳୟରେ ପାଠ ପଢ଼ାଇ ପାରିବେ ନାହିଁ କିମ୍ବା ତାଙ୍କୁ ଦରମା ମଧ୍ୟ ମିଳିବ ନାହିଁ। ଗୋଟିଏ ପଟେ ତାଙ୍କୁ ଜୁନ୍ ୨୯ ତାରିଖରେ ନିଯୁକ୍ତି ପତ୍ର ମିଳିଛି, ହେଲେ ଅନ୍ୟ ପଟେ ତାଙ୍କର ସେବା ମେ ୩୧ ତାରିଖରେ ଶେଷ ହୋଇସାରିଛି। ରାଜ୍ୟର ପାଲାମୁ ଜିଲ୍ଲାର ଶିକ୍ଷକ ନିୟୁମ୍ ଅନସାରୀ ସରକାରଙ୍କ ନିକଟରେ ଏକ ସମାଧାନ ଖୋଜିବା ପାଇଁ ଦାବି କରିଛନ୍ତି ଯାହା ଦ୍ୱାରା ତାଙ୍କର କଠିନ ପରିଶ୍ରମ ଏବଂ ଚୟନ ବ୍ୟର୍ଥ ନହେବ।

ସରକାରୀ ଶିକ୍ଷକ ନିଯୁକ୍ତ ହେବାର ଦିନକ ପରେ ଅବସର
ଅନ୍ୟ ଜଣେ ଶିକ୍ଷକଙ୍କ ବିଷୟରେ ମଧ୍ୟ ସମାନ କାହାଣୀ ସାମ୍ନାକୁ ଆସିଛି। ଯିଏ ତାଙ୍କ ନିଯୁକ୍ତି ପତ୍ର ପାଇବାର ପରଦିନ ଅବସର ନେବାକୁ ଯାଉଥିଲେ। ଜାମତାରା ଅଞ୍ଚଳର ନନ୍ଦଲାଲ ରାୱାନି ଜୁନ୍ ୨୯ ତାରିଖରେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ଠାରୁ ତାଙ୍କର ନିଯୁକ୍ତି ପତ୍ର ପାଇଥିଲେ, ହେଲେ ଜୁନ୍ ୩୦ ତାରିଖରେ ସେ ୬୦ ବର୍ଷ ବୟସରେ ପଦାର୍ପଣ କରିଥିଲେ। ଏହାର ଅର୍ଥ ହେଉଛି ସେ ମଧ୍ୟ ଅବସର ନେଇଛନ୍ତି।

ନନ୍ଦଲାଲ ରାୱାନି କହିଛନ୍ତି ଯେ ସେ ୨୦୧୬ରେ ଝାଡ଼ଖଣ୍ଡ ଶିକ୍ଷକ ଯୋଗ୍ୟତା ପରୀକ୍ଷା (JTET) ପାସ୍ କରିଥିଲେ। ଏହା ପରେ, ସେ ନିଯୁକ୍ତି ପ୍ରକ୍ରିୟା ଆରମ୍ଭ ହେବା ପାଇଁ ଦୀର୍ଘ ସମୟ ଅପେକ୍ଷା କରିଥିଲେ। ସହକାରୀ ଶିକ୍ଷକଙ୍କ ପାଇଁ ନିଯୁକ୍ତି ପ୍ରକ୍ରିୟା ୨୦୨୩ ରୁ ଆରମ୍ଭ ହୋଇଥିଲା। ହେଲେ ପ୍ରଶାସନିକ ଏବଂ ଆଇନଗତ ପ୍ରକ୍ରିୟା ଯୋଗୁଁ ନିଯୁକ୍ତିରେ ବିଳମ୍ବ ହେବାରୁ, ସେ ତାଙ୍କର ନିଯୁକ୍ତି ପତ୍ର ପାଇବାର ପରଦିନ ଅବସର ନେଇଥିଲେ।