ବେଙ୍ଗାଳୁରୁ: କୁଆଡ଼େ ବୁଲିବାକୁ ଗଲେ ଆମେ ଫଟୋ ଉଠାଇ ଥାଉ । ଯାହା ସନ୍ତକ ହୋଇ ରୁହେ, ପୁରୁଣା ଦିନକୁ ସ୍ମୃତି ହୋଇ ମନେ ପକାଏ । ଆଉ ଅନେକଙ୍କ ସଉକ ଥାଏ କେଉଁ ଆଡ଼େ ଗଲେ ବି ଫଟୋ ଉଠାଇବା । ଆଉ ଏହି ସଉକ କ୍ଷଣିକରେ ଗୋଟିଏ ପରିବାରର ୫ ଜଣଙ୍କ ମୃତ୍ୟୁର କାରଣ ପାଲଟିଛି ।

ଏଭଳି ଅଘଟଣ ଘଟିଛି କର୍ଣ୍ଣାଟକରେ । ଯେଉଁଠି ସେଲ୍ଫି ନେବା ବେଳେ ଗୋଟିଏ ପରିବାରର ୫ ଜଣଙ୍କୁ ଭସାଇ ନେଇଛି କାବେରୀ ନଦୀର ପ୍ରଖର ସ୍ରୋତ । କର୍ଣ୍ଣାଟକର ପ୍ରସିଦ୍ଧ ପର୍ଯ୍ୟଟନ ସ୍ଥଳୀ ମୁଥାଥି ନିକଟରେ ଏହି ଅଘଟଣ ଘଟିଛି ।

ଏଥିସହ ପଢ଼ନ୍ତୁ: ରଜ ସଂକ୍ରାନ୍ତିରେ ଅଘଟଣ; ପୁରୀ ବେଳାଭୂମିରେ ବୁଡ଼ିଗଲେ ୪ ପର୍ଯ୍ୟଟକ 

ସୂଚନା ଅନୁସାରେ, ଗୋଟିଏ ପରିବାରର ୫ ଜଣ କାବେରୀ ନଦୀ କୂଳରେ ଥିବା ମନ୍ଦିରରେ ପହଞ୍ଚି ପୂଜାର୍ଚ୍ଚନା କରିଥିଲେ । ପୂଜାର୍ଚ୍ଚନା ପରେ ବୁଧବାର ସନ୍ଧ୍ୟା ପ୍ରାୟ ୫ଟାରେ ଫଟୋ ଉଠାଇବାକୁ ନଦୀ କୂଳକୁ ଯାଇଥିଲେ । ଫଟୋ ଚକ୍କରରେ ନଦୀ ଭିତରକୁ ସମସ୍ତେ ଚାଲି ଯାଇଥିଲେ ।

ଆଉ ସେହି ସମୟରେ କାବେରୀର ପ୍ରଖର ସ୍ରୋତରେ ପରିବାରର ୫ ଜଣ ଭାସି ଯାଇଥିଲେ । ଯାହା ପରେ ଆରମ୍ଭ ହୋଇଥିଲା ସର୍ଚ୍ଚ ଅପରେସନ୍ । ମୃତକ ୨୦ ବର୍ଷୀୟ ଚୈତ୍ରା, ୨୮ ବର୍ଷୀୟ ପ୍ରିୟଙ୍କା, ୩୮ ବର୍ଷୀୟ ଶ୍ଵେତା, ୫୦ ବର୍ଷୀୟ ବିଜୟମ୍ମା ଓ ମହେଶ ବୋଲି ଜଣାପଡ଼ିଛି ।

ମୁଥାଥି ନିକଟ କାବେରୀ ନଦୀରେ ୫ ଜଣ ଭାସିଯିବା ଖବର ପାଇ ଅଗ୍ନିଶମ ବାହିନୀ ଓ ଅନ୍ୟ ଜରୁରୀକାଳୀନ ଏଜେନ୍ସି ପହଞ୍ଚି ରେସ୍କ୍ୟୁ ଓ ସର୍ଚ୍ଚ ଅପରେସନ୍ ଆରମ୍ଭ କରିଥିଲେ । ୫ ଜଣଙ୍କ ମୃତଦେହ ଉଦ୍ଧାର ପରେ MIMS ବ୍ୟବଚ୍ଛେଦ ଲାଗି ନିଆଯାଇଛି ।

ଏଥିସହ ପଢ଼ନ୍ତୁ: ମଝି ନଈରେ ଓଲଟିଲା ଡଙ୍ଗା; ଭୟଙ୍କର ଚିତ୍କାରରେ କମ୍ପିଲା ଗଙ୍ଗା ଘାଟ 

ଫଟୋ ପାଇଁ ପରିବାର ସଫା

ତେବେ, ଫଟୋ ପାଇଁ ପରିବାରର ୫ ଜଣଙ୍କ ଜୀବନ ଯିବା ନୂଆ ନୁହେଁ । ଏଭଳି ମାମଲା ପୂର୍ବରୁ ସାମ୍ନାକୁ ଆସିଛି । ଅନେକ ସମୟରେ ସେଲ୍ଫି ନେବା ଚକ୍କରରେ ଆମେ ଅସାବଧାନ ହେଇ ଯାଉ । ଆଉ କ୍ଷଣିକରେ ଜୀବନ ଚାଲିଯାଏ । ତେଣୁ ଯେବେ ବି କୌଣସି ନଦୀ, ଜଳାଶୟ, ସମୁଦ୍ର ନିକଟରେ ଫଟୋ ଉଠାଇବା ବେଳେ ସତର୍କ ରୁହନ୍ତୁ, ସୁରକ୍ଷିତ ରୁହନ୍ତୁ, ଜୀବନ ବଞ୍ଚାନ୍ତୁ ।