Karnataka High Court / ସ୍ତ୍ରୀକୁ ଘର କାମ କରିବା ବା ଶାଶୂଙ୍କ ସେବା କରିବାକୁ ବାଧ୍ୟ କରିପାରିବ ନାହିଁ ସ୍ଵାମୀ: କର୍ଣ୍ଣାଟକ ହାଇକୋର୍ଟ

ବାଙ୍ଗାଲୋର: କର୍ଣ୍ଣାଟକ ହାଇକୋର୍ଟ ବୈବାହିକ ଜୀବନକୁ ନେଇ ଏକ ବଡ଼ ରାୟ ଦେଇଛନ୍ତି । ଜଣେ ସ୍ୱାମୀ ତାଙ୍କ ସ୍ତ୍ରୀଙ୍କୁ ଘରକାମ କରିବାକୁ କିମ୍ବା ତାଙ୍କ ପିତାମାତାଙ୍କ ଯତ୍ନ ନେବାକୁ ବାଧ୍ୟ କରିପାରିବେ ନାହିଁ । କୋର୍ଟ ସ୍ପଷ୍ଟ କରିଛନ୍ତି ଯେ ପୁରୁଷ ଏବଂ ମହିଳା ଉଭୟେ ଘରକାମ ଏବଂ ପାରିବାରିକ ଦାୟିତ୍ୱ ସମାନ ଭାବରେ ବାଣ୍ଟିବା ଉଚିତ । ଏହା ମଧ୍ୟ କୁହାଯାଇଛି ଯେ ପିତାମାତାଙ୍କ ଯତ୍ନ ନେବାର ପ୍ରାଥମିକ ଦାୟିତ୍ୱ ବୋହୂ କିମ୍ବା ଜ୍ୱାଇଁଙ୍କ ନୁହେଁ, ବରଂ ସେମାନଙ୍କ ପୁଅ କିମ୍ବା ଝିଅଙ୍କର ହୋଇଥାଏ ।

• କଣ ପୂରା ଘଟଣା ?

ବିଚାରପତି ଚିଲ୍ଲାକୁର ସୁମଲତା ଏକ ଶୁଣାଣି ସମୟରେ ଏହି ମନ୍ତବ୍ୟ ଦେଇଛନ୍ତି । ଆବେଦନକାରୀ ତାଙ୍କ ସ୍ତ୍ରୀଙ୍କୁ ମାସିକ ୫,୦୦୦ ଟଙ୍କା ଏବଂ ତାଙ୍କ ନାବାଳକ ଝିଅକୁ ୪,୦୦୦ ଟଙ୍କା ଭରଣପୋଷଣ ଭତ୍ତା ଦେବାକୁ ନିର୍ଦ୍ଦେଶ ଦେଇଥିବା ତୁମକୁରୁ ପରିବାର କୋର୍ଟର ଆଦେଶକୁ ଚ୍ୟାଲେଞ୍ଜ କରିଥିଲେ । ସ୍ୱାମୀ ଯୁକ୍ତି ବାଢିଥିଲେ ଯେ ସେ ଜଣେ ଶ୍ରମିକ ଏବଂ ଏତେ ପରିମାଣର ଟଙ୍କା ଦେବା କଷ୍ଟକର, କାରଣ ତାଙ୍କୁ ତାଙ୍କ ବୃଦ୍ଧ ପିତାମାତାଙ୍କର ମଧ୍ୟ ଯତ୍ନ ନେବାକୁ ପଡୁଥିଲା ।

ଆବେଦନକାରୀ ଏହା ମଧ୍ୟ ଅଭିଯୋଗ କରିଛନ୍ତି ଯେ ବିବାହର କିଛି ମାସ ପରେ, ତାଙ୍କ ସ୍ତ୍ରୀ ଘର କାମ କରିବାକୁ କିମ୍ବା ତାଙ୍କ ଶ୍ୱଶୁର ଘରର ଯତ୍ନ ନେବାକୁ ମନା କରିଦେଇଥିଲେ । ଏହା ବ୍ୟତୀତ, ସେ ତାଙ୍କ ପିତାମାତାଙ୍କ ଅନୁମତି ବିନା ବାରମ୍ବାର ତାଙ୍କ ବାପ ଘରକୁ ଯାଇଥିଲେ । ସବୁ ଶୁଣିବା ପରେ ହାଇକୋର୍ଟ ଏହି ଯୁକ୍ତିଗୁଡ଼ିକର କଡ଼ା ବିରୋଧ କରିଥିଲେ ।

ପଢନ୍ତୁ ଏହି ଖବର: 'ସ୍ତ୍ରୀ ସହ କଥା ନହେବା ନିଷ୍ଠୁରତା ନୁହେଁ'; HCଙ୍କ ରାୟ ବଦଳାଇଲେ ସୁପ୍ରିମକୋର୍ଟ

• ବଡ଼ ରାୟ ଶୁଣାଇଲେ କୋର୍ଟ

କୋର୍ଟ କହିଥିଲେ ଯେ ସ୍ୱାମୀଙ୍କ ବୟାନ ସୂଚାଇ ଦେଉଛି ଯେ ସେ ତାଙ୍କ ସ୍ତ୍ରୀଙ୍କୁ ଘରକାମ କରିବା ଏବଂ ତାଙ୍କ ପିତାମାତାଙ୍କ ସେବା କରିବା ପାଇଁ ଜଣେ କର୍ମଚାରୀ ଭାବରେ ବ୍ୟବହାର କରୁଥିଲେ । କୋର୍ଟ ଏହା ମଧ୍ୟ କହିଛନ୍ତି ଯେ ଜଣେ ମହିଳାଙ୍କର ତାଙ୍କ ପିତାମାତାଙ୍କୁ ଭେଟିବା ମୌଳିକ ଅଧିକାର ଏବଂ ଏଥିପାଇଁ ତାଙ୍କୁ କାହାର ଅନୁମତି ଆବଶ୍ୟକ ହେବା ଉଚିତ ନୁହେଁ । କୋର୍ଟ ମହିଳାଙ୍କ ସ୍ୱାଧୀନତା ଏବଂ ସମାନ ଅଧିକାର ପ୍ରତି ତାଙ୍କର ପ୍ରତିବଦ୍ଧତାକୁ ଦୋହରାଇ ସ୍ୱାମୀଙ୍କ ଆବେଦନକୁ ଖାରଜ କରିଦେଇଛନ୍ତି । ଘରକାମରେ ଉଭୟ ପତିପତ୍ନୀଙ୍କ ସମାନ ଭାଗିଦାରୀ ରହିବା ଉଚିତ ବୋଲି ହାଇକୋର୍ଟ କହିଛନ୍ତି ।