ସୁପ୍ରିମକୋର୍ଟ ବୈବାହିକ ଜୀବନରେ ବିବାଦ ଏବଂ ଆତ୍ମହତ୍ୟା ପାଇଁ ପ୍ରୋତ୍ସାହନ ସହ ଜଡ଼ିତ ଏକ ମାମଲାରେ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି । କୋର୍ଟ ଜଣେ ସ୍ୱାମୀଙ୍କୁ ଦୋଷମୁକ୍ତ କରି ସ୍ପଷ୍ଟ ଭାବରେ କହିଛନ୍ତି ଯେ କିଛି ଦିନ ପାଇଁ ସ୍ତ୍ରୀଙ୍କ ଠାରୁ ଯୋଗାଯୋଗ ବନ୍ଦ ରଖିବା ନିଷ୍ଠୁରତା ଭାବରେ ବିବେଚିତ ହୋଇପାରିବ ନାହିଁ । ବୈବାହିକ ଜୀବନରେ ମତଭେଦ ଏବଂ ବେଳେବେଳେ ନୀରବତା ସ୍ୱାଭାବିକ ।

• କ’ଣ ପୂରା ଘଟଣା ?

ଜୟେଶ କନ୍ନନ ଏବଂ ତାଙ୍କ ପତ୍ନୀ ସଙ୍ଗୀତା ଏକ ମାମଲାରେ ବୈବାହିକ ଜୀବନକୁ ନେଇ ଏପରି ଏକ ରାୟ ଦେଇଛନ୍ତି ସର୍ବୋଚ୍ଚ ଅଦାଲତ । ଜୟେଶ ଓମାନର ମସ୍କଟରେ ଜଣେ ଇଞ୍ଜିନିୟର ଭାବରେ କାମ କରୁଥିଲେ । ସେମାନେ ୨୦୧୪ ନଭେମ୍ବର ୨ରେ ବିବାହ କରିଥିଲେ । ବିବାହର କିଛି ଦିନ ପରେ, ନଭେମ୍ବର ୨୯ରେ ଜୟେଶ ମସ୍କଟକୁ ଚାଲିଯାଇଥିଲେ । ପରବର୍ତ୍ତୀ ସମୟରେ ସଙ୍ଗୀତା ତାଙ୍କ ବାପାମାଆଙ୍କ ଘରକୁ ଫେରି ଆସିଥିଲେ ଏବଂ ୨୦୨୫ ଜାନୁଆରୀ ୩୧ରେ ସେଠାରେ ଆତ୍ମହତ୍ୟା କରିଥିଲେ ।

ସଙ୍ଗୀତାଙ୍କ ପରିବାର ପକ୍ଷରୁ ହୋଇଥିବା ଅଭିଯୋଗ ପତ୍ରରେ ଦାବି କରାଯାଇଥିଲା ଜୟେଶ ମସ୍କଟକୁ ଯିବାପରେ ସଙ୍ଗୀତାଙ୍କ ସହ ଫୋନରେ କଥାବାର୍ତ୍ତା ବନ୍ଦ କରିଦେଇଥିଲେ । ଲଗାତାର ୧୩ ଦିନ ପର୍ଯ୍ୟନ୍ତ ଯୋଗାଯୋଗ ନ କରିବାରୁ ସଙ୍ଗୀତା ମାନସିକ ନିର୍ଯାତନା ପାଇଥିଲେ ଏବଂ ସେ ଆତ୍ମହତ୍ୟା ଭଳି ଚରମ ପଦକ୍ଷେପ ନେଇଥିଲେ । ଏହାକୁ ଆଧାର କରି ଟ୍ରାଏଲ୍ କୋର୍ଟ ଜୟେଶଙ୍କୁ ଭାରତୀୟ ଦଣ୍ଡ ସଂହିତାର ଧାରା ୪୯୮ଏ (ମହିଳାଙ୍କ ପ୍ରତି ନିଷ୍ଠୁରତା) ଅନୁଯାୟୀ ଦୋଷୀ ସାବ୍ୟସ୍ତ କରିଥିଲେ ଏବଂ ତାଙ୍କୁ ୩ ବର୍ଷ ସଶ୍ରମ କାରାଦଣ୍ଡ ଏବଂ ₹୧୦,୦୦୦ ଜରିମାନା ଦଣ୍ଡିତ କରିଥିଲେ । ଟ୍ରାଏଲ କୋର୍ଟଙ୍କ ଏହି ରାୟକୁ ମାଡ୍ରାସ ହାଇକୋର୍ଟ ମଧ୍ୟ ସ୍ଥିର ରଖିଥିଲେ ।

• କାହିଁକି ଦୋଷମୁକ୍ତ କଲେ ସୁପ୍ରିମକୋର୍ଟ ?

ଯେତେବେଳେ ମାମଲାଟି ସୁପ୍ରିମକୋର୍ଟରେ ପହଞ୍ଚିଲା ସେତେବେଳେ ବିଚାରପତି ଜେ.କେ. ମାହେଶ୍ୱରୀ ଏବଂ ଅତୁଲ ଏସ. ଚନ୍ଦୁରକରଙ୍କ ଖଣ୍ଡପୀଠ ଜାଣିବାକୁ ପାଇଲେ ଯେ ଅଭିଯୁକ୍ତଙ୍କ ବିରୁଦ୍ଧରେ ପର୍ଯ୍ୟାପ୍ତ ପ୍ରମାଣ ଉପସ୍ଥାପନ କରିବାରେ ସରକାରୀ ଓକିଲ ସମ୍ପୂର୍ଣ୍ଣ ବିଫଳ ହୋଇଛନ୍ତି । ଏହାପରେ ସର୍ବୋଚ୍ଚ ଅଦାଲତ ମାମଲାରେ ନିମ୍ନଲିଖିତ ଦିଗଗୁଡ଼ିକୁ ନେଇ ଏହି ଗୁରୁତ୍ଵପୂର୍ଣ୍ଣ ରାୟ ଶୁଣାଇଛନ୍ତି । ସେଗୁଡ଼ିକ ହେଉଛି:

କଲ୍ ରେକର୍ଡର ଅଭାବ: ସରକାରୀ ଓକିଲ କେବଳ ମୌଖିକ ସାକ୍ଷ୍ୟ ଏବଂ ହ୍ୱାଟ୍ସଆପ୍ ମେସେଜଗୁଡ଼ିକ ନ ଆସିବା ରେକର୍ଡ ଉପସ୍ଥାପନ କରିଥିଲେ । କୋର୍ଟ କହିଥିଲେ ଯେ କେବଳ ହ୍ୱାଟ୍ସଆପ୍ ମେସେଜ ନ ଆସିବା ଦ୍ଵାରା ଧରାଯାଇପାରିବ ନାହିଁ ଯେ କଥାବାର୍ତ୍ତା ହୋଇନାହିଁ । ସେପଟେ ସ୍ୱାମୀ ଦାବି କରିଥିଲେ ଯେ ତାଙ୍କ ସ୍ତ୍ରୀଙ୍କ ଫୋନ୍ ଖରାପ ଥିବାରୁ ସେ ତାଙ୍କ ଶ୍ୱଶୁରଙ୍କ ସହ କଥା ହୋଇଥିଲେ, କିନ୍ତୁ ଏହି କଥାକୁ ମିଛ ସାବ୍ୟସ୍ତ କରିବା ଲାଗି ଶ୍ଵଶୁର କୌଣସି କଲ୍ ରେକର୍ଡ ଦେଇନାହାନ୍ତି ।

ପଢନ୍ତୁ ଏହି ଖବର: ହାଇକୋର୍ଟକୁ ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ; ୩ମାସ ଭିତରେ ଶୁଣାଅ ସଂରକ୍ଷିତ ରାୟ

ଏକାଠି ରହିବା ସମୟରେ କୌଣସି ନିର୍ଯାତନା ଦିଆଯାଇନାହିଁ: ସୁପ୍ରିମକୋର୍ଟ ଆଉ ଏକ ଗୁରୁତ୍ଵପୂର୍ଣ୍ଣ ଦିଗକୁ ଉଲ୍ଲେଖ କରି କହିଛନ୍ତି ଯେ ଦମ୍ପତି ଭାରତରେ ଏକାଠି ରହୁଥିବା ସମୟରେ (୨ ନଭେମ୍ବରରୁ ୨୯ ନଭେମ୍ବର, ୨୦୧୪) କୌଣସି ନିଷ୍ଠୁରତା କିମ୍ବା ହଇରାଣର ଅଭିଯୋଗ ଆସିନଥିଲା କିମ୍ବା ପ୍ରମାଣିତ ହୋଇନଥିଲା ।

• ନିଷ୍ଠୁରତାର ପରିଭାଷା କଣ ବୁଝାଇଲେ ସୁପ୍ରିମକୋର୍ଟ

'ମଞ୍ଜୁ ରାମ କାଲିତା ବନାମ ଆସାମ ରାଜ୍ୟ' ମାମଲାର ପୂର୍ବ ନିଷ୍ପତ୍ତିକୁ ଉଦ୍ଧୃତ କରି ସୁପ୍ରିମକୋର୍ଟ ପୁନର୍ବାର କହିଛନ୍ତି ଯେ ନିଷ୍ଠୁରତାକୁ ସ୍ଥାୟୀ, ପୁନରାବୃତ୍ତି କିମ୍ବା ବେଳେବେଳେ ଅଳ୍ପ ସମୟ ପାଇଁ ହୋଇଥାଏ । ସାମାନ୍ୟ ଝଗଡ଼ା କିମ୍ବା କିଛି ଦିନ ପାଇଁ ନୀରବତାକୁ ନିଷ୍ଠୁରତା କୁହାଯାଇପାରିବ ନାହିଁ ।