ବ୍ରେନ୍ ଡେଡ୍ ସ୍ଵାମୀଙ୍କ ଶୁକ୍ରାଣୁ ନେବା ପାଇଁ ସ୍ତ୍ରୀଙ୍କୁ ମିଳିଲା ଅନୁମତି । ଶେଷ ନିଶ୍ଵାସ ବେଳେ ପୂରଣ ହେବ ରୋଗୀଙ୍କ ବାପା ହେବାର ସ୍ଵପ୍ନ । ଭେଣ୍ଟିଲେଟରରେ ଥିବା ସ୍ଵାମୀଙ୍କ ସ୍ପର୍ମ ବା ଶୁକ୍ରାଣୁ ନେବାକୁ ଶେଷରେ କେରଳ ହାଇକୋର୍ଟ ଅନୁମତି ପ୍ରଦାନ କରିଛନ୍ତି । କୋର୍ଟ କୋଝିକୋଡ୍ ସ୍ଥିତ ହସ୍ପିଟାଲକୁ ଆଦେଶ ଦେଇଛନ୍ତି ଯେ ସେମାନେ ଏକ ମାନ୍ୟତା ପ୍ରାପ୍ତ 'ଆସିଷ୍ଟେଡ୍ ରିପ୍ରଡକ୍ଟିଭ ଟେକ୍ନୋଲୋଜି' (ART) କ୍ଲିନିକ୍ ଜରିଆରେ ବ୍ୟକ୍ତିଙ୍କ ପ୍ରଜନନ କୋଷଗୁଡ଼ିକୁ ବାହାର କରି ତାହାକୁ ସୁରକ୍ଷିତ ରଖିବା ପ୍ରକ୍ରିୟାକୁ ଶେଷ କରିବେ ।

ଆବେଦନକାରୀ ମହିଳାଙ୍କ ଅନୁସାରେ, ତାଙ୍କ ସ୍ଵାମୀକୁ ହାଡଫୁଟି ହେବାର ପ୍ରାୟ ୨ ସପ୍ତାହ ପରେ ମସ୍ତିସ୍କର ଶିରା ପ୍ରଶିରା ଥକ୍କି ଯିବା ପରି ଏକ ଗମ୍ଭୀର ସମସ୍ୟା ହୋଇଥିଲା । ଏହାପରେ ତାଙ୍କୁ ବ୍ରେନ୍ ଡେଡ୍ ବୋଲି ଘୋଷଣା କରାଯାଇଥିଲା ଏବଂ ସେ ବର୍ତ୍ତମାନ ଭେଣ୍ଟିଲେଟରରେ ଅଛନ୍ତି । ମହିଳା ଜଣକ କହିଥିଲେ ଯେ ସ୍ଵାମୀଙ୍କ ସ୍ଥିତି ଏପରି ଅଛି ଯେ ସେ ART ଆକ୍ଟର ଧାରା ୨୨ ଅନୁଯାୟୀ ଜରୁରୀ ଲିଖିତ ସହମତି ଦେଇପାରିବେ ନାହିଁ ।

ପଢନ୍ତୁ ଏହି ଖବର: ଯୌତୁକରେ ଟଙ୍କାଟିଏ, ବ୍ୟବହାରରେ ନଡ଼ିଆ; ଚର୍ଚ୍ଚାରେ ଆର୍ମି ମେଜରଙ୍କ ବାହାଘର

ମହିଳା ଜଣକ ଏହା ମଧ୍ୟ କହିଥିଲେ ଯେ ଯଦି ଆହୁରି ବିଳମ୍ବ ହେଉଛି, ତେବେ ତାଙ୍କର ମାଆ ହେବାର ସ୍ଵପ୍ନ ଓ ସ୍ଵାମୀଙ୍କ ବାପା ହେବାର ସ୍ଵପ୍ନ ଅଧୁରା ରହିଯିବ । ଜଷ୍ଟିସ ଘଟଣାକୁ ଗମ୍ଭୀରତାର ସହ ନେଇ ଅନୁମତି ପ୍ରଦାନ କରିଥିଲେ । ଏବେ କେବଳ ପ୍ରଜନନ କୋଷଗୁଡ଼ିକୁ ବାହାର କରି ସୁରକ୍ଷିତ ରଖିବାକୁ ଅନୁମତି ପ୍ରଦାନ କରିଛନ୍ତି । ଏହି ଘଟଣାର ଗମ୍ଭୀରତାକୁ ଆହୁରି ଭଲ ଭାବେ ଯାଞ୍ଚ କରିବା ଲାଗି ଆଗାମୀ ଶୁଣାଣି ଏପ୍ରିଲ ୭କୁ ଧାର୍ଯ୍ୟ କରାଯାଇଛି ।

କାହିଁକି ଐତିହାସିକ ଏହି ରାୟ ?
କୌଣସି ବି ପ୍ରଜନନ ପ୍ରକ୍ରିୟା ଲାଗି ସ୍ଵାମୀ-ସ୍ତ୍ରୀଙ୍କ ଲିଖିତ ସହମତି ବାଧ୍ୟତାମୂଳକ । ହେଲେ ସ୍ଵାମୀଙ୍କ 'ବ୍ରେନ୍ ଡେଡ୍' ସ୍ଥିତିରେ ତାଙ୍କର ସହମତି ନେବା ଅସମ୍ଭବ । ଏଣୁ କୋର୍ଟଙ୍କ ଏହି ଐତିହାସିକ ରାୟ ଆଗାମୀ ଦିନରେ ଏଭଳି ଘଟଣାରେ ଦମ୍ପତିଙ୍କୁ ସହାୟ ହେବ ।

ଅଧିକ ଖବର ପଢନ୍ତୁ...