Airline Controversy / କରିଥାନ୍ତେ ବିଦେଶ ଯାତ୍ରା, ଖର୍ଚ୍ଚ କରିଥିଲେ ୪୯ ଲକ୍ଷ; ହେଲେ ଏୟାରପୋର୍ଟରୁ ଫେରିଲେ

ତାମିଲନାଡୁ ସଲେମସ୍ଥିତ ଏକ ମେଡିକାଲ୍ ଇନଷ୍ଟିଚ୍ୟୁଟର ଅଧ୍ୟକ୍ଷ ଜେ.ଏସ୍. ସତୀଶକୁମାର ତାଙ୍କ ପରିବାର ସହିତ ବିଦେଶ ଯାତ୍ରା କରିବାକୁ ଅନେକ ସ୍ଵପ୍ନ ଦେଖିଥିଲେ । ଏଥିପାଇଁ ଲକ୍ଷ ଲକ୍ଷ ଖର୍ଚ୍ଚ କରି ଟିକେଟ୍ ବି କରିଥିଲେ । କିନ୍ତୁ ବିମାନ ବନ୍ଦରରେ ଲଗେଜ୍ ଧରି ପହଞ୍ଚିଲା ବେଳକୁ ତାଙ୍କୁ ବିମାନରେ ଚଢେଇ ଦେଇନଥିଲା ଏୟାରଲାଇନ୍ସ । ଶେଷରେ ଅପମାନିତ ଏବଂ କ୍ରୋଧିତ ହୋଇ ନିଜ ଘରକୁ ଫେରିଥିଲେ । ଏବେ ସତୀଶକୁମାରଙ୍କ ବେଙ୍ଗାଲୁରୁରୁ ପେରୁର ଯାତ୍ରା ଶେଷରେ ଏକ ଲମ୍ବା ଆଇନଗତ ଲଢ଼େଇରେ ପରିଣତ ହୋଇଛି । କେଏଲଏମ ରୟାଲ୍ ଡଚ୍ ଏୟାରଲାଇନ୍ସର ବରିଷ୍ଠ ଅଧିକାରୀଙ୍କ ବିରୁଦ୍ଧରେ ମାମଲା ପଞ୍ଜିକରଣ କରିବାକୁ ପୋଲିସକୁ ନିର୍ଦ୍ଦେଶ ଦେଇଛି ।

ଏହା ଏକ ବିରଳ ମାମଲା ଯେଉଁଥିରେ ବିମାନରେ ପ୍ରବେଶ କରିବାକୁ ମନା କରିବା ଅଭିଯୋଗରେ ବିମାନ କମ୍ପାନୀର ଉଚ୍ଚ ପଦାଧିକାରୀଙ୍କ ବିରୁଦ୍ଧରେ ଫୌଜଦାରୀ ମାମଲା ଆରମ୍ଭ ହୋଇଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଯେଉଁ ଅଧିକାରୀଙ୍କ ବିରୁଦ୍ଧରେ ଏଫଆଇଆର ରୁଜୁ କରାଯାଇଛି ସେମାନଙ୍କ ମଧ୍ୟରେ ବିମାନ କମ୍ପାନୀର ସିଇଓ ଏବଂ ସିଓଓ ଅନ୍ତର୍ଭୁକ୍ତ ।

• ବିଜନେସ୍ କ୍ଲାସରେ ବୁକ୍ ହୋଇଥିଲା ୮ଟି ସିଟ୍

ସତୀଶ କୁମାର କହିଛନ୍ତି ଯେ ସେ ଓ ତାଙ୍କ ପରିବାର ପେରୁ ବୁଲିବାକୁ ଯିବା ଲାଗି KLM ଏୟାରଲାଇନ୍ସରେ ୮ଟି ନନ୍-ରିଫଣ୍ଡେବଲ୍ ବିଜନେସ୍ କ୍ଲାସ୍ ଟିକେଟ ବୁକ୍ କରିଥିଲେ, ଯାହାର ମୂଲ୍ୟ ପ୍ରାୟ ୪୯ ଲକ୍ଷ ଟଙ୍କା ଥିଲା । ସେମାନେ ଜୁନ ୧୯, ୨୦୨୪ରେ ବିମାନ ପ୍ରସ୍ଥାନ ସମୟର ବହୁତ ପୂର୍ବରୁ ବେଙ୍ଗାଲୁରୁ ବିମାନବନ୍ଦରରେ ପହଞ୍ଚିଥିଲେ । ଫେରିବା ଟିକେଟ୍ ଜୁଲାଇ ୩, ୨୦୨୪ ପାଇଁ ବୁକ୍ କରାଯାଇଥିଲା । ଚେକ୍-ଇନ୍ କାଉଣ୍ଟରରେ ଘଣ୍ଟା ଘଣ୍ଟା ଅପେକ୍ଷା କରିବା ପରେ ବିମାନ କର୍ମଚାରୀମାନେ ଉଡ଼ାଣ ଆରମ୍ଭ ହେବାର କିଛି ସମୟ ପୂର୍ବରୁ ସେମାନଙ୍କୁ ଜଣାଇ ଦେଇଥିଲେ ଯେ ସେମାନଙ୍କୁ ବିମାନରେ ଚଢ଼ିବାକୁ ଅନୁମତି ଦିଆଯିବ ନାହିଁ ।

• କାହିଁକି ଚଢିବାକୁ ଦିଆଗଲାନି ଅନୁମତି ?

ଏୟାରଲାଇନ୍ସ ଅଧିକାରୀମାନେ ପେରୁ ଭିସା ନଥିବାକୁ ଏହାର କାରଣ ବୋଲି ଦର୍ଶାଇଥିଲେ । କିନ୍ତୁ ସତୀଶକୁମାରଙ୍କ କହିବା କଥା ହେଉଛି ଯେ ଏହା ନିୟମକୁ ଭୁଲ ଭାବେ କୁହାଯାଇଥିଲା । ସେ କହିଥିଲେ ଯେ ଯେଉଁ ଭାରତୀୟଙ୍କ ନିକଟରେ ଆମେରିକା, ୟୁକେ, ଅଷ୍ଟ୍ରେଲିଆ ଦେଶ ଭଳି ଦେଶ ପାଇଁ ବୈଧ ଭିସା କିମ୍ବା ବାସସ୍ଥାନ ଅନୁମତି ଅଛି ସେହି ଭାରତୀୟ ନାଗରିକମାନଙ୍କୁ ପୃଥକ ଭାବେ ପେରୁ ପାଇଁ ଭିସାର ଆବଶ୍ୟକତା ହୋଇନଥାଏ ।

• 'ଏୟାରଲାଇନ୍ସ ନେଇଥିଲା ଭୁଲ ନିଷ୍ପତ୍ତି'

ଅଭିଯୋଗକାରୀଙ୍କ ଅନୁଯାୟୀ, ପରବର୍ତ୍ତୀ ଘଟଣା ସେମାନଙ୍କ ଅସୁବିଧାକୁ ଆହୁରି ବଢ଼ାଇ ଦେଇଥିଲା । ନିଷ୍ପତ୍ତିର ପ୍ରତିବାଦ କରିବା ଏବଂ ଆଇନଗତ କାର୍ଯ୍ୟାନୁଷ୍ଠାନର ଧମକ ଦେବା ପରେ ସତୀଶଙ୍କ ପରିବାରକୁ ପରବର୍ତ୍ତୀ ଅନ୍ତର୍ଜାତୀୟ ଯାତ୍ରା ସମୟରେ ଅନେକ ଅସୁବିଧାର ସମ୍ମୁଖୀନ ହେବାକୁ ପଡ଼ିଥିଲା । ସତୀଶକୁମାର ଅଭିଯୋଗ କରିଛନ୍ତି ଯେ ପରେ ଯେତେବେଳେ ତାଙ୍କ ପୁଅ ବିଦେଶ ଗସ୍ତ କରିଥିଲେ, ସେତେବେଳଏ ତାଙ୍କ ପୁଅକୁ ସିଙ୍ଗାପୁରରେ ଅଟକ ରଖାଯାଇଥିଲା ଏବଂ ପେରୁରୁ ତାଙ୍କୁ ନିର୍ବାସନ ବିଷୟରେ ପଚରାଯାଇଥିଲା, ଯଦିଓ ସେ କେବେ ସେହି ଦେଶକୁ ଯାଇ ନଥିଲେ ।

ପଢନ୍ତୁ ଏହି ଖବର: ୨୦୧୬ ପରଠାରୁ ଦେଶରେ ୧୧ଟି ବିମାନ ସେବା ବନ୍ଦ; କଣ ଏହା ପଛର କାରଣ ?

ସତୀଶକୁମାର କହିଛନ୍ତି ଯେ ସେ ମଧ୍ୟ ସମାନ ଅସୁବିଧାର ସମ୍ମୁଖୀନ ହୋଇଥିଲେ । ସତୀଶ ପରେ ଯେତେବେଳେ ଅଷ୍ଟ୍ରେଲିଆ ଯାତ୍ରା କରିଥିଲେ ସେତେବେଳେ ତାଙ୍କୁ ବାରମ୍ବାର ପଚରାଯାଇଥିଲା ଏବଂ ତଦନ୍ତ କରାଯାଇଥିଲା । ଏସବୁ ପରେ ମଧ୍ୟ ସେହି ପେରୁ ଯାତ୍ରା ଲାଗି ବାତିଲ ହୋଇଥିବା ଟିକେଟର ଏପର୍ଯ୍ୟନ୍ତ ଟଙ୍କା ଫେରସ୍ତ ମିଳିନାହିଁ । ସେ ଆହୁରି କହିଛନ୍ତି ଯେ କୋର୍ଟଙ୍କ ହସ୍ତକ୍ଷେପ ହେଉଛି ଦାୟିତ୍ୱ ନିଶ୍ଚିତ କରିବା ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା । ନଚେତ୍, ଏହା କାହା ସହିତ ମଧ୍ୟ ହୋଇପାରେ ।

• କଣ କହୁଛି ବିମାନ କମ୍ପାନୀ ?

ଏହି ଘଟଣା ସମ୍ପର୍କରେ ସଫେଇ ଦେଇ KLM ରୟାଲ୍ ଡଚ୍ ଏୟାରଲାଇନ୍ସ କହିଛି ଯେ ସେମାନେ ସମସ୍ତ ପ୍ରଯୁଜ୍ୟ ଯାତ୍ରା ନିୟମ ପାଳନ କରିବାକୁ ବାଧ୍ୟ । ସେମାନେ ଯାତ୍ରୀମାନଙ୍କୁ ସେମାନଙ୍କର ବୈଧ ଏବଂ ସଠିକ୍ କାଗଜପତ୍ର ଥିବା ନିଶ୍ଚିତ କରିବାକୁ ଅନୁରୋଧ କରିଥାନ୍ତି । ତେବେ କିଛି ଯାତ୍ରୀଙ୍କ ସହିତ ହୋଇଥିବା ଅସୁବିଧା ପାଇଁ ସେମାନେ ଦୁଃଖିତ ବୋଲି ପ୍ରକାଶ କରିଛନ୍ତି ।