Argus News - ୨୦୧୬ ପରଠାରୁ ଦେଶରେ ୧୧ଟି ବିମାନ ସେବା ବନ୍ଦ; କଣ ଏହା ପଛର କାରଣ ?

୨୦୧୬ ପରଠାରୁ ଭାରତରେ ୧୧ଟି ବିମାନ ସେବା ବନ୍ଦ ହୋଇଥିବା ନେଇ ଆଜି ସଂସଦରେ ସୂଚନା ଦେଇଛନ୍ତି କେନ୍ଦ୍ର ସରକାର । ବେସାମରିକ ବିମାନ ଚଳାଚଳ ରାଷ୍ଟ୍ରମନ୍ତ୍ରୀ ମୁରଲୀଧର ମୋହୋଲ ରାଜ୍ୟସଭାରେ ଏକ ଲିଖିତ ଉତ୍ତର ମାଧ୍ୟମରେ ଏ ସମ୍ପର୍କରେ କହିଛନ୍ତି । ଛୋଟ ଛୋଟ କମ୍ପାନୀଗୁଡ଼ିକ ଉପରେ ଆର୍ଥିକ ଚାପ ସହିତ ବଡ଼ ବଡ଼ କମ୍ପାନୀର ସ୍ଥିତି ମଜଭୁତ ହେବା ଏହି ବିମାନ ସେବା ବନ୍ଦ ହେବା ପଛର କାରଣ ବୋଲି ମନ୍ତ୍ରୀ କହିଛନ୍ତି । ଦେଶରେ ସେବା ବନ୍ଦ କରିଥିବା ବିମାନ କମ୍ପାନୀଗୁଡ଼ିକୁ ଏଯାବତ ସରକାରଙ୍କୁ କୋଟି କୋଟି ଟଙ୍କା ବକେୟା ଅର୍ଥ ଜମା କରିନାହାନ୍ତି । 

କେନ୍ଦ୍ରମନ୍ତ୍ରୀ ସ୍ପଷ୍ଟ କରିଛନ୍ତି ଯେ ଭାରତର ବିମାନ ଚଳାଚଳ କ୍ଷେତ୍ର ସରକାରୀ ନିୟନ୍ତ୍ରଣ ବାହାରେ ରହୁଛି । ବିମାନ କମ୍ପାନୀଗୁଡ଼ିକ ସମ୍ପୂର୍ଣ୍ଣ ଭାବରେ ବାଣିଜ୍ୟିକ ଆଧାରରେ କାର୍ଯ୍ୟ କରୁଛନ୍ତି । ତେଣୁ କମ୍ପାନୀଗୁଡ଼ିକର କାର୍ଯ୍ୟ ଏବଂ ଆର୍ଥିକ ନିଷ୍ପତ୍ତି ବଜାର ପରିସ୍ଥିତି ଉପରେ ନିର୍ଭର କରୁଛି । ସେ ଆହୁରି କହିଛନ୍ତି ଯେ ବିମାନ ଚଳାଚଳ କ୍ଷେତ୍ରରେ ଭାରତ ସରକାରଙ୍କ ଭୂମିକା ଶିଳ୍ପରେ ସନ୍ତୁଳନ ବଜାୟ ରଖିବା ସହ ଯାତ୍ରୀଙ୍କ ସ୍ୱାର୍ଥରେ ନୀତି ପ୍ରଣୟନ କରିବା ପର୍ଯ୍ୟନ୍ତ ସୀମିତ ।

• କାହିଁକି ଅଲବିଦା କହୁଛି ବିମାନ କମ୍ପାନୀ ?

ବିଭାଗୀୟ ମନ୍ତ୍ରୀ କହିଛନ୍ତି ଯେ ଆର୍ଥିକ ଚାପ, ବିମାନ ଉପଲବ୍ଧତାରେ ଅଭାବ ଏବଂ ଆଭ୍ୟନ୍ତରୀଣ ପରିଚାଳନା ସମସ୍ୟା ଏହି ବିମାନ ସେବା ବନ୍ଦ ହେବାର ମୁଖ୍ୟ କାରଣ । ଭାରତୀୟ ବିମାନ ଚଳାଚଳ କ୍ଷେତ୍ରରେ ବିମାନ କମ୍ପାନୀ ମିଶ୍ରଣର ଏକ ଦ୍ରୁତ ଧାରା ଦେଖାଯାଇଛି । ଅର୍ଥାତ ଗୋଟିଏ ବିମାନ କମ୍ପାନୀ ଅନ୍ୟ ଏକ ବିମାନ କମ୍ପାନୀ ସହ ମର୍ଜ ହେଉଛନ୍ତି । ଉଦାହରଣ ସ୍ୱରୂପ, ଏୟାର ଏସିଆ ଇଣ୍ଡିଆ, ଏୟାର ଇଣ୍ଡିଆ ଏକ୍ସପ୍ରେସ ସହିତ ମିଶ୍ରଣ ହୋଇଛି ।

ସେହିପରି ଟାଟା ଏସଆଇଏ ଏୟାରଲାଇନ୍ସ ଲିମିଟେଡ୍, ଯାହା ପୂର୍ବରୁ ଭିସ୍ତାରା ବ୍ରାଣ୍ଡ ଅଧୀନରେ ପରିଚାଳିତ ହେଉଥିଲା, ଏବେ ସମ୍ପୂର୍ଣ୍ଣ ଭାବରେ ଏୟାର ଇଣ୍ଡିଆ ସହିତ ମିଶ୍ରଣ ହୋଇଛି । ମନ୍ତ୍ରୀ ପରୋକ୍ଷରେ ଏହା ସ୍ପଷ୍ଟ ଭାବରେ ଦର୍ଶାଇଛନ୍ତି ଯେ ଗୋଟିଏ ପଟେ ଭାରତୀୟ ବିମାନ ଚଳାଚଳ କ୍ଷେତ୍ରରେ ଛୋଟ ଏବଂ ମଧ୍ୟମ ଆକାରର ବିମାନ କମ୍ପାନୀଗୁଡ଼ିକ ପାଇଁ ବଞ୍ଚିବା କ୍ରମଶଃ କଷ୍ଟକର ହୋଇପଡୁଛି । ସେପଟେ ବଡ଼ ବଡ଼ କମ୍ପାନୀଗୁଡ଼ିକ ସେମାନଙ୍କର ସ୍ଥିତିକୁ ମଜଭୁତ କରୁଛନ୍ତି ।

• କିଙ୍ଗଫିସର ଉପରେ ₹୩୮୦ କୋଟି ଋଣ

ବନ୍ଦ ହୋଇଥିବା ବିମାନ କମ୍ପାନୀଗୁଡ଼ିକର ବକେୟା ଦେୟ ବିଷୟରେ ସୂଚନା ଦେଇ କେନ୍ଦ୍ର ମନ୍ତ୍ରୀ ମୋହୋଲ କହିଛନ୍ତି ଯେ କିଙ୍ଗଫିସର ଏୟାରଲାଇନ୍ସ ଭାରତୀୟ ବିମାନବନ୍ଦର ପ୍ରାଧିକରଣ (AAI) ଉପରେ ମୋଟ ₹୩୮୦.୫୧ କୋଟି ବକେୟା ଅଛି । ଏଥିରେ ₹୧୭୫.୩୦ କୋଟି ମୂଳ ରାଶି ଥିବାବେଳେ ₹୨୦୫.୧୧ କୋଟି ସୁଧ ଅଛି । କିଙ୍ଗଫିସର ଏୟାରଲାଇନ୍ସ ୨୦୧୨ରେ ବନ୍ଦ ହୋଇଯାଇଥିଲା ।

ଭାରତରେ ବିମାନ ସେବା ଯୋଗାଉଥିବା ଅନ୍ୟ ବିମାନ କମ୍ପାନୀ ଯେପରିକି ଜେଟ୍ ଏୟାରୱେଜ୍ ଏବଂ ଗୋ-ଫାଷ୍ଟର ଏଯାବତ କୌଣସି ବକେୟା ଦେୟ ନାହିଁ । ଅନ୍ୟପକ୍ଷରେ, ଟ୍ରୁଜେଟ୍ ଉପରେ ₹୦.୦୩ କୋଟି ଟଙ୍କା ଅଛି । ଏହି ଏୟାରଲାଇନ୍ସ ଫେବୃଆରୀ ୨୦୨୨ରେ ଭାରତରେ ଏହାର ସେବା ବନ୍ଦ କରିଦେଇଥିଲା । ଆର୍ଥିକ ଅସୁବିଧାର ସମ୍ମୁଖୀନ ହେବା ପରେ ଜେଟ୍ ଏୟାରୱେଜ୍ ୨୦୧୯ରେ କାର୍ଯ୍ୟ ବନ୍ଦ କରିଦେଇଥିଲା । ଆର୍ଥିକ ଅସୁବିଧା ଯୋଗୁଁ ଗୋ-ଫାଷ୍ଟକୁ ମଧ୍ୟ ୨୦୨୪ରେ କାର୍ଯ୍ୟ ବନ୍ଦ କରିବାକୁ ପଡ଼ିଥିଲା ।

ଅଧିକ ଖବର ପଢନ୍ତୁ...